रविसोमनेत्रमघनाशनं विभुं
मुनिबुद्धिगम्य- महनीयदेहिनम्।
कमलाधिशायि- रमणीयवक्षसं
सततं नतोऽस्मि हरिमेकमव्ययम्।
धृतशङ्खचक्रनलिनं गदाधरं
धवलाशुकीर्तिमतिदं महौजसम्।
सुरजीवनाथ- मखिलाभयप्रदं
सततं नतोऽस्मि हरिमेकमव्ययम्।
गुणगम्यमुग्रमपरं स्वयंभुवं
समकामलोभ- मददुर्गुणान्तकम्।
कलिकालरक्षण- निमित्तिकारणं
सततं नतोऽस्मि हरिमेकमव्ययम्।
झषकूर्मसिंह- किरिकायधारिणं
कमलासुरम्य- नयनोत्सवं प्रभुम्।
अतिनीलकेश- गगनाप्तविग्रहं
सततं नतोऽस्मि हरिमेकमव्ययम्।
भवसिन्धुमोक्षदमजं त्रिविक्रमं
श्रितमानुषार्तिहरणं रघूत्तमम्।
सुरमुख्यचित्तनिलयं सनातनं
सततं नतोऽस्मि हरिमेकमव्ययम्।

ravisomanetramaghanaashanam vibhum
munibuddhigamya- mahaneeyadehinam.
kamalaadhishaayi- ramaneeyavakshasam
satatam nato'smi harimekamavyayam.
dhri'tashankhachakranalinam gadaadharam
dhavalaashukeertimatidam mahaujasam.
surajeevanaatha- makhilaabhayapradam
satatam nato'smi harimekamavyayam.
gunagamyamugramaparam svayambhuvam
samakaamalobha- madadurgunaantakam.
kalikaalarakshana- nimittikaaranam
satatam nato'smi harimekamavyayam.
jhashakoormasimha- kirikaayadhaarinam
kamalaasuramya- nayanotsavam prabhum.
atineelakesha- gaganaaptavigraham
satatam nato'smi harimekamavyayam.
bhavasindhumokshadamajam trivikramam
shritamaanushaartiharanam raghoottamam.
suramukhyachittanilayam sanaatanam
satatam nato'smi harimekamavyayam.

Ramaswamy Sastry and Vighnesh Ghanapaathi