ಸದೇಕಂ ಪರಂ ಕೇವಲಂ ನಿರ್ವಿಕಾರಂ ನಿರಾಕಾರಮಾನಂದಮಾತ್ರಂ ಪವಿತ್ರಂ .
ಸ್ವಯಂಜ್ಯೋತಿರವ್ಯಕ್ತಮಾಕಾಶಕಲ್ಪಂ ಶ್ರುತಿರ್ಬ್ರಹ್ಮ ಯತ್ಪ್ರಾಹ ತಸ್ಮೈ ನಮಸ್ತೇ ..

ಯ ಏಕೋಽಪಿ ಮಾಯಾವಶಾತ್ಸರ್ವಹೇತುಃ ಸ್ವಸೃಷ್ಟೇಷು ವಿಶ್ವೇಷು ವಿಷ್ವಕ್ಪ್ರವೇಶಾತ್ .
ಶ್ರುತೌ ಜೀವ ಇತ್ಯುಚ್ಯತೇ ಕೇವಲಾತ್ಮಾ ತುರೀಯಾಯ ಶುದ್ಧಾಯ ತಸ್ಮೈ ನಮಸ್ತೇ ..

ನ ಯಸ್ಮಾದಿಹ ದ್ರಷ್ಟೃ ವಿಜ್ಞಾತೃ ಚಾನ್ಯತ್ಕ್ವಚಿತ್ಸ್ಯಾತ್ಪರಂ ದ್ರಷ್ಟೃ ವಿಜ್ಞಾತೃ ವಾ ಯತ್ .
ಸಮಸ್ತಾಸು ಬುದ್ಧಿಷ್ವನುಸ್ಯೂತಮೇಕಂ ನಮೋ ಬ್ರಹ್ಮಣೇ ಜೀವರೂಪಾಯ ತಸ್ಮೈ ..

ಮುಖಾದ್ದರ್ಪಣೇ ದೃಶ್ಯಮಾನೋ ನ ಭಿನ್ನೋ ಮುಖಾಭಾಸ ಏವಂ ಚಿದಾಭಾಸ ಈಶಃ .
ಚಿತೋ ನೈವ ಭಿನ್ನೋಽಸ್ತಿ ಮಾಯಾಸ್ಥಿತೋ ಯಃ ಪರೇಶಾಯ ತಸ್ಮೈ ನಮಃ ಕೇವಲಾಯ ..

ಯಥಾ ಸೂರ್ಯ ಏಕಃ ಸ್ಥಿತಸ್ತೋಯಪಾತ್ರೇಷ್ವನೇಕೇಷು ಯೋ ನಿರ್ವಿಕಾರಸ್ತಥಾಽಽತ್ಮಾ .
ಸ್ಥಿತಃ ಸ್ವೀಯಬುದ್ಧಿಷ್ವನೇಕಾಸು ನಿತ್ಯಶ್ಚಿದೇಕಸ್ವರೂಪಾಯ ತಸ್ಮೈ ನಮಸ್ತೇ ..

ಸ್ಥಿತೋಽನೇಕಬುದ್ಧಿಷ್ವಯಂ ಜೀವ ಏಕೋ ವಿಭುಃ ಕಾರಣೇಕತ್ವತೋ ನಾತ್ರ ನಾನಾ .
ಇತಿ ತ್ಯಕ್ತಸರ್ವೈಷಣಾಪೀಹ ಯಸ್ಯ ಪ್ರಸಾದಾದ್ವಿಜಾನಂತಿ ತಸ್ಮೈ ನಮಸ್ತೇ ..

ಮುಖೈಃ ಪಂಚಭಿರ್ಭೋಗ್ಯವಸ್ತೂನಿ ಭುಂಕ್ತೇ ಹ್ಯಭೋಕ್ತಾಪಿ ಬುದ್ಧಿಸ್ಥಿತೋ ಬುದ್ಧಿತುಲ್ಯಃ .
ಕರೋತೀವ ಕರ್ಮಾಣ್ಯಕರ್ಮಾಪಿ ಯೋ ವೈ ವಿಚಿತ್ರಾಯ ತಸ್ಮೈ ನಮಸ್ತೇಽಸ್ತು ನಿತ್ಯಂ ..

ಚಿದಾಭಾಸ ಏವಾತ್ರ ಕರ್ತೇವ ಭಾತಿ ಸ್ವರೂಪಾಪರಿಜ್ಞಾನತೋ ಯಸ್ಯ ನೂನಂ .
ಸ್ವಬುದ್ಧೇರಿಯಂ ಕರ್ತೃಭೋಕ್ತೃತ್ವರೂಪಾ ಮೃಷಾ ಸಂಸೃತಿರ್ವೈ ನಮಸ್ತೇಽಸ್ತು ತಸ್ಮೈ ..

ಚಿದಾಭಾಸಚೈತನ್ಯಬುದ್ಧೀರ್ವಿವಿಚ್ಯಾತ್ರ ವಿಜ್ಞಾಯ ಸಂಸಾರಬಂಧಾದ್ವಿಮುಕ್ತಃ .
ಯ ಏತದ್ವಿವೇಕಾವಧಿಂ ಸ್ವಸ್ಯ ಮೇನೇ ಸಮಸ್ತಂ ಚ ಸಂಸಾರಮಸ್ಮೈ ನಮಸ್ತೇ ..

ನ ಕಸ್ಯಾಪಿ ಸಂಸಾರಲೇಶೋಽಸ್ತಿ ಕಶ್ಚಿತ್ಸ ಕರ್ತೃತ್ವಭೋಕ್ತೃತ್ವರೂಪೋ ಹಿ ಮಿಥ್ಯಾ .
ಸಮಸ್ತೋಽಪ್ಯಯಂ ಯತ್ಸ್ವರೂಪಾವಿವೇಕಾನ್ನಮಸ್ತೇ ಸದಾ ನಿತ್ಯಮುಕ್ತಾಯ ತಸ್ಮೈ ..

ಜಡಾ ಬುದ್ಧಿರಾತ್ಮಾ ಪರೋ ನಿರ್ವಿಕಾರಶ್ಚಿದಾಭಾಸ ಏಕೋಽಪಿ ಮಿಥ್ಯೈವ ಜೀವಃ .
ಯ ಏತದ್ವಿವೇಕೀ ಸ್ವತೋ ನಿತ್ಯಮುಕ್ತಃ ಸದಾ ನಿರ್ವಿಕಾರಾಯ ತಸ್ಮೈ ನಮಸ್ತೇ ..

ಚಿದಾಭಾಸ ಏಕೋಽವ್ಯಯಃ ಕಾರಣಸ್ಥೋ ಯ ಈಶಃ ಸ ಏವೇಹ ಕಾರ್ಯಸ್ಥಿತಃ ಸನ್ .
ಅಭೂಜ್ಜೀವಸಂಜ್ಞಃ ಸ ಏಕೋ ಹಿ ಜೀವಃ ಸ ಭಿನ್ನೋ ನ ಯಸ್ಮಾನ್ನಮಸ್ತೇಽಸ್ತು ತಸ್ಮೈ ..

ಯದಜ್ಞಾನತೋ ಜೀವನಾನಾತ್ವಮಾಹುರ್ಮಹಾಮಾಯಯಾ ಮೋಹಿತಾ ವಾದದಕ್ಷಾಃ .
ವಿವೇಕೀ ವದತ್ಯೇಕಮೇವಾತ್ರ ಜೀವಂ ಪರಿತ್ಯಕ್ತವಾದೋ ನಮಸ್ತೇಽಸ್ತು ತಸ್ಮೈ ..

ಚಿದಾಭಾಸ ಏಕೋಽಥವಾ ನೇತಿ ಸರ್ವೇ ವಿಮುಹ್ಯಂತಿ ಬೇದಾಂತಿನೋಽಪ್ಯನ್ಯಭಕ್ತಾಃ .
ತಥಾಪ್ಯೇಕ ಏವೇತಿ ಧೀದಾರ್ಢ್ಯದಾತಾ ಯ ಆತ್ಮಾ ಸ್ವಭಕ್ತಸ್ಯ ತಸ್ಮೈ ನಮಸ್ತೇ ..

ಮುಖಾದರ್ಶಯೋರೇಕ ಏಕೈಕತಾಯಾಂ ಮುಖಾಭಾಸ ಏವಂ ಚಿದಾಭಾಸ ಏಕಃ .
ಸ್ವಚಿದ್ಬ್ರಹ್ಮಬಿಂಬೈಕ್ಯಮಾಯೈಕ್ಯತೋಽಯಂ ಯದಂಶೋಽಖಿಲೇಶೋ ನಮಸ್ತೇಽಸ್ತು ತಸ್ಮೈ ..

ಶ್ರುತಿರ್ಹ್ಯೇಕತಾಂ ಬ್ರಹ್ಮಣೋ ವಕ್ತಿ ನೂನಂ ಸಜಾತೀಯಭೇದಾದಿಶೂನ್ಯಂ ತತೋಽತ್ರ .
ಸ್ವಮಾಯೈಕತಾಪ್ಯಸ್ಯ ಯುಕ್ತ್ಯಾಪಿ ಸಿದ್ಧಾ ನಮಸ್ತೇ ಸದೈಕಸ್ವರೂಪಾಯ ತಸ್ಮೈ ..

ನ ಮಾಯಾಬಹುತ್ವಂ ತದಾ ತತ್ಪ್ರತಿಷ್ಠಾ ಅನೇಕೇಶ್ವರಾಃ ಸಂಭವೇಯುರ್ಹಿ ನೈತತ್ .
ಕಚಿದ್ಯುಜ್ಯತೇ ಯಸ್ಯ ಮಾಯಾಪ್ಯನೇಕಾ ನಮಸ್ತೇ ಜಗದ್ಧೇತುಭೂತಾಯ ತಸ್ಮೈ ..

ನ ಮಾಯಾಂ ವಿನಾ ಯಸ್ಯ ಕರ್ತೃತ್ವಮಸ್ತಿ ಪ್ರವೇಶೋಽಪಿ ತಸ್ಮಾತ್ಸಮಸ್ತಂ ಮೃಷೈವ .
ಮಹಾಮಾಯಿನೇ ನಿರ್ವಿಕಾರಾಯ ತಸ್ಮೈ ನಮೋ ಬ್ರಹ್ಮರೂಪಾಯ ಶುದ್ಧಾಯ ತುಭ್ಯಂ ..

ಯ ಆತ್ಮಾ ದೃಗೇವಾಽಽಸ ದೃಶ್ಯಂ ತ್ವನಾತ್ಮಾ ವಿವೇಕಾದ್ದ್ವಯೋರಾತ್ಮದೃಷ್ಟಿಃ ಸದೃಶ್ಯೇ .
ವಿನಷ್ಟೋ ಭವೇತ್ಸಾ ದೃಶಿ ಸ್ವಸ್ವರೂಪೇ ನಮಸ್ತೇ ದೃಗಾತ್ಮಸ್ವರೂಪಾಯ ತಸ್ಮೈ ..

ಸ ದೃಗ್ನಿರ್ವಿಕಾರಃ ಸ್ವಮಾಯಾ ಜಡೇಯಂ ದೃಗಾಭಾಸ ಏಕೋ ಮೃಷೈವೇತಿ ಯಸ್ಯ .
ಜಗತ್ಕರ್ತೃತಾ ತಾತ್ತ್ವಿಕೀ ನಾಸ್ತಿ ತಸ್ಮೈ ನಮಃ ಕೇವಲಾಕರ್ತೃರೂಪಾಯ ತುಭ್ಯಂ ..

ಅಮಾಯ್ಯೇವ ಮಾಯೀ ವಿಭುಃ ಶುದ್ಧ ಆತ್ಮಾ ಸೃಜತ್ಯತ್ತ್ಯವತ್ಯೇತದಾನಂದಪೂರಃ .
ನ ಮಾಯಾಂ ವಿನಾ ಸ್ರಷ್ಟೃತಾ ಸಾಕ್ಷಿತಾ ವಾ ವಿಶುದ್ಧಾತ್ಮನೋ ಯಸ್ಯ ತಸ್ಮೈ ನಮಸ್ತೇ ..

ಚಿತಾಭಾಸ ಏವಾಖಿಲೋಪಾಧಿನಿಷ್ಠಃ ಸಮಸ್ತೈಕಸಾಕ್ಷೀ ಸ ಜೀವೇಶಸಂಜ್ಞಃ .
ಚಿದಂಶೋಽಖಿಲಾತ್ಮಾ ನ ಭಿನ್ನೋಽಸ್ತಿ ಯಸ್ಮಾನ್ನಮಸ್ತೇ ವಿಶುದ್ಧಾತ್ಮರೂಪಾಯ ತಸ್ಮೈ ..

ಅಹಂ ಸಚ್ಚಿದಾನಂದ ಆತ್ಮೈವ ಶುದ್ಧೋ ವಿಮುಕ್ತೋಽಸ್ಮಿ ವೇದಾಂತವಾಕ್ಯಾರ್ಥಬೋಧಾತ್ .
ಇತಿ ಸ್ವಸ್ವರೂಪಂ ವಿಜಾನಾತಿ ವಿದ್ವಾನ್ಪರಂ ಯತ್ಪರೇಭ್ಯೋಽಪಿ ತಸ್ಮೈ ನಮಸ್ತೇ ..

ಸ್ವಮಾಯಾಪರಿಭ್ರಾಂತಚಿತ್ತಾ ಅಜಸ್ರಂ ಪರಾಗ್ವಸ್ತು ಪಶ್ಯಂತಿ ನ ಪ್ರತ್ಯಗರ್ಥಂ .
ಮುಮುಕ್ಷುಸ್ತು ಯಂ ಪಶ್ಯತಿ ಪ್ರತ್ಯಗರ್ಥೇ ಪರಬ್ರಹ್ಮರೂಪಾಯ ತಸ್ಮೈ ನಮಸ್ತೇ ..

ಉಪಾಸ್ಯೋಽನ್ಯ ಈಶೋಽಸ್ತ್ಯಹಂ ತ್ವನ್ಯ ಈಶಾತ್ಪಶುರ್ವೇದ ನೈನಂ ಭಜತ್ಯತ್ರ ಯೋಽಸ್ಮಾತ್ .
ವಿವೇಕೀ ಸ ಏವಾಹಮಸ್ಮೀತ್ಯುಪಾಸ್ತೇ ಯಮಾತ್ಮಾನಮೀಶಂ ನಮಸ್ತೇಽಸ್ತು ತಸ್ಮೈ ..

ಭಯಂ ಭೇದದೃಷ್ಟೇರ್ಭವತ್ಯುಲ್ಬಣಂ ವೈ ಮಹಾಂತೋ ನ ಭೇದಂ ಪ್ರಪಶ್ಯಂತಿ ತಸ್ಮಾತ್ .
ಯದಜ್ಞಾನತೋ ದೃಶ್ಯತೇ ಭೇದ ಏವಂ ಭಿದಾಮೋಹಹಂತ್ರೇ ನಮಸ್ತೇಽಸ್ತು ತಸ್ಮೈ ..

ವಿರಿಂಚೇಂದ್ರಸೂರ್ಯಾಗ್ನಿರುದ್ರೇಂದುವಿಷ್ಣೂನ್ಪ್ರಕಲ್ಪ್ಯೈಕ ಏವಾದ್ವಯಃ ಸರ್ವಸಾಕ್ಷೀ .
ಜಗಚ್ಚಕ್ರವಿಭ್ರಾಂತಿಕರ್ತಾ ಯ ಆತ್ಮಾ ನ ದೃಶ್ಯೇತ ಕೇನಾಪಿ ತಸ್ಮೈ ನಮಸ್ತೇ ..

ಜಗಜ್ಜಾಗ್ರತಿ ಸ್ಥೂಲಮೇತತ್ಸಮಾನಂ ಮನೋವಾಸಿತಂ ಸ್ವಪ್ನ ಆನಂದನಿದ್ರಾಂ .
ಸುಷುಪ್ತೌ ಸ್ವಮೇವಾಭಿಪಶ್ಯನ್ಮುದಾಽಽಸ್ತೇ ತುರೀಯೋ ಯ ಆತ್ಮಾ ನಮಸ್ತೇಽಸ್ತು ತಸ್ಮೈ ..

ಸಮಸ್ತಾದಪಿ ಸ್ಥೂಲಸೂಕ್ಷ್ಮಾಚ್ಛರೀರಾತ್ಪರಃ ಕಾರಣಾಚ್ಚಾನ್ಯ ಆತ್ಮಾ ಸಮೀಪೇ .
ಯ ಏಕೋ ವಿದೂರೇಽಪಿ ತಿಷ್ಠನ್ ಜನಾನಾಂ ಮಹಿಮ್ನಿ ಸ್ವಕೀಯೇ ಚ ತಸ್ಮೈ ನಮಸ್ತೇ ..

ಯಮಾಶ್ರಿತ್ಯ ನಾಸ್ತೀತಿ ಚಾಸ್ತೀತಿ ವೇದೇ ಪ್ರವೃತ್ತೋ ವಿರುದ್ಧೋಽಪಿ ವಾದೋಽಖಿಲಾತ್ಮಾ .
ನಮಸ್ತೇಽಙ್ಘ್ರಿಪಾಣ್ಯಾದಿಹೀನಾಯ ನಿತ್ಯಂ ಸಮಸ್ತಾಂಘ್ರಿಪಾಣ್ಯಾದಿಯುಕ್ತಾಯ ತಸ್ಮೈ ..

ಯೋಽಣೋರಣೀಯಾಂಸಮಾತ್ಮಾನಮೇಕಂ ಮಹಂತಂ ಮಹದ್ವಸ್ತುನಶ್ಚೇತನೇಭ್ಯಃ .
ಪರಂ ಚೇತನಂ ನಿತ್ಯತೋ ವೇದ ನಿತ್ಯಂ ಯಮೇವೇಹ ವಿದ್ವಾನ್ನಮಸ್ತೇಽಸ್ತು ತಸ್ಮೈ ..

ಯದಾನಂದಲೇಶೋಪಭೋಗೇನ ಸರ್ವೇ ಸದಾನಂದಿನಃ ಸಂಭವಂತ್ಯತ್ರ ತಸ್ಮೈ .
ಸದಾನಂದಸಂದೋಹಪೂರ್ಣಾರ್ಣವಾಯ ಪ್ರಸನ್ನಾಯ ತುಭ್ಯಂ ನಮಃ ಕೇವಲಾಯ ..

ಯಮುತ್ಸೃಜ್ಯ ಮರ್ತ್ಯಾ ಭಜತ್ಯನ್ಯದೇವಾನ್ನ ತೇಷಾಂ ವಿಮುಕ್ತಿಃ ಫಲಂ ಕಿಂತು ತುಚ್ಛಂ .
ಶ್ವಪುಚ್ಛಂ ಗೃಹೀತ್ವಾ ತರಿಷ್ಯಂತಿ ಕೇ ವಾ ಸಮುದ್ರಂ ಹ್ಯಪಾರಂ ನಮಸ್ತೇಽಸ್ತು ತಸ್ಮೈ ..

ಯಥಾ ವಿಧ್ಯುಪಾಸ್ತೌ ಫಲಂ ದಾಸ್ಯತೀಶಸ್ತಥಾ ವಿಷ್ಣುರುದ್ರೇಂದ್ರವಹ್ನ್ಯಾದ್ಯುಪಾಸ್ತೌ .
ಫಲಂ ದಾಸ್ಯತಿ ಬ್ರಹ್ಮ ಯದ್ಧೀಶಸಂಜ್ಞಃ ಸ್ವಕರ್ಮಾನುಸಾರಂ ನಮಸ್ತೇಽಸ್ತು ತಸ್ಮೈ ..

ನ ಯದ್ಬ್ರಹ್ಮ ಮೋಕ್ಷಪ್ರದಂ ಸ್ಯಾತ್ಕದಾಚಿದ್ವಿನೇಹೈವ ಮುಕ್ತಿಪ್ರದಂ ಜ್ಞಾನಮೇಕಂ .
ನ ಮೋಕ್ಷಂ ಕೃತಃ ಕರ್ಮಣಾತಃ ಕೃತೇನ ಪ್ರಪನ್ನಾರ್ತಿಹಂತ್ರೇ ನಮಸ್ತೇಽಸ್ತು ತಸ್ಮೈ ..

ಇದಂ ನೇತಿನೇತೀತ್ಯಮೂರ್ತಂ ಚ ಮೂರ್ತಂ ನಿರಸ್ಯೈವ ಸರ್ವಂ ಜಗದ್ದೃಶ್ಯಮೇತತ್ .
ನಿಷೇಧಾವಧಿ ಬ್ರಹ್ಮ ಯಚ್ಛಿಷ್ಯತೇ ವೈ ಮನೋವಾಗತೀತಾಯ ತಸ್ಮೈ ನಮಸ್ತೇ ..

ಪರಿತ್ಯಜ್ಯ ಯತ್ತತ್ತ್ವಸಮ್ಯಗ್ವಿಚಾರಂ ಪ್ರವರ್ತೇತ ಯಸ್ತೀರ್ಥಯಾತ್ರಾಜಪಾದೌ .
ಕರಸ್ಥಾನ್ನಮುತ್ಸೃಜ್ಯ ಲೇಢೀತಿ ಹಸ್ತಂ ನ ಯಸ್ಯೋದಯಸ್ತಸ್ಯ ತಸ್ಮೈ ನಮಸ್ತೇ ..

ನ ಚೇತ್ಪ್ರಾಣವರ್ಗೇಷ್ವಯಂ ಸ್ಯಾಜ್ಜಡತ್ವಾತ್ಕಥಂ ಪ್ರಾಣನಾಡೀ ಕ್ರಿಯಾಕಾರಿತೈಷಾಂ .
ಅತೋ ಯಸ್ಯ ಸಿದ್ಧಾ ಸ್ಥಿತಾ ಯುಕ್ತಿತೋಽಪಿ ಪ್ರಪಂಚಪ್ರಕಾಶಾಚ್ಚ ತಸ್ಮೈ ನಮಸ್ತೇ ..

ಭಯಂ ಯದ್ವಿದಾಂ ನಾಸ್ತಿ ಮೃತ್ಯುಶ್ಚ ನೂನಂ ಬಿಭೇತ್ಯೇವ ವಾಯ್ವಾದಿ ಸರ್ವೇ ಚ ಯಸ್ಮಾತ್ .
ಶರೀರೇಽಹಮಿತ್ಯತ್ರ ಬುದ್ಧೇರ್ಭಯಂ ಸ್ಯಾನ್ನಮಸ್ತೇಽಭಯಾಯಾಶರೀರಾಯ ತಸ್ಮೈ ..

ಗುರೌ ಭಕ್ತಿಯುಕ್ತೈರಿಹೈವೇಶ್ವರೋ ಯಃ ಸುವಿಜ್ಞೇಯ ಆತ್ಮಾಽನ್ಯಥಾ ತ್ವಬ್ದಕೋಟ್ಯಾ .
ಅವಿಜ್ಞೇಯ ಏಕಃ ಸ್ವಬುದ್ಧಿಸ್ಥಿತೋಽಪಿ ಪ್ರಿಯಾಯಾಖಿಲೇಭ್ಯೋಽಪಿ ತಸ್ಮೈ ನಮಸ್ತೇ ..

ಸಮಸ್ತಾತ್ಪ್ರಿಯೋ ದೇಹ ಏವಾಕ್ಷಮಸ್ಮಾತ್ಪ್ರಿಯಂ ಪ್ರಾಣ ಏವಾಕ್ಷತೋಽಪಿ ಪ್ರಿಯೋಽತಃ .
ಪ್ರಿಯಃ ಪ್ರತ್ಯಗಾತ್ಮೈವ ಭೋಕ್ತಾ ಪರೋ ಯಃ ಸ್ವತೋಽತಿಪ್ರಿಯಾಯೇಹ ತಸ್ಮೈ ನಮಸ್ತೇ ..

ಪ್ರಿಯಾದಾತ್ಮನೋಽನ್ಯನ್ನ ವಿದ್ಯೇತ ಕಿಂಚಿತ್ಕ್ವಚಿತ್ಕಾರಣಾನ್ನೈವ ಭಿದ್ಯೇತ ಕಾರ್ಯಂ .
ಯ ಆತ್ಮಾ ಸಮಸ್ತಸ್ಯ ಹೇತುರ್ನಮಸ್ತೇ ನಿದಾನಾಯ ಸರ್ವಸ್ಯ ದೃಶ್ಯಸ್ಯ ತಸ್ಮೈ ..

ಸಮಸ್ತಂ ಜಗತ್ಕಾರಣಾನ್ನೈವ ಭಿನ್ನಂ ಸಮಸ್ತಾತ್ಮನಃ ಕೇವಲಾದದ್ವಿತೀಯಾತ್ .
ಪರಬ್ರಹ್ಮಣೋಽವ್ಯಾಕೃತೇಶಾಚ್ಚ ಯಸ್ಮಾನ್ನಮಸ್ತೇ ಕ್ಷರಾಯಾಕ್ಷರಾಯಾಪಿ ತಸ್ಮೈ ..

ಯತಃ ಕಾರಣಾನ್ನೇಹ ಕಾರ್ಯಂ ವಿಭಿನ್ನಂ ತತೋ ಬ್ರಹ್ಮಣೋ ನೈವ ಭಿನ್ನಂ ಜಗತ್ಸ್ಯಾತ್ .
ಸಮಸ್ತಂ ಜಗದ್ಬ್ರಹ್ಮ ತಚ್ಚಾಸ್ಮಿ ವಿದ್ವಾನುಪಾಸ್ತೇ ಯಮೇಕಂ ನಮಸ್ತೇಽಸ್ತು ತಸ್ಮೈ ..

ಯಥಾ ಮೃದ್ವಿಕಾರೋ ಮೃತೋ ನೈವ ಭಿನ್ನಸ್ತಥಾ ಚಿದ್ವಿಕಾರಶ್ಚಿತೋ ನೈವ ಭಿನ್ನಃ .
ಅತಃ ಸರ್ವಮೇತಚ್ಚಿದೇವೇತಿ ವಿದ್ವಾನ್ವಿಜಾನಾತಿ ಯದ್ಬ್ರಹ್ಮ ತಸ್ಮೈ ನಮಸ್ತೇ ..

ಜಗದ್ಯಸ್ಯ ಸರ್ವಂ ಶರೀರಂ ಜಗನ್ನ ಪ್ರಮಾತೃಪ್ರಮಾಣಪ್ರಮೇಯಾತ್ಮಕೋ ಯಃ .
ಸಮಸ್ತಾಂತರಾಯಾಖಿಲೇಶಾಯ ತಸ್ಮೈ ನಮಃ ಸಚ್ಚಿದಾನಂದರೂಪಾಯ ತುಭ್ಯಂ ..

ವಿದುರ್ಯಂ ನ ಸರ್ವೇಽಪಿ ಯೋ ವೇತ್ತಿ ಸರ್ವಂ ಸಮಸ್ತೇಷು ಭೂತೇಷು ತಿಷ್ಠಂತ್ವಯಂ ಯಃ .
ಸಮಸ್ತಾಂತರಃ ಪ್ರೇರಯತ್ಯೇವ ಸರ್ವಾನ್ನಮಸ್ತೇ ಸಮಸ್ತಾಂತರೇಶಾಯ ತಸ್ಮೈ ..

ನ ದೇಹೇಂದ್ರಿಯಪ್ರಾಣಧೀಭೂತವೃಂದಂ ನ ಸಂಸಾರ್ಯಹಂ ಕಿಂತು ಚಿನ್ಮಾತ್ರಮೇಕಂ .
ಪರಂ ಚಾಪರಂ ಬ್ರಹ್ಮವಿದ್ವಾನ್ವಿಶುದ್ಧಸ್ತದಸ್ತೀತಿ ಯದ್ವೇದ ತಸ್ಮೈ ನಮಸ್ತೇ ..

ಯಥಾ ಸ್ವಪ್ನದೃಷ್ಟಾ ಚ ಹಸ್ತ್ಯಾದಿ ಮಿಥ್ಯಾ ತಥಾ ಸರ್ವಮೇತಜ್ಜಗದ್ಭಾತಿ ಮಿಥ್ಯಾ .
ಅಧಿಷ್ಠಾನಮಾತ್ರಂ ಜಗದ್ದ್ರಷ್ಟೃ ಸತ್ಯಂ ವಿಶುದ್ಧಂ ಚ ಯದ್ಬ್ರಹ್ಮ ತಸ್ಮೈ ನಮಸ್ತೇ ..

ಪರಾ ಚಾಪರಾ ಯಸ್ಯ ಮಾಯಾ ದ್ವಿಧೇಯಂ ಜಗತ್ಕರ್ತೃತಾಮಕ್ರಿಯಸ್ಯಾತನೋತಿ .
ಸ್ವತೋ ದ್ರಷ್ಟೃದೃಶ್ಯಾತಿರಿಕ್ತಾಯ ತಸ್ಮೈ ನಮಃ ಕೇವಲಾಯಾವ್ಯಯಾಯಾತ್ಮನೇಽಸ್ತು ..

ವಿಶುದ್ಧಾತ್ಮತತ್ತ್ವಾಪರಿಜ್ಞಾನಮೂಲಂ ವಿಶೇಷಾವಭಾಸಂ ಸುಖಿತ್ವಾದಿರೂಪಂ .
ವಿಶುದ್ಧಾತ್ಮತತ್ತ್ವೇ ಪರಿಜ್ಞಾತ ಏತತ್ಕ್ವಚಿನ್ನಾಸ್ತಿ ಯಸ್ಮಿನ್ನಮಸ್ತೇಽನ್ತು ತಸ್ಮೈ ..

ನ ಹಿ ತ್ವಕ್ಪರಿಜ್ಞಾನತಃ ಸರ್ಪಭಾನಂ ಕ್ವಚಿದ್ವಿದ್ಯತೇ ಸರ್ಪತಾ ಕಲ್ಪಿತಾ ಸ್ಯಾತ್ .
ತಥಾ ಕಲ್ಪಿತಂ ಸರ್ವಮೇತಚ್ಚ ಯಸ್ಮಿನ್ನಮಸ್ತೇ ಸಮಸ್ತಾವಭಾಸಾಯ ತಸ್ಮೈ ..

ಸುಷುಪ್ತೌ ನ ಸಂಸಾರಲೇಶೋಽಸ್ತಿ ಕಶ್ಚಿತ್ಪ್ರಬೋಧೇಽಖಿಲಾಹಂಕೃತೌ ದೃಶ್ಯತೇಽಯಂ .
ಅತೋಽಹಂಕೃತೇರೇವ ಸಂಸಾರ ಇತ್ಥಂ ನ ವೈ ಸಂಸೃತಿರ್ಯಸ್ಯ ತಸ್ಮೈ ನಮಸ್ತೇ ..

ನ ಶಾಸ್ತಾ ನ ಶಿಷ್ಯೋ ನ ಶಾಸ್ತ್ರಂ ನ ವಿಶ್ವಂ ನಂ ಶಾಕ್ತಂ ಚ ಶೈವಂ ಮತಂ ವೈಷ್ಣವಂ ವಾ .
ಸುಷುಪ್ತೌ ತದಾನೀಂ ಯದಸ್ತ್ಯಾತ್ಮಮಾತ್ರಂ ಸ್ವತೋ ನಿಷ್ಪ್ರಪಂಚಾಯ ತಸ್ಮೈ ನಮಸ್ತೇ ..

ಜಡಾನಾಂ ಪ್ರವೃತ್ತಿಃ ಸ್ವತೋ ನಾಸ್ತಿ ಯಸ್ಮಾದ್ವಿಭೋಶ್ಚೇತನಾತ್ಸಾ ಪ್ರವೃತ್ತಿಃ ಪ್ರವೃತ್ತಾ .
ಮನಃಪ್ರಾಣದೇಹೇಂದ್ರಿಯವ್ಯಾಕೃತಾನಾಂ ನಮಸ್ತೇ ಚಿದಾತ್ಮಸ್ವರೂಪಾಯ ತಸ್ಮೈ ..

ಮನಃಪ್ರಾಣದೇಹೇಂದ್ರಿಯವ್ಯಾಕೃತಾನಿ ಸ್ವತಃ ಕಾಷ್ಠತುಲ್ಯಾನಿ ಯತ್ಸನ್ನಿಧಾನಾತ್ .
ಸ್ವಯಂ ಚೇತನಾನೀವ ಭಾಂತ್ಯೇವ ಮೋಹಾಜ್ಜಡೇಭ್ಯಃ ಪರಸ್ಮೈ ನಮಸ್ತೇಽಸ್ತು ತಸ್ಮೈ ..

ಬಹಿರ್ಬುಧ್ಯತೇ ಪ್ರಾಣಿಬುದ್ಧಿಃ ಪದಾರ್ಥಾನ್ನ ಯಂ ಬುಧ್ಯತೇ ಪ್ರಾಣನಾಥಂ ಸ್ವಸಂಸ್ಥಂ .
ಸಮಸ್ತಾಂತರಾತ್ಮಾನಮೇಕಂ ಚ ತಸ್ಮೈ ನಮಸ್ತೇ ವಿರಿಂಚಾದಿಧೀಬೋಧಯಿತ್ರೇ ..

ಪರಂ ಯತ್ಸ್ವರೂಪಂ ವಿದುರ್ನಾಪಿ ದೇವಾಃ ಕುತೋಽನ್ಯೇ ಮನುಷ್ಯಾದಯೋ ಬಾಹ್ಯಚಿತ್ತಾಃ .
ತದೇಹವಾಮಸ್ಮೀತಿ ಭಕ್ತಾಸ್ತ್ವಜಸ್ರಂ ಭಜಂತ್ಯದ್ವಿತೀಯಂ ನಮಸ್ತೇಽಸ್ತು ತಸ್ಮೈ ..

ಸಮಸ್ತೇಷು ದೇಹೇಷು ಸೂರ್ಯೇಽಪಿ ತಿಷ್ಠನ್ಯ ಏಕೋಽಖಿಲಾತ್ಮಾ ಸಮಸ್ತೈಕಸಾಕ್ಷೀ .
ಸ ಏವಾಹಮಸ್ಮೀತಿ ವೇದಾಂತವಿದ್ಭಿಃ ಸದೋಪಾಸ್ಯತತ್ತ್ವಾಯ ತಸ್ಮೈ ನಮಸ್ತೇ ..

ಅಹಂ ವಿಶ್ವಕಸ್ತೈಜಸಃ ಪ್ರಾಜ್ಞರೂಪೋ ವಿರಾಟ್ಸೂತ್ರಮಾಯೇಶರೂಪಾನ್ನ ಭಿನ್ನಃ .
ಉಪಾಧೌ ವಿಭಿನ್ನೇಽಪಿ ಕಿಂತ್ವಸ್ಮಿ ಸೋಽಹಂ ಯಮೇವಂ ಭಜನ್ವೇದ ತಸ್ಮೈ ನಮಸ್ತೇ ..

ಸಮಸ್ತಾನಿ ಕರ್ಮಾಣಿ ಸಂತ್ಯಜ್ಯ ವಿದ್ವಾಂಸ್ತದೇವಾಹಮಸ್ಮೀತ್ಯುಪಾಸ್ತೇ ಹ್ಯಜಸ್ರಂ .
ಯದೇವಾಹ ಸರ್ವಾಗಮಾಂತೈಕವೇದ್ಯಂ ನಮಸ್ತೇಽನಿಶಂ ಚಿಂತನೀಯಾಯ ತಸ್ಮೈ ..

ನ ಕೃತ್ಯಾಕೃತೇಃ ಪ್ರತ್ಯವಾಯಃ ಕ್ವಚಿತ್ಸ್ಯಾದಭಾವಾತ್ಕಥಂ ಭಾವ ಉತ್ಪತ್ಸ್ಯತೇಽತಃ .
ಅಹಂ ಪ್ರತ್ಯವಾಯೀತಿ ಕೃತ್ಯಾಕೃತೇ ಸ್ಯಾಮಯಂ ಯಸ್ಯ ಮೋಹಾನ್ನಮಸ್ತೇಽಸ್ತು ತಸ್ಮೈ ..

ಅಧರ್ಮೋಽಯಮೇವಾಯಮೇವಾತ್ರ ಧರ್ಮೋ ಭವೇದಿತ್ಯಯಂ ಮೋಹ ಏವಾಖಿಲಾನಾಂ .
ಯದಜ್ಞಾನಿನಾಂ ಪ್ರತ್ಯವಾಯಪ್ರದಂ ಸ್ಯಾತ್ಕ್ವಚಿನ್ನ ಹ್ಯಭಾವೋ ನಮಸ್ತೇಽಸ್ತು ತಸ್ಮೈ ..

ಅಧರ್ಮಂ ಚ ಹೃತ್ಸ್ಥಂ ವಿಹಾಯ ಪ್ರಶಾಂತಾ ಭಜಂತ್ಯತ್ರ ನೂನಂ ಸ್ವರೂಪಂ ಯದೀಯಂ .
ಸ್ವರೂಪಂ ವಿಚಾರ್ಯಾ ಮೃತೇರಾ ಸುಷುಪ್ತೇರ್ನಮಸ್ತೇಽಸ್ತು ತಸ್ಮೈ ವಿಮುಕ್ತಿಪ್ರದಾಯ ..

ನ ವೈ ಬದ್ಧತಾ ಮುಕ್ತತಾ ವಾ ಕದಾಚಿತ್ಕ್ವಚಿನ್ನಿತ್ಯಮುಕ್ತಸ್ಯ ಕಿಂ ಚಾತ್ಮನೋಽತಃ .
ಬಹಿಶ್ಚೇತಸೋಽನ್ತಶ್ಚ ಗತ್ಯಾಗತೀ ತೇ ನಮಶ್ಚಿತ್ತವಿಕ್ಷೇಪಹರ್ತ್ರೇಽಸ್ತು ತಸ್ಮೈ ..

ಯಥಾ ಕ್ಷೀಣಚಿತ್ತಸ್ತಥೈವಾತ್ಮನಿಷ್ಠಃ ಪುಮಾನ್ನಿತ್ಯಮುಕ್ತೋ ಭವೇದದ್ವಿತೀಯಃ .
ಯಥಾ ಚೇತಸೋಽಕ್ಷೀಣತಾ ಯತ್ಪ್ರಸಾದಾತ್ತಥಾ ತ್ವತ್ಪ್ರಸಾದಾಯ ತಸ್ಮೈ ನಮಸ್ತೇ ..

ಪ್ರಸನ್ನೇ ತ್ವಯಿ ಪ್ರಾಣಿನಾಂ ಕಿನ್ನ ಲಭ್ಯಂ ಪರಸ್ತ್ವತ್ಪ್ರಸಾದಾನ್ನ ಲಾಭೋಽಸ್ತಿ ಕಶ್ಚಿತ್ .
ಬುಧೋಽತೋಽನಿಶಂ ಯತ್ಪ್ರಸಾದಾಭಿಕಾಂಕ್ಷೀ ನಮಸ್ತೇ ಪ್ರಪನ್ನಪ್ರಸನ್ನಾಯ ತಸ್ಮೈ ..

ಪೃಥಿವ್ಯಾದಿಯುಕ್ತಾಽಪರಬ್ರಹ್ಮನಿಷ್ಠಾ ನ ಮುಖ್ಯಾ ಭವಂತ್ಯತ್ರ ಜನ್ಮಾಸ್ತಿ ತೇಷಾಂ .
ನಿರಸ್ತಾಖಿಲೋಪಾಧಿನಿಷ್ಠೋ ಹಿ ಮುಖ್ಯೋ ನ ಯಸ್ಯೇಹ ಜನ್ಮಾಸ್ತಿ ತಸ್ಮೈ ನಮಸ್ತೇ ..

ನ ಮುಖ್ಯಂ ಸುಷುಪ್ತೇರಧಿಷ್ಠಾನತೋಽನ್ಯತ್ಸುಷುಪ್ತೇರಧಿಷ್ಠಾನಮಾತ್ರಂ ಹಿ ಮುಖ್ಯಂ .
ಯದಜ್ಞಾನತೋ ದೃಪ್ತಬಾಲಾಕಿರೇತನ್ನೃಪಾದ್ವೇದ ಚೈವಂ ನಮಸ್ತೇಽಸ್ತು ತಸ್ಮೈ ..

ವಿರಿಂಚಾದಿಲೋಕಾದಿಹಾವೃತ್ತಿರಸ್ತಿ ಕ್ವಚಿಚ್ಚಾತ್ಮಲೋಕಾದನಾವೃತ್ತಿರಸ್ಮಾತ್ .
ಧ್ರುವೋ ಹ್ಯಾತ್ಮಲೋಕೋಽಧ್ರುವಾನಾತ್ಮಲೋಕಾತ್ಪರೋ ಯೋಽಸ್ತಿ ಚೈಕೋ ನಮಸ್ತೇಽಸ್ತು ತಸ್ಮೈ ..

ಪರಂ ವೇದ ಸನ್ಮಾತ್ತ್ರಮುದ್ದಾಲಕೇನ ಸ್ವಪಿತ್ರೋಪದಿಷ್ಟೋ ಯದಾ ಶ್ವೇತಕೇತುಃ .
ಯಮಾತ್ಮಾನಮಾತ್ಮಸ್ಥಮವ್ಯಕ್ತಮೇಕಂ ನಮಸ್ತೇಽನಿಶಂ ಸತ್ಸ್ವರೂಪಾಯ ತಸ್ಮೈ ..

ಭೃಗುರ್ವೇದ ಪಿತ್ರೋಪದಿಷ್ಟೋಽನ್ತರೇವ ಪ್ರಕೃಷ್ಟಃ ಪರಬ್ರಹ್ಮರೂಪಾತ್ಮಲೋಕಂ .
ಅನಂತಾಽದ್ವಯಾನಂದವಿಜ್ಞಾನಸತ್ಯಂ ಯಮೇಕಂ ವಿಶುದ್ಧಾಯ ತಸ್ಮೈ ನಮಸ್ತೇ ..

ವಿಹಾಯೈವ ಕೋಶಾತ್ಪರಂ ಪಂಚ ವೇದ ಸ್ವರೂಪಂ ಯದಾನಂದಕೋಶಸ್ಯ ಪುಚ್ಛಂ .
ಮುಮುಕ್ಷುಃ ಸುಷುಪ್ತೇರಧಿಷ್ಠಾನಮೇಕಂ ಸದಾತ್ಮಸ್ವರೂಪಾಯ ತಸ್ಮೈ ನಮಸ್ತೇ ..

ಅನಂತಾನಿ ಶಾಸ್ತ್ರಾಣ್ಯಧೀತ್ಯಾಪಿ ವಿದ್ವಾನ್ನ ದುಃಖೇತರೋ ನಾರದೋಽನಾತ್ಮವಿತ್ತ್ವಾತ್ .
ಋಷಿರ್ಮಾನಸಾದ್ವೇದ ಯಂ ಶೋಕಹತ್ಯೈ ನಮಸ್ತೇ ಸುಖೌಘಾಯ ತಸ್ಮೈ ವಿಭೂಮ್ನೇ ..

ಋಷೇರ್ಯಾಜ್ಞವಲ್ಕ್ಯಾದ್ವಿದೇಹೋ ಮಹಾತ್ಮಾ ಯದೇವಾಭಯಂ ಬ್ರಹ್ಮ ಸಮ್ಯಗ್ವಿದಿತ್ವಾ .
ಸ್ವಮೇವಾಭಯಂ ತದ್ಧ್ಯಭೂದ್ವೇದವೇದ್ಯಂ ಸಮಸ್ತಾಭಯಾಪ್ಯಾಯ ತಸ್ಮೈ ನಮಸ್ತೇ ..

ವಿದಿತ್ವಾತ್ರ ಭೂಮಾನಮೇನಶ್ಛಿದೇಽಸ್ತಿ ಪ್ರವಾಚ್ಯಂ ಕಿಮು ಪ್ರಾಣವಿತ್ಪಾಪನಾಶೇ .
ಅತಃ ಪ್ರಾಣವಿದ್ಯಾಮನಾದೃತ್ಯ ವಿದ್ವಾನುಪಾಸ್ತೇ ಯಮೀಶಂ ನಮಸ್ತೇಽಸ್ತು ತಸ್ಮೈ ..

ಅಜಸ್ರಾನ್ನದಾನಂ ಪರಿತ್ಯಜ್ಯ ಜಾನಶ್ರುತಿರ್ಹ್ಯೈಕ್ಯಮಭ್ಯಾಗಮದ್ಧಂಸವಾಕ್ಯಾತ್ .
ಸ ವೈ ಪ್ರಾಣವಿತ್ಪ್ರಾಣ ಉತ್ಕರ್ಷವಾಂಸ್ತತ್ಪರೋಽಸ್ಮಾದ್ಯ ಆತ್ಮಾ ನಮಸ್ತೇಽಸ್ತು ತಸ್ಮೈ ..

ರವೀಂದ್ವಗ್ನಿತೇಜೋ ಜಗದ್ಭಾಸಕಶ್ಚೇನ್ನ ತಸ್ಯಾಪಿ ಚಿತ್ಸನ್ನಿಧಾನೇನ ತತ್ಸ್ಯಾತ್ .
ನ ಯತ್ಸನ್ನಿಧಾನಂ ವಿನಾ ಕಿಂಚಿದಸ್ತಿ ಕ್ವಚಿದ್ವಸ್ತು ತಸ್ಮೈ ನಮೋ ಜ್ಯಾತಿಷೇ ಚ ..

ಪರಂ ಜ್ಯೋತಿಷಾಂ ಜ್ಯೋತಿರಾತ್ಮಾಽಽಖ್ಯಮೇತದ್ರವೀಂದ್ವಾದಿಬುದ್ಧ್ಯಾದಿವಿದ್ಯೋತಕಂ ಯತ್ .
ವಿದಿತ್ವೈವ ನೂನಂ ನರೋ ಬ್ರಾಹ್ಮಣಃ ಸ್ಯಾದಮರ್ತ್ಯಶ್ಚ ತಸ್ಮೈ ನಮಃ ಸ್ವಾತ್ಮನೇ ತೇ ..

ಯಥಾಶ್ವತ್ಥವೃಕ್ಷೇ ಸ್ವದೇಹೇ ಚ ತುಲ್ಯಂ ಸ್ವಮೇವಾಬ್ರವೀದ್ವಾಸುದೇವೋಽರ್ಜುನಾಯ ..
ತಥಾ ಯಸ್ಯ ಸಾಮ್ಯಂ ವಿಜಾನಾತಿ ವಿದ್ವಾನ್ನಮಸ್ತೇ ಸಮಸ್ತಾತ್ಮರೂಪಾಯ ತಸ್ಮೈ ..

ದ್ವಿಜೇ ಪುಲ್ಕಸೇ ಹಸ್ತಿನಿ ಸ್ವೇ ಶರೀರೇ ಸಮಃ ಸಾತ್ತ್ವಿಕೇ ರಾಜಸೇ ತಾಮಸೇ ಚ .
ಯ ಆತ್ಮಾ ಗುಣೈಸ್ತೈರಸಂಸ್ಪೃಷ್ಟ ಈಶೋ ನಮಸ್ತೇ ಸದಾ ನಿಷ್ಕಳಂಕಾಯ ತಸ್ಮೈ ..

ಯಮಾಶ್ಚರ್ಯವದ್ವಕ್ತಿ ಕಶ್ಚಿಚ್ಛೃಣೋತಿ ಪ್ರಶಾಂತಸ್ತು ಜಾನಾತಿ ನ ಹ್ಯಪ್ರಶಾಂತಃ .
ವಿದಿತ್ವಾಽಪಿ ಸಾಕ್ಷಾತ್ಕರೋತ್ಯತ್ರ ನಾನ್ಯಶ್ಚಿದಸ್ಮೀತಿ ದೀಕ್ಷ್ಯಾಯ ತಸ್ಮೇ ನಮಸ್ತೇ ..

ಪತೀ ದೇವದೈತ್ಯೌಘಯೋಃ ಪದ್ಮಜಾದ್ಯಂ ಚತುರ್ವಾರಮಾಕರ್ಣಯಂತೌ ತಥಾಽಪಿ .
ನ ಜಾನಾತಿ ಕಶ್ಚಿತ್ತಯೋರ್ವೇದ ಚಾನ್ಯೋ ಹ್ಯತೋ ದುರ್ವಿತರ್ಕ್ಯಾಯ ತಸ್ಮೇ ನಮಸ್ತೇ ..

ಶರೀರೇಂದ್ರಿಯಪ್ರಾಣವಿಜ್ಞಾನಶೂನ್ಯೇಷ್ವಿಹೈಕೈಕಮಾತ್ಮೇತಿ ದೃಪ್ತಾ ವದಂತಿ .
ತಥಾ ಬುದ್ಧಿಸಮ್ಯಗ್ವಿಚಾರಾಸಮರ್ಥಾ ಯದಜ್ಞಾನಮೋಹಾ ಹಿ ತಸ್ಮೈ ನಮಸ್ತೇ ..

ಅನೇಕತ್ವಕರ್ತೃತ್ವಭೋಕ್ತೃತ್ವಧರ್ಮಃ ಸ ಆತ್ಮಾ ವಿಭುಶ್ಚಿದ್ಗುಣಶ್ಚೇತಿ ಕೇಚಿತ್ .
ನ ಕರ್ತೈವ ಭೋಕ್ತಾ ಕ್ವಚಿಚ್ಚೇತಿ ಚಾನ್ಯೇ ಯದಜ್ಞಾ ವದಂತೀಹ ತಸ್ಮೈ ನಮಸ್ತೇ ..

ಅನೇಕಾತ್ಮನಾ ಪ್ರೇರಕೋಽನ್ಯೋ ನ ಹೀಶೋಽಸ್ತ್ವಿತಿ ಪ್ರಾಹುರೇಕೇ ನ ಚಾಸ್ತೀತಿ ಚಾನ್ಯೇ .
ವಿವಾದಾಸ್ಪದಂ ನೈವ ಮಾಯಾ ವಿನಾ ಯನ್ನಮಸ್ತೇಽಸ್ತು ತಸ್ಮೈ ವಿವಾದಾತ್ಪರಾಯ ..

ವಿವಾದೋ ನಿವರ್ತೇತ ಯಸ್ಯ ಪ್ರಸಾದಾತ್ಸ್ವರೂಪಪ್ರಕಾಶೇ ಜಗದ್ಭಾವನಸ್ಯ .
ನಿವೃತ್ತೇ ವಿವಾದೇ ಪುನರ್ನೈವ ಲೋಕೇ ಭ್ರಮಂತ್ಯದ್ವಿತೀಯಾಯ ತಸ್ಮೈ ನಮಸ್ತೇ ..

ವಿಭುಂ ಚಿತ್ತನಿಷ್ಠಂ ಯದಂಗುಷ್ಟಮಾತ್ರಂ ಪುರಾಣಂ ಪುಮಾಂಸಂ ವದಂತ್ಯತ್ರ ವೇದಾಃ .
ಜನಾನಾಂ ಹೃದಂಗುಷ್ಠಮಾತ್ರಂ ಯತೋಽಸ್ಮಾದನಂಗುಷ್ಠಮಾತ್ರಾಯ ತಸ್ಮೇ ನಮಸ್ತೇ ..

ಭ್ರುವೋರ್ಮಧ್ಯಮೇವಾವಿಮುಕ್ತಂ ಮುನೀನಾಂ ಮಹಾಕ್ಷೇತ್ರಮಿತ್ಯತ್ರ ಬುದ್ಧೇಃ ಶ್ರುತಂಚ .
ನ ವಾ ವಾರಣಾಸೀಪುರಂ ಗಂತುಮಿಚ್ಛೇತ್ಸ್ವರೂಪೇ ಸ್ಥಿತೋ ಯಸ್ಯ ತಸ್ಮೈ ನಮಸ್ತೇ ..

ಶರೀರೇ ಯಥಾಽಹಂಮತಿಃ ಸರ್ವಜಂತೋಸ್ತಥಾ ಮುಕ್ತಿಬುದ್ಧಿಶ್ಚ ಕಾಶೀಮೃತೇರ್ವಾ .
ಸ್ವರೂಪಪ್ರಕಾಶಂ ವಿನಾ ಯಸ್ಯ ಮುಕ್ತಿರ್ನ ವೈ ಸಂಭವೇತ್ಕಾಪಿ ತಸ್ಮೈ ನಮಸ್ತೇ ..

ಸ್ವರೂಪಪ್ರಕಾಶೈಕಹೇತುರ್ಹಿ ಯಸ್ಯ ಪ್ರಕೃಷ್ಟಾಗಮಾಂತಾರ್ಥಸಮ್ಯಗ್ವಿಚಾರಃ ..
ಅತೋ ಯತ್ಪ್ರಕಾಶಾಯ ವೇದಾಂತನಿಷ್ಠೋಽನಿಶಂ ಸ್ಯಾದ್ವಿವೇಕೀ ನಮಸ್ತೇಽಸ್ತು ತಸ್ಮೈ ..

ವದಂತಶ್ಚ ರುದ್ರಾದಯೋಽಪ್ಯಾತ್ಮತತ್ತ್ವಂ ನ ಜಾನಂತ್ಯತಃ ಕೇಽಪಿ ವೇದಾಂತನಿಷ್ಠಾಃ .
ತತಸ್ತಾನಿಹೋತ್ಸೃಜ್ಯ ವೇದಾಂತನಿಷ್ಠೋ ಭವೇದ್ಯತ್ಪ್ರಬೋಧಾಯ ತಸ್ಮೈ ನಮಸ್ತೇ ..

ಸುರೇಂದ್ರೋ ವಿದಿತ್ವೈವ ಯಸ್ಯ ಸ್ವರೂಪಂ ಸಮಸ್ತಾದಘಾದ್ವೃತ್ರಹತ್ಯಾದಿರೂಪಾತ್ .
ವಿಮುಕ್ತೋ ಹಿ ವೇದಾಂತನಿಷ್ಠೋ ಮುದಾಽಽಸ್ತೇ ನಿರಸ್ಯಾಭಿಮಾನಂ ನಮಸ್ತೇಽಸ್ತು ತಸ್ಮೈ ..

ಯದೀಯಂ ಸ್ವರೂಪಂ ವಿಚಾರ್ಯೈವ ತಿಷ್ಠನ್ಸದಾ ವಂದನೀಯೋಽಮರೈರಿಂದ್ರಮುಖ್ಯೈಃ .
ವಿಶುದ್ಧೋ ಹ್ಯಯಂ ದೇವವಂದ್ಯತ್ವತೋ ವೈ ನಮಸ್ತೇಽಸ್ತು ತಸ್ಮೈ ವಿಶುದ್ಧಿಪ್ರದಾಯ ..

ಸ್ವಯಂ ಶುದ್ಧ ಏವಾನ್ಯಶುದ್ಧಿಂ ದದಾತಿ ಕ್ವಚಿನ್ನ ಹ್ಯಶುದ್ಧೋಽನ್ಯಶುದ್ಧಿಪ್ರದಃ ಸ್ಯಾತ್ .
ಸ್ಮೃತಃ ಶುದ್ಧಿದಃ ಸರ್ವಜಂತೋರ್ಯ ಆತ್ಮಾ ವಿಶುದ್ಧಃ ಪವಿತ್ರಾಯ ತಸ್ಮೈ ನಮಸ್ತೇ ..

ಸಕೃತ್ಸಂಸ್ಮೃತಶ್ಚೇತ್ಸಮಸ್ತಂ ಚ ಪಾಪಂ ದಹತ್ಯಗ್ನಿವದ್ಯಸ್ತ್ವಿಹಾತ್ಯಂತದೀಪ್ತಃ .
ಚಿದೇವಾಹಮಿತ್ಯೇವ ಬುದ್ಧೌ ಪ್ರವೇಶಸ್ವದೀಪ್ತಿರ್ನಮಸ್ತೇಽಸ್ತು ತಸ್ಮೈ ಮಹಿಮ್ನೇ ..

ನ ಹಿ ಸ್ನಾನದಾನಾದಿನಾ ಪಾಪನಾಶೇ ತು ತತ್ಸಂಸ್ಕೃತಿಃ ಕ್ವಾಪಿ ನಶ್ಯೇತ್ಕದಾಪಿ .
ವಿನಾ ಯತ್ಸ್ಮೃತಿಂ ಸ್ಮೃತ್ಯುಪಾಯಂ ಚ ಮುಕ್ತ್ವಾ ಸ್ಮರತ್ಪಾಪಹಂತ್ರೇ ನಮಸ್ತೇಽಸ್ತು ತಸ್ಮೈ ..

ಅನಾತ್ಮನ್ಯಹಂತಾಭಿಮಾನಂ ನಿರಸ್ಯ ಸ್ವರೂಪಪ್ರಕಾಶಸ್ತತಃ ಸರ್ವಪಾಪಂ .
ನ ಸಂಸ್ಕೃತ್ಯನಾತ್ಮಾಶ್ರಯಂ ಸ್ಯಾದ್ವಿನಷ್ಟಂ ಸ್ಮೃತೇರ್ಯತ್ಪ್ರಕಾಶೇ ತು ತಸ್ಮೈ ನಮಸ್ತೇ ..

ಅನಾಕರ್ಣ್ಯ ವೇದಾಂತಭಾಷ್ಯಂ ಸಮಗ್ರಂ ನ ಕಸ್ಯಪಿ ಯತ್ಸ್ಮೃತ್ಯುಪಾಯೋಽಸ್ತಿ ಕಶ್ಚಿತ್ .
ಅತಸ್ತಚ್ಚಿಕೀರ್ಷಾ ಸ್ವತೋ ಯಸ್ಯ ಜಾತಾ ನಮಸ್ತೇ ದಯಾಳುಸ್ವರೂಪಾಯ ತಸ್ಮೈ ..

ಸಮಸ್ತಾಗಮಾಂತಾನಿಹ ವ್ಯಾಚಿಕೀರ್ಷುಃ ಸ್ವಯಂ ಶಂಕರಾಚಾರ್ಯರೂಪಾವತೀರ್ಣಃ .
ಕೃತವ್ಯಾಸಸೂತ್ರಾದಿಭಾಷ್ಯೋ ಯ ಆತ್ಮಸ್ವರೂಪೈಕ್ಯಧೀದಾಯ ತಸ್ಮೈ ನಮಸ್ತೇ ..

ಚತುರ್ಭಿಃ ಪ್ರಶಾಂತೈಃ ಸ್ವಶಿಷ್ಯೈರ್ಯುತಃ ಸನ್ ಭುವಂ ಪರ್ಯಟನ್ನಾತ್ಮನಿಷ್ಠಾಽಖಿಲಾತ್ಮಾ .
ಸ್ವಭಾಷ್ಯಪ್ರಚಾರಂ ಸದಾ ಕಾರಮನ್ಯೋ ವಿಭಾತ್ಯದ್ವಿತೀಯಾಯ ತಸ್ಮೈ ನಮಸ್ತೇ ..

ವಿರಾಟ್ಸೂತ್ರಮಾಯೇಶತುರ್ಯಸ್ವರೂಪೈಃ ಕ್ರಮಾತ್ತೋಟಕಾಚಾರ್ಯನಾಮಾದಿಸಂಜ್ಞೈಃ .
ಚತುರ್ವ್ಯೂಹವೇಷೈಃ ಸ್ವಶಿಷ್ಯೈರ್ಯುತಾಯಾದ್ವಯಾಯಾತ್ಮನೇ ತೇ ನಮೋ ನಿರ್ಗುಣಾಯ ..

ಅಜಂ ಕರ್ಮಠಂ ವಿಶ್ವರೂಪಂ ವಿದಿತ್ವಾ ತುರೀಯಾಶ್ರಮಂ ಚಾಥ ತಸ್ಮೈ ಪ್ರದಾಯ .
ವ್ಯಧಾದೃಶ್ಯಶೃಂಗಾಶ್ರಮೇ ಶಾರದಾರ್ಚಾಪರಂ ತತ್ತ್ವರಕ್ಷಾಯ ತಸ್ಮೈ ನಮಸ್ತೇ ..

ಯ ಆಚಾರ್ಯಭಾಷ್ಯಾಣ್ಯಧೀತ್ಯೈವ ಭಕ್ತ್ಯಾ ಲಭಂತೇ ನಿಜಾನಂದಮಾತ್ಮಸ್ವರೂಪಂ ..
ಗುರುಸ್ತೈರಯಂ ವಂದ್ಯ ಆತ್ಮಾಽಽತ್ಮವಿದ್ಭಿಸ್ತತಃ ಸರ್ವವಂದ್ಯಾಯ ತಸ್ಮೈ ನಮಸ್ತೇ ..

ನಮಃ ಶಂಕರಾಚಾರ್ಯ ತುಭ್ಯಂ ಪುರಸ್ತಾನ್ನಮಃ ಪೃಷ್ಠತಃ ಪಾರ್ಶ್ವತಶ್ಚಾಧ ಊರ್ಧ್ವಂ .
ನಮಃ ಸರ್ವತಃ ಸರ್ವರೂಪಾಯ ತಸ್ಮೈ ವಿಶುದ್ಧಾತ್ಮನೇ ಬ್ರಹ್ಮಣೇ ತೇ ನಮಸ್ತೇ ..

ಅಹಂ ದೇಹಬುದ್ಧ್ಯಾ ತವೈವಾಸ್ಮಿ ದಾಸೋ ಹ್ಯಹಂ ಜೀವಬುದ್ಧ್ಯಾಽಸ್ಮಿ ತೇಂಽಶೈಕದೇಶಃ .
ತ್ವಮೇವಾಸ್ಮ್ಯಹಂ ತ್ವಾತ್ಮಬುದ್ಧ್ಯಾ ತಥಾಪಿ ಪ್ರಸೀದಾನ್ವಹಂ ದೇಹಬುದ್ಧ್ಯಾ ನಮಸ್ತೇ ..

ಸ ಭಾಷ್ಯಾರ್ಥ ಆಶು ಸ್ಫುರತ್ವಂತಕಾಲೇ ಚಿದಾಭಾಸಚೈತನ್ಯದೃಕ್ತ್ವತ್ಪ್ರಸಾದಾತ್ .
ಗತಿರ್ನಾನ್ಯಥಾ ಮೇ ಸಮಸ್ತಾಪರಾಧಂ ಕ್ಷಮಸ್ವಾಖಿಲಾತ್ಮನ್ನಮಸ್ತೇಽಸ್ತು ನಿತ್ಯಂ ..

ನಮೋ ಭಾಷ್ಯವೃಂದಾಯ ಭಾಷ್ಯೋಪದೇಷ್ಟ್ರೇ ನಮೋ ಭಾಷ್ಯಕೃದ್ಭ್ಯೋ ನಮೋ ಭಾಷ್ಯವಿದ್ಭ್ಯಃ .
ನಮೋ ಭಾಷ್ಯವೃಂದಾರ್ಥಭೂತಾಯ ಭೂಮ್ನೇ ವಿಶುದ್ಧಾತ್ಮನೇ ಬ್ರಹ್ಮಣೇಽಸ್ಮೈ ಪರಸ್ಮೈ ..

ಶತೋರ್ಧ್ವಾಷ್ಟಕಶ್ಲೋಕಮೇತದ್ಭುಜಂಗಪ್ರಯಾತಂ ಪಠೇದ್ಯೋಽತ್ರ ಭಕ್ತ್ಯಾ ತ್ವದೀಯಂ .
ಚಿದಾಭಾಸಚಿದ್ರೂಪಮೇಕಂ ಪದಾಬ್ಜಂ ಸ್ಮರನ್ಸ್ವಸ್ವರೂಪೇಣ ನೂನಂ ರಮೇತ ..

ಭುಜಂಗಪ್ರಯಾತಾರ್ಥಮತ್ಯಂತಭಕ್ತ್ಯಾ ಸಕೃದ್ವಾ ಸ್ಮರೇತ್ಪ್ರತ್ಯಹಂ ಶ್ರೀಗುರೋರ್ಯಃ .
ನಿರಸ್ತಾಂಧಕಾರಃ ಸ ಆನಂದರೂಪಂ ವ್ರಜತ್ಯಚ್ಯುತಂ ತ್ವಾಂ ತ್ವದೀಯಪ್ರಸಾದಾತ್ ..

ಅಹಂ ಬ್ರಹ್ಮ ಭೂತ್ವಾಪಿ ನೇತಿ ಭ್ರಮೋಽಭೂತ್ತದೀಯಸ್ವರೂಪಾವಬೋಧಾಪ್ತುರಾ ಮೇ .
ಗುರೋ ತ್ವತ್ಪ್ರಸಾದಾದ್ವಿಮುಕ್ತೋಽಹಮಸ್ಮಿ ಚಿತಾಭಾಸಚಿದ್ರೂಪ ಆತ್ಮಾ ವಿಶುದ್ಧಃ ..

ಅತೋ ಬುದ್ಧಿಮಾಂಸ್ತ್ವತ್ಪ್ರಸಾದಾಯ ನಿತ್ಯಂ ಭುಜಂಗಪ್ರಯಾತಂ ಪಠೇದ್ವಾ ತದರ್ಥಂ .
ಸ್ಮರೇದ್ವಾ ಗುರೋ ತೇ ಪ್ರಣಮ್ಯೈವ ಭೂಯಶ್ಚಿದಾಭಾಸಚಿದ್ರೂಪಮೇಕಂ ಪರಂ ತತ್ ..

ಮುನೀಂದ್ರೈಃ ಪುರಾಣೈರನುಧ್ಯೇಯಮೀಶಂ ವಿರಿಂಚಾದಿಭಿಃ ಸರ್ವದೇವೈಶ್ಚ ವಂದ್ಯಂ .
ಕಥಂ ತ್ವಾಮಹಂ ಸ್ತೋತುಮಿಚ್ಛನ್ಭವಂತಂ ಕ್ವ ವಾ ಸಾಧಯೇ ನೇಹ ಕಿಂ ಕಿಂ ಮಹೇಶೇ ..

ಕೃಪಾ ತೇ ಕೃಪಾಳೋ ವಿಮುಗ್ಧಂ ವಿಶುದ್ಧಂ ಕರೋತೀಹ ಮೂಕಂ ಚ ವಾಚಾಲಮೀಶಂ .
ಅತಸ್ತ್ವತ್ಕೃಪಾವೈಭವೇನೈವಮೇತತ್ಕೃತಂ ಮೇ ಚಿಕೀರ್ಷಾಖಿಲಾತ್ಮನ್ನಮಸ್ತೇ ..

Ramaswamy Sastry and Vighnesh Ghanapaathi