ಮಹಾನೀಲಮೇಘಾತಿಭವ್ಯಂ ಸುಹಾಸಂ ಶಿವಬ್ರಹ್ಮದೇವಾದಿಭಿಃ ಸಂಸ್ತುತಂ ಚ .
ರಮಾಮಂದಿರಂ ದೇವನಂದಾಪದಾಹಂ ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಂ .. ೧..

ರಸಂ ವೇದವೇದಾಂತವೇದ್ಯಂ ದುರಾಪಂ ಸುಗಮ್ಯಂ ತದೀಯಾದಿಭಿರ್ದಾನವಘ್ನಂ .
ಲಸತ್ಕುಂಡಲಂ ಸೋಮವಂಶಪ್ರದೀಪಂ ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಂ .. ೨..

ಯಶೋದಾದಿಸಂಲಾಲಿತಂ ಪೂರ್ಣಕಾಮಂ ದೃಶೋರಂಜನಂ ಪ್ರಾಕೃತಸ್ಥಸ್ವರೂಪಂ .
ದಿನಾಂತೇ ಸಮಾಯಾಂತಮೇಕಾಂತಭಕ್ತೈರ್ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಂ .. ೩..

ಕೃಪಾದೃಷ್ಟಿಸಂಪಾತಸಿಕ್ತಸ್ವಕುಂಜಂ ತದಂತಃಸ್ಥಿತಸ್ವೀಯಸಮ್ಯಗ್ದಶಾದಂ .
ಪುನಸ್ತತ್ರ ತೈಃ ಸತ್ಕೃತೈಕಾಂತಲೀಲಂ ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದಂ .. ೪..

ಗೃಹೇ ಗೋಪಿಕಾಭಿರ್ಧೃತೇ ಚೌರ್ಯಕಾಲೇ ತದಕ್ಷ್ಣೋಶ್ಚ ನಿಕ್ಷಿಪ್ಯ ದುಗ್ಧಂ ಚಲಂತಂ .
ತದಾ ತದ್ವಿಯೋಗಾದಿಸಂಪತ್ತಿಕಾರಂ ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಂ .. ೫..

ಚಲತ್ಕೌಸ್ತುಭವ್ಯಾಪ್ತವಕ್ಷಃಪ್ರದೇಶಂ ಮಹಾವೈಜಯಂತೀಲಸತ್ಪಾದಯುಗ್ಮಂ .
ಸುಕಸ್ತೂರಿಕಾದೀಪ್ತಭಾಲಪ್ರದೇಶಂ ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಂ .. ೬..

ಗವಾಂ ದೋಹನೇ ದೃಷ್ಟರಾಧಾಮುಖಾಬ್ಜಂ ತದಾನೀಂ ಚ ತನ್ಮೇಲನವ್ಯಗ್ರಚಿತ್ತಂ .
ಸಮುತ್ಪನ್ನತನ್ಮಾನಸೈಕಾಂತಭಾವಂ ಭಜೇ ರಾಧಿಕಾವಲ್ಲಭಂ ಕೃಷ್ಣಚಂದ್ರಂ .. ೭..

ಅದಃ ಕೃಷ್ಣಚಂದ್ರಾಷ್ಟಕಂ ಪ್ರೇಮಯುಕ್ತಃ ಪಠೇತ್ಕೃಷ್ಣಸಾನ್ನಿಧ್ಯಮಾಪ್ನೋತಿ ನಿತ್ಯಂ .
ಕಲೌ ಯಃ ಸ ಸಂಸಾರದುಃಖಾತಿರಿಕ್ತಂ ಪ್ರಯಾತ್ಯೇವ ವಿಷ್ಣೋಃ ಪದಂ ನಿರ್ಭಯಂ ತತ್ .. ೮..

Ramaswamy Sastry and Vighnesh Ghanapaathi