ಆದಿರೇಷ ಹಿ ಭೂತಾನಾಮಾದಿತ್ಯ ಇತಿ ಸಂಜ್ಞಿತಃ .
ತ್ರೈಲೋಕ್ಯಚಕ್ಷುರೇವಾಽತ್ರ ಪರಮಾತ್ಮಾ ಪ್ರಜಾಪತಿಃ .
ಏಷ ವೈ ಮಂಡಲೇ ಹ್ಯಸ್ಮಿನ್ ಪುರುಷೋ ದೀಪ್ಯತೇ ಮಹಾನ್ .
ಏಷ ವಿಷ್ಣುರಚಿಂತ್ಯಾತ್ಮಾ ಬ್ರಹ್ಮಾ ಚೈಷ ಪಿತಾಮಹಃ .
ರುದ್ರೋ ಮಹೇಂದ್ರೋ ವರುಣ ಆಕಾಶಂ ಪೃಥಿವೀ ಜಲಂ .
ವಾಯುಃ ಶಶಾಂಕಃ ಪರ್ಜನ್ಯೋ ಧನಾಧ್ಯಕ್ಷೋ ವಿಭಾವಸುಃ .
ಯ ಏವ ಮಂಡಲೇ ಹ್ಯಸ್ಮಿನ್ ಪುರುಷೋ ದೀಪ್ಯತೇ ಮಹಾನ್ .
ಏಕಃ ಸಾಕ್ಷಾನ್ಮಹಾದೇವೋ ವೃತ್ರಮಂಡನಿಭಃ ಸದಾ .
ಕಾಲೋ ಹ್ಯೇಷ ಮಹಾಬಾಹುರ್ನಿಬೋಧೋತ್ಪತ್ತಿಲಕ್ಷಣಃ .
ಯ ಏಷ ಮಂಡಲೇ ಹ್ಯಸ್ಮಿಂಸ್ತೇಜೋಭಿಃ ಪೂರಯನ್ ಮಹೀಂ .
ಭ್ರಾಮ್ಯತೇ ಹ್ಯವ್ಯವಚ್ಛಿನ್ನೋ ವಾತೈರ್ಯೋಽಮೃತಲಕ್ಷಣಃ .
ನಾತಃ ಪರತರಂ ಕಿಂಚಿತ್ ತೇಜಸಾ ವಿದ್ಯತೇ ಕ್ವಚಿತ್ .
ಪುಷ್ಣಾತಿ ಸರ್ವಭೂತಾನಿ ಏಷ ಏವ ಸುಧಾಽಮೃತೈಃ .
ಅಂತಃಸ್ಥಾನ್ ಮ್ಲೇಚ್ಛಜಾತೀಯಾಂಸ್ತಿರ್ಯಗ್ಯೋನಿಗತಾನಪಿ .
ಕಾರುಣ್ಯಾತ್ ಸರ್ವಭೂತಾನಿ ಪಾಸಿ ತ್ವಂ ಚ ವಿಭಾವಸೋ .
ಶ್ವಿತ್ರಕುಷ್ಠ್ಯಂಧಬಧಿರಾನ್ ಪಂಗೂಂಶ್ಚಾಽಪಿ ತಥಾ ವಿಭೋ .
ಪ್ರಪನ್ನವತ್ಸಲೋ ದೇವ ಕುರುತೇ ನೀರುಜೋ ಭವಾನ್ .
ಚಕ್ರಮಂಡಲಮಗ್ನಾಂಶ್ಚ ನಿರ್ಧನಾಲ್ಪಾಯುಷಸ್ತಥಾ .
ಪ್ರತ್ಯಕ್ಷದರ್ಶೀ ತ್ವಂ ದೇವ ಸಮುದ್ಧರಸಿ ಲೀಲಯಾ .
ಕಾ ಮೇ ಶಕ್ತಿಃ ಸ್ತವೈಃ ಸ್ತೋತುಮಾರ್ತ್ತೋಽಹಂ ರೋಗಪೀಡಿತಃ .
ಸ್ತೂಯಸೇ ತ್ವಂ ಸದಾ ದೇವೈರ್ಬ್ರಹ್ಮವಿಷ್ಣುಶಿವಾದಿಭಿಃ .
ಮಹೇಂದ್ರಸಿದ್ಧಗಂಧರ್ವೈರಪ್ಸರೋಭಿಃ ಸಗುಹ್ಯಕೈಃ .
ಸ್ತುತಿಭಿಃ ಕಿಂ ಪವಿತ್ರೈರ್ವಾ ತವ ದೇವ ಸಮೀರಿತೈಃ .
ಯಸ್ಯ ತೇ ಋಗ್ಯಜುಃಸಾಮ್ನಾಂ ತ್ರಿತಯಂ ಮಂಡಲಸ್ಥಿತಂ .
ಧ್ಯಾನಿನಾಂ ತ್ವಂ ಪರಂ ಧ್ಯಾನಂ ಮೋಕ್ಷದ್ವಾರಂ ಚ ಮೋಕ್ಷಿಣಾಂ .
ಅನಂತತೇಜಸಾಽಕ್ಷೋಭ್ಯೋ ಹ್ಯಚಿಂತ್ಯಾವ್ಯಕ್ತನಿಷ್ಕಲಃ .
ಯದಯಂ ವ್ಯಾಹೃತಃ ಕಿಂಚಿತ್ ಸ್ತೋತ್ರೇ ಹ್ಯಸ್ಮಿನ್ ಜಗತ್ಪತಿಃ .
ಆರ್ತಿಂ ಭಕ್ತಿಂ ಚ ವಿಜ್ಞಾಯ ತತ್ಸರ್ವಂ ಜ್ಞಾತುಮರ್ಹಸಿ .

Ramaswamy Sastry and Vighnesh Ghanapaathi