भानुसमानसुभास्वरलिङ्गं सज्जनमानसभास्करलिङ्गम्|
सुरवरदातृसुरेश्वरलिङ्गं तत् प्रणमामि रसेश्वरलिङ्गम्|
छत्रपतीन्द्रसुपूजितलिङ्गं रौप्यफणीन्द्रविभूषितलिङ्गम्|
ग्राम्यजनाश्रितपोषकलिङ्गं तत् प्रणमामि रसेश्वरलिङ्गम्|
बिल्वतरुच्छदनप्रियलिङ्गं किल्बिषदुष्फलदाहकलिङ्गम्|
सेवितकष्टविनाशनलिङ्गं तत् प्रणमामि रसेश्वरलिङ्गम्|
अब्जभगाग्निसुलोचनलिङ्गं शब्दसमुद्भवहेतुकलिङ्गम्|
पार्वतिजाह्नविसंयुतलिङ्गं तत् प्रणमामि रसेश्वरलिङ्गम्|
गन्धितचन्दनचर्चितलिङ्गं वन्दितपादसरोरुहलिङ्गम्|
स्कन्दगणेश्वरभावितलिङ्गं तत् प्रणमामि रसेश्वरलिङ्गम्|
पामरमानवमोचकलिङ्गं सकलचराचरपालकलिङ्गम्|
वाजिजचामरवीजितलिङ्गं तत् प्रणमामि रसेश्वरलिङ्गम्|
स्तोत्रमिदं प्रणिपत्य रसेशं यः पठति प्रतिघस्रमजस्रम्|
सो मनुजः शिवभक्तिमवाप्य ब्रह्मपदं लभतेऽप्यपवर्गम्|

bhaanusamaanasubhaasvaralingam sajjanamaanasabhaaskaralingam|
suravaradaatri'sureshvaralingam tat pranamaami raseshvaralingam|
chhatrapateendrasupoojitalingam raupyaphaneendravibhooshitalingam|
graamyajanaashritaposhakalingam tat pranamaami raseshvaralingam|
bilvataruchchhadanapriyalingam kilbishadushphaladaahakalingam|
sevitakasht'avinaashanalingam tat pranamaami raseshvaralingam|
abjabhagaagnisulochanalingam shabdasamudbhavahetukalingam|
paarvatijaahnavisamyutalingam tat pranamaami raseshvaralingam|
gandhitachandanacharchitalingam vanditapaadasaroruhalingam|
skandaganeshvarabhaavitalingam tat pranamaami raseshvaralingam|
paamaramaanavamochakalingam sakalacharaacharapaalakalingam|
vaajijachaamaraveejitalingam tat pranamaami raseshvaralingam|
stotramidam pranipatya rasesham yah' pat'hati pratighasramajasram|
so manujah' shivabhaktimavaapya brahmapadam labhate'pyapavargam|

Ramaswamy Sastry and Vighnesh Ghanapaathi