ಬ್ರಹ್ಮೋವಾಚ . ಅಥ ವೃತ್ತೇ ವಿವಾಹೇ ತು ಭವಸ್ಯಾಮಿತತೇಜಸಃ .

ಪ್ರಹರ್ಷಮತುಲಂ ಗತ್ವಾ ದೇವಾಃ ಶಕ್ರಪುರೋಗಮಾಃ .

ತುಷ್ಟುವುರ್ವಾಗ್ಭಿರಾದ್ಯಾಭಿಃ ಪ್ರಣೇಮುಸ್ತೇ ಮಹೇಶ್ವರಂ ..

ದೇವಾ ಊಚುಃ . ನಮಃ ಪರ್ವತಲಿಂಗಾಯ ಪರ್ವತೇಶಾಯ ವೈ ನಮಃ .

ನಮಃ ಪವನವೇಗಾಯ ವಿರೂಪಾಯಾಜಿತಾಯ ಚ .

ನಮಃ ಕ್ಲೇಶವಿನಾಶಾಯ ದಾತ್ರೇ ಚ ಶುಭಸಂಪದಾಂ ..

ನಮೋ ನೀಲಶಿಖಂಡಾಯ ಅಂಬಿಕಾಪತಯೇ ನಮಃ .

ನಮಃ ಪವನರೂಪಾಯ ಶತರೂಪಾಯ ವೈ ನಮಃ ..

ನಮೋ ಭೈರವರೂಪಾಯ ವಿರೂಪನಯನಾಯ ಚ .

ನಮಃ ಸಹಸ್ರನೇತ್ರಾಯ ಸಹಸ್ರಚರಣಾಯ ಚ ..

ನಮೋ ದೇವವಯಸ್ಯಾಯ ವೇದಾಂಗಾಯ ನಮೋ ನಮಃ .

ವಿಷ್ಟಂಭನಾಯ ಶಕ್ರಸ್ಯ ಬಾಹ್ವೋರ್ವೇದಾಂಕುರಾಯ ಚ ..

ಚರಾಚರಾಧಿಪತಯೇ ಶಮನಾಯ ನಮೋ ನಮಃ .

ಸಲಿಲಾಶಯಲಿಂಗಾಯ ಯುಗಾಂತಾಯ ನಮೋ ನಮಃ ..

ನಮಃ ಕಪಾಲಮಾಲಾಯ ಕಪಾಲಸೂತ್ರಧಾರಿಣೇ .

ನಮಃ ಕಪಾಲಹಸ್ತಾಯ ದಂಡಿನೇ ಗದಿನೇ ನಮಃ ..

ನಮಸ್ತ್ರೈಲೋಕ್ಯನಾಥಾಯ ಪಶುಲೋಕರತಾಯ ಚ .

ನಮಃ ಖಟ್ವಾಂಗಹಸ್ತಾಯ ಪ್ರಮಥಾರ್ತಿಹರಾಯ ಚ ..

ನಮೋ ಯಜ್ಞಶಿರೋಹಂತ್ರೇ ಕೃಷ್ಣಕೇಶಾಪಹಾರಿಣೇ .

ಭಗನೇತ್ರನಿಪಾತಾಯ ಪೂಷ್ಣೋ ದಂತಹರಾಯ ಚ ..

ನಮಃ ಪಿನಾಕಶೂಲಾಸಿಖಡ್ಗಮುದ್ಗರಧಾರಿಣೇ .

ನಮೋಽಸ್ತು ಕಾಲಕಾಲಾಯ ತೃತೀಯನಯನಾಯ ಚ ..

ಅಂತಕಾಂತಕೃತೇ ಚೈವ ನಮಃ ಪರ್ವತವಾಸಿನೇ .

ಸುವರ್ಣರೇತಸೇ ಚೈವ ನಮಃ ಕುಂಡಲಧಾರಿಣೇ ..

ದೈತ್ಯಾನಾಂ ಯೋಗನಾಶಾಯ ಯೋಗಿನಾಂ ಗುರವೇ ನಮಃ .

ಶಶಾಂಕಾದಿತ್ಯನೇತ್ರಾಯ ಲಲಾಟನಯನಾಯ ಚ ..

ನಮಃ ಶ್ಮಶಾನರತಯೇ ಶ್ಮಶಾನವರದಾಯ ಚ .

ನಮೋ ದೈವತನಾಥಾಯ ತ್ರ್ಯಂಬಕಾಯ ನಮೋ ನಮಃ ..

ಗೃಹಸ್ಥಸಾಧವೇ ನಿತ್ಯಂ ಜಟಿಲೇ ಬ್ರಹ್ಮಚಾರಿಣೇ .

ನಮೋ ಮುಂಡಾರ್ಧಮುಂಡಾಯ ಪಶೂನಾಂ ಪತಯೇ ನಮಃ ..

ಸಲಿಲೇ ತಪ್ಯಮಾನಾಯ ಯೋಗೈಶ್ವರ್ಯಪ್ರದಾಯ ಚ .

ನಮಃ ಶಾಂತಾಯ ದಾಂತಾಯ ಪ್ರಲಯೋತ್ಪತ್ತಿಕಾರಿಣೇ ..

ನಮೋಽನುಗ್ರಹಕರ್ತ್ರೇ ಚ ಸ್ಥಿತಿಕರ್ತ್ರೇ ನಮೋ ನಮಃ .

ನಮೋ ರುದ್ರಾಯ ವಸವ ಆದಿತ್ಯಾಯಾಶ್ವಿನೇ ನಮಃ ..

ನಮಃ ಪಿತ್ರೇಽಥ ಸಾಂಖ್ಯಾಯ ವಿಶ್ವೇದೇವಾಯ ವೈ ನಮಃ .

ನಮಃ ಶರ್ವಾಯ ಉಗ್ರಾಯ ಶಿವಾಯ ವರದಾಯ ಚ ..

ನಮೋ ಭೀಮಾಯ ಸೇನಾನ್ಯೇ ಪಶೂನಾಂ ಪತಯೇ ನಮಃ .

ಶುಚಯೇ ವೈರಿಹಾನಾಯ ಸದ್ಯೋಜಾತಾಯ ವೈ ನಮಃ ..

ಮಹಾದೇವಾಯ ಚಿತ್ರಾಯ ವಿಚಿತ್ರಾಯ ಚ ವೈ ನಮಃ .

ಪ್ರಧಾನಾಯಾಪ್ರಮೇಯಾಯ ಕಾರ್ಯಾಯ ಕಾರಣಾಯ ಚ ..

ಪುರುಷಾಯ ನಮಸ್ತೇಽಸ್ತು ಪುರುಷೇಚ್ಛಾಕರಾಯ ಚ .

ನಮಃ ಪುರುಷಸಂಯೋಗಪ್ರಧಾನಗುಣಕಾರಿಣೇ ..

ಪ್ರವರ್ತಕಾಯ ಪ್ರಕೃತೇಃ ಪುರುಷಸ್ಯ ಚ ಸರ್ವಶಃ .

ಕೃತಾಕೃತಸ್ಯ ಸತ್ಕರ್ತ್ರೇ ಫಲಸಂಯೋಗದಾಯ ಚ ..

ಕಾಲಜ್ಞಾಯ ಚ ಸರ್ವೇಷಾಂ ನಮೋ ನಿಯಮಕಾರಿಣೇ .

ನಮೋ ವೈಷಮ್ಯಕರ್ತ್ರೇ ಚ ಗುಣಾನಾಂ ವೃತ್ತಿದಾಯ ಚ ..

ನಮಸ್ತೇ ದೇವದೇವೇಶ ನಮಸ್ತೇ ಭೂತಭಾವನ .

ಶಿವ ಸೌಮ್ಯಮುಖೋ ದ್ರಷ್ಟುಂ ಭವ ಸೌಮ್ಯೋ ಹಿ ನಃ ಪ್ರಭೋ ..

ಬ್ರಹ್ಮೋವಾಚ . ಏವಂ ಸ ಭಗವಾನ್ ದೇವೋ ಜಗತ್ಪತಿರುಮಾಪತಿಃ .

ಸ್ತೂಯಮಾನಃ ಸುರೈಃ ಸರ್ವೈರಮರಾನಿದಮಬ್ರವೀತ್ ..

ಶ್ರೀಶಂಕರ ಉವಾಚ .

ದ್ರಷ್ಟುಂ ಸುಖಶ್ಚ ಸೌಮ್ಯಶ್ಚ ದೇವಾನಾಮಸ್ಮಿ ಭೋಃ ಸುರಾಃ .

ವರಂ ವರಯತ ಕ್ಷಿಪ್ರಂ ದಾತಾಸ್ಮಿ ತಮಸಂಶಯಂ ..

ಬ್ರಹ್ಮೋವಾಚ .

ತತಸ್ತೇ ಪ್ರಣತಾಃ ಸರ್ವೇ ಸುರಾ ಊಚುಸ್ತ್ರಿಲೋಚನಂ ..

ದೇವಾ ಊಚುಃ .

ತವೈವ ಭಗವನ್ ಹಸ್ತೇ ವರ ಏಷೋಽವತಿಷ್ಠತಾಂ .

ಯದಾ ಕಾರ್ಯಂ ತದಾ ನಸ್ತ್ವಂ ದಾಸ್ಯಸೇ ವರಮೀಪ್ಸಿತಂ ..

ಬ್ರಹ್ಮೋವಾಚ .

ಏವಮಸ್ತ್ವಿತಿ ತಾನ್ ಉಕ್ತ್ವಾ ವಿಸೃಜ್ಯ ಚ ಸುರಾನ್ ಹರಃ .

ಲೋಕಾಂಶ್ಚ ಪ್ರಮಥೈಃ ಸಾರ್ಧಂ ವಿವೇಶ ಭವನಂ ಸ್ವಕಂ ..

ಯಸ್ತು ಹರೋತ್ಸವಮದ್ಭುತಮೇನಂ .

ಗಾಯತಿ ದೈವತವಿಪ್ರಸಮಕ್ಷಂ .

ಸೋಽಪ್ರತಿರೂಪಗಣೇಶಸಮಾನೋ .

ದೇಹವಿಪರ್ಯಯಮೇತ್ಯ ಸುಖೀ ಸ್ಯಾತ್ .

Ramaswamy Sastry and Vighnesh Ghanapaathi