ವಿಘ್ನೇಶಂ ಪ್ರಣತೋಽಸ್ಮ್ಯಹಂ ಶಿವಸುತಂ ಸಿದ್ಧೀಶ್ವರಂ ದಂತಿನಂ
ಗೌರೀನಿರ್ಮಿತಭಾಸಮಾನವಪುಷಂ ಶ್ವೇತಾರ್ಕಮೂಲಸ್ಥಿತಂ .
ಸರ್ವಾರಂಭಣಪೂಜಿತಂ ದ್ವಿಪಮುಖಂ ದೂರ್ವಾಸಮಿಜ್ಯಾಪ್ರಿಯಂ
ಮೂಲಾಧಾರನಿವಾಸಿನಂ ಚ ಫಣಿನಾ ಬದ್ಧೋದರಂ ಬುದ್ಧಿದಂ ..

ಶ್ವೇತಾಂಭೋರುಹವಾಸಿನೀಪ್ರಿಯಮನಾಃ ವೇಧಾಶ್ಚ ವೇದಾತ್ಮಕಃ
ಶ್ರೀಕಾಂತಸ್ಸ್ಥಿತಿಕಾರಕಃ ಸ್ಮರಪಿತಾ ಕ್ಷೀರಾಬ್ಧಿಶಯ್ಯಾಹಿತಃ .
ಚಂದ್ರಾಲಂಕೃತಮಸ್ತಕೋ ಗಿರಿಜಯಾ ಪೃಕ್ತಾತ್ಮದೇಹಶ್ಶಿವ-
ಸ್ತೇ ಲೋಕತ್ರಯವಂದಿತಾಸ್ತ್ರಿಪುರುಷಾಃ ಕುರ್ಯುರ್ಮಹನ್ಮಂಗಲಂ ..

ಸಂಸಾರಾರ್ಣವತಾರಣೋದ್ಯಮರತಾಃ ಪ್ರಾಪಂಚಿಕಾನಂದಗಾಃ
ಜ್ಞಾನಾಬ್ಧಿಂ ವಿಭುಮಾಶ್ರಯಂತಿ ಚರಮೇ ನಿತ್ಯಂ ಸದಾನಂದದಂ .
ಆಪ್ರತ್ಯೂಷವಿಹಾರಿಣೋ ಗಗನಗಾಃ ನೈಕಾಃ ಮನೋಜ್ಞಾಃ ಸ್ಥಲೀ-
ರ್ವೀಕ್ಷ್ಯಾಂತೇ ಹಿ ನಿಶಾಮುಖೇ ವಸತರುಂ ಗಚ್ಛಂತಿ ಚಂದ್ರದ್ಯುತೌ ..

Ramaswamy Sastry and Vighnesh Ghanapaathi