ಅಂತಸ್ಸಮಸ್ತಜಗತಾಂ ಯಮನುಪ್ರವಿಷ್ಟ-
ಮಾಚಕ್ಷತೇ ಮಣಿಗಣೇಷ್ವಿವ ಸೂತ್ರಮಾರ್ಯಾಃ .
ತಂ ಕೇಲಿಕಲ್ಪಿತರಘೂದ್ವಹರೂಪಮಾದ್ಯಂ
ಪಂಕೇರುಹಾಕ್ಷಮನಿಶಂ ಶರಣಂ ಪ್ರಪದ್ಯೇ ..

ಆಮ್ನಾಯಶೈಲಶಿಖರೈಕನಿಕೇತನಾಯ
ವಾಲ್ಮೀಕಿವಾಗ್ಜಲನಿಧಿಪ್ರತಿಬಿಂಬಿತಾಯ .
ಕಾಲಾಂಬುದಾಯ ಕರುಣಾರಸಮೇದುರಾಯ
ಕಸ್ಮೈಚಿದಸ್ತು ಮಮ ಕಾರ್ಮುಕಿಣೇ ಪ್ರಣಾಮಃ ..

ಇಂದುಪ್ರಸಾದಮವತಂಸಯತಾ ತದೀಯಂ
ಚಾಪಂ ಕರೇ ಹುತವಹಂ ವಹತಾ ಹರೇಣ .
ಶಂಕೇ ಜಗತ್ತ್ರಯಮನುಗ್ರಹನಿಗ್ರಹಾಭ್ಯಾಂ
ಸಂಯೋಜ್ಯತೇ ರಘುಪತೇ ಸಮಯಾಂತರೇಷು ..

ಈದೃಗ್ವಿಧಸ್ತ್ವಮಿತಿ ವೇದ ನ ಸೋಽಪಿ ವೇದಃ
ಶಕ್ತೋಽನ್ತಿಕಸ್ಥಿತಮವೇಕ್ಷಿತುಮುತ್ತಮಾಂಗೇ .
ಶ್ರೋತುಂ ಕ್ಷಮಂ ನ ಕುದೃಶೇಕ್ಷಿತುಮಪ್ಯತಸ್ತ್ವಾಂ
ಸರ್ವೇ ವಿದಂತು ಕಥಮೀಶ ಕಥಂ ಸ್ತುವಂತು ..

ಉಷ್ಣಾಂಶುಬಿಂಬಮುದಧಿಸ್ಮಯಘಸ್ಮರಾಸ್ತ್ರ
ಗ್ರಾವಾ ಚ ತುಲ್ಯಮಜನಿಷ್ಟ ಗೃಹಂ ಯಥಾ ತೇ .
ವಾಲ್ಮೀಕಿವಾಗಪಿ ಮದುಕ್ತಿರಪಿ ಪ್ರಭುಂ ತ್ವಾಂ
ದೇವ ಪ್ರಶಂಸತಿ ತಥಾ ಯದಿ ಕೋಽತ್ರ ದೋಷಃ ..

ಊಢಃ ಪುರಾಸಿ ವಿನತಾನ್ವಯಸಂಭವೇನ
ದೇವ ತ್ವಯಾ ಕಿಮಧುನಾಪಿ ತಥಾ ನ ಭಾವ್ಯಂ .
ಪೂರ್ವೇ ಜನಾ ಮಮ ವಿನೇಮುರಸಂಶಯಂ ತ್ವಾಂ
ಜಾನಾಸಿ ರಾಘವ ತದನ್ವಯಸಂಭವಂ ಮಾಂ ..

ಋಕ್ಷಂ ಪ್ಲವಂಗಮಪಿ ರಕ್ಷಸಿ ಚೇನ್ಮಹಾತ್ಮನ್
ವಿಪ್ರೇಷು ಕಿಂ ಪುನರಥಾಪಿ ನ ವಿಶ್ವಸಾಮ .
ಅತ್ರಾಪರಾಧ್ಯತಿ ಕಿಲ ಪ್ರಥಮದ್ವಿತೀಯೌ
ವರ್ಣೌ ತವೌದನತಯಾ ನಿಗಮೋ ವಿವೃಣ್ವನ್ ..

ನೄಣಾಂ ನ ಕೇವಲಮಸಿ ತ್ರಿದಿವೌಕಸಾಂ ತ್ವಂ
ರಾಜಾ ಯಮಾರ್ಕಮರುತೋಽಪಿ ಯತಸ್ತ್ರಸಂತಿ .
ದೀನಸ್ಯ ವಾಙ್ಮಮ ತಥಾ ವಿತತೇ ತವ ಸ್ಯಾತ್
ಕರ್ಣೇ ರಘೂದ್ವಹ ಯತಃ ಕಕುಭೋಽಪಿ ಜಾತಾಃ ..

ಕ್ಲೃಪ್ತಾಮಪಿ ವ್ಯಸನಿನೀಂ ಭವಿತವ್ಯತಾಂ ಮೇ
ನಾಥಾನ್ಯಥಾ ಕುರು ತವ ಪ್ರಭುತಾಂ ದಿದೃಕ್ಷೋಃ .
ಚಕ್ರೇ ಶಿಲಾಪಿ ತರುಣೀ ಭವತಾ ತದಾಸ್ತಾಂ
ಮಾಯಾಪಿ ಯದ್ಧಟಯತೇ ತವ ದುರ್ಘಟಾನಿ ..

ಏಕಂ ಭವಂತಮೃಷಯೋ ವಿದುರದ್ವಿತೀಯಂ
ಜಾನಾಮಿ ಕಾರ್ಮುಕಾಮಹಂ ತು ತವ ದ್ವಿತೀಯಂ .
ಶ್ರುತ್ಯಾಶ್ರಿತಾ ಜಗತಿ ಯದ್ಗುಣಘೋಷಣಾ ಸಾ
ದೂರೀಕರೋತಿ ದುರಿತಾನಿ ಸಮಾಶ್ರಿತಾನಾಂ ..

ಐಶಂ ಶರಾಸಮಚಲೋಪಮಮಿಕ್ಷುವಲ್ಲೀ-
ಭಂಜಂ ಬಭಂಜ ಫಿಲ ಯಸ್ತವ ಬಾಹುದಂಡಃ .
ತಸ್ಯ ತ್ವಶೀತಕರವಂಶವತಂಸ ಶಂಸ
ಕಿಂ ದುಷ್ಕರೋ ಭವತಿ ಮೇ ವಿಧಿಪಾಶಭಂಗಃ ..

ಓಜಸ್ತವ ಪ್ರಹಿತಶೇಷವಿಷಾಗ್ನಿದಗ್ಧೈಃ
ಸ್ಪಷ್ಟಂ ಜಗದ್ಭಿರುಪಲಭ್ಯ ಭಯಾಕುಲಾನಾಂ .
ಗೀತೋಕ್ತಿಭಿಸ್ತ್ವಯಿ ನಿರಸ್ಯ ಮನುಷ್ಯಬುದ್ಧಿಂ
ದೇವ ಸ್ತುತೋಽಸಿ ವಿಧಿವಿಷ್ಣುವೃಷಧ್ಜಾನಾಂ ..

ಔತ್ಕಂಠ್ಯಮಸ್ತಿ ದಶಕಂಠರಿಪೋ ಮಮೈಕಂ
ದ್ರಕ್ಷ್ಯಾಮಿ ತಾವಕಪದಾಂಬುರುಹಂ ಕದೇತಿ .
ಅಪ್ಯೇತಿ ಕರ್ಮ ನಿಖಿಲಂ ಮಮ ಯತ್ರ ದೃಷ್ಟೇ
ಲೀನಾಶ್ಚ ಯತ್ರ ಯತಿಭಿಃ ಸಹ ಮತ್ಕುಲೀನಾಃ ..

ಅಂಭೋನಿಧಾವವಧಿಮತ್ಯವಕೀರ್ಯ ಬಾಣಾನ್
ಕಿಂ ಲಬ್ಧವಾನಸಿ ನನು ಶ್ವಶುರಸ್ತವಾಯಂ .
ಇಷ್ಟಾಪನೇತುಮಥವಾ ಯದಿ ಬಾಣಕಂಡೂ-
ರ್ದೇವಾಯಮಸ್ಯನವಧಿರ್ಮಮ ದೈನ್ಯಸಿಂಧುಃ ..

ಅಶ್ರಾಂತಮರ್ಹತಿ ತುಲಾಮಮೃತಾಂಶುಬಿಂಬಂ
ಭಗ್ನಾಂಬುಜದ್ಯುತಿಮದೇನ ಭವನ್ಮುಖೇನ .
ಅಸ್ಮಾದಭೂದನಲ ಇತ್ಯಕೃತೋಕ್ತಿರೀಶ
ಸತ್ಯಾ ಕಥಂ ಭವತು ಸಾಧುವಿವೇಕಭಾಜಾಂ ..

ಕಲ್ಯಾಣಮಾವಹತು ನಃ ಕಮಲೋದರಶ್ರೀ-
ರಾಸನ್ನವಾನರಭಟೌಘಗೃಹೀತಶೇಷಃ .
ಶ್ಲಿಷ್ಯನ್ ಮುನೀನ್ ಪ್ರಣತದೇವಶಿರಃಕಿರೀಟ-
ದಾಮ್ನಿ ಸ್ಖಲನ್ ದಶರಥಾತ್ಮಜ ತೇ ಕಟಾಕ್ಷಃ ..

ಖಂವಾಯುರಗ್ನಿರುದಕಂ ಪೃಥಿವೀ ಚ ಶಬ್ದಃ
ಸ್ಪರ್ಶಶ್ವ ರೂಪರಸಗಂಧಮಪಿ ತ್ವಮೇವ .
ರಾಮ ಶ್ರಿತಾಶ್ರಯ ವಿಭೋ ದಯಯಾತ್ಮಬಂಧೋ
ಧತ್ಸೇ ವಪುಃ ಶರಶರಾಸಭೃದಬ್ದನೀಲಂ ..

ಗಂಗಾ ಪುನಾತಿ ರಘುಪುಂಗವ ಯತ್ಪ್ರಸೂತಾ
ಯದ್ರೇಣುನಾ ಚ ಪುಪುವೇ ಯಮಿನಃ ಕಲತ್ರಂ .
ತಸ್ಯ ತ್ವದಂಘ್ರಿಕಮಲಸ್ಯ ನಿಷೇವಯಾ ಸ್ಯಾಂ
ಪೂತೋ ಯಥಾ ಪುನರಘೇಽಪಿ ತಥಾ ಪ್ರಸೀದ ..

ಘಂಟಾಘಣಂಘಣಿತಕೋಟಿಶರಾಸನಂ ತೇ
ಲುಂಟಾಕಮಸ್ತು ವಿಪದಾಂ ಮಮ ಲೋಕನಾಥ .
ಜಿಹ್ವಾಲುತಾಂ ವಹತಿ ಯದ್ಭುಜಗೋ ರಿಪೂಣಾ-
ಮುಷ್ಣೈರಸೃಗ್ಭಿರುದರಂಭರಿಣಾ ಶರೇಣ ..

ಪ್ರಾಙ್ಸ್ಯವಾಙ್ಸಿ ಪರೇಶ ತಥಾಸಿ ತಿರ್ಯಕ್
ಬ್ರೂಮಃ ಕಿಮನ್ಯದಖಿಲಾ ಅಪಿ ಜಂತವೋಽಸಿ .
ಏಕಕ್ರಮೇಪಿ ತವ ವಾ ಭುವಿ ನ ಮ್ರಿಯಂತೇ
ಮಂದಸ್ಯ ರಾಘವ ಸಹಸ್ವ ಮಮಾಪರಾಧಂ ..

ಚಂಡಾನಿಲವ್ಯತಿಕರಕ್ಷುಭಿತಾಂಬುವಾಹ-
ದಂಭೋಲಿಪಾತಮಿವ ದಾರುಣಮಂತಕಾಲಂ .
ಸ್ಮೃತ್ವಾಪಿ ಸಂಭವಿನಮುದ್ವಿಜತೇ ನ ಧನ್ಯೋ
ಲಬ್ಧ್ವಾ ಶರಣ್ಯಮನರಣ್ಯಕುಲೇಶ್ವರಂ ತ್ವಾಂ ..

ಛನ್ನಂ ನಿಜಂ ಕುಹನಯಾ ಮೃಗರೂಪಭಾಜೋ
ನಕ್ತಂಚರಸ್ಯ ನ ಕಿಮಾವಿರಕಾರಿ ರೂಪಂ .
ತ್ವತ್ಪತ್ರಿಣಾಪಿ ರಘುವೀರ ಮಮಾದ್ಯ ಮಾಯಾ-
ಗೂಢಸ್ವರೂಪವಿವೃತೌ ತವ ಕಃ ಪ್ರಯಾಸಃ ..

ಜಂತೋಃ ಕಿಲ ತ್ವದಭಿಧಾ ಮಮ ಕರ್ಣಿಕಾಯಾಂ
ಕರ್ಣೇ ಜಪನ್ ಹರತಿ ಕಶ್ಚನ ಪಂಚಕೋಶಾನ್ .
ಇತ್ಯಾಮನಂತಿ ರಘುವೀರ ತತೋ ಭವಂತಂ
ರಾಜಾಧಿರಾಜ ಇತಿ ವಿಶ್ವಸಿಮಃ ಕಥಂ ವಾ ..

ಝಂಕಾರಿಭೃಂಗಕಮಲೋಪಮಿತಂ ಪದಂ ತೇ
ಚಾರುಸ್ತವಪ್ರವಣಚಾರಣಕಿನ್ನರೌಘಂ .
ಜಾನಾಮಿ ರಾಘವ ಜಲಾಶಯವಾಸಯೋಗ್ಯಂ
ಸ್ವೈರಂ ವಸೇತ್ತದಧುನೈವ ಜಲಾಶಯೇ ಮೇ ..

ಜ್ಞಾನೇನ ಮುಕ್ತಿರಿತಿ ನಿಶ್ಚಿತಮಾಗಮಜ್ಞೈ-
ರ್ಜ್ಞಾನಂ ಕ್ವ ಮೇ ಭವತು ದುಸ್ತ್ಯಜವಾಸನಸ್ಯ .
ದೇವಾಭಯಂ ವಿತರ ಕಿಂ ನು ಸಕೃತ್ಪ್ರಪತ್ತ್ಯಾ
ಮಹ್ಯಂ ನ ವಿಸ್ಮರ ಪುರೈವ ಕೃತಾಂ ಪ್ರತಿಜ್ಞಾಂ ..

ಟಂಕಾರಮೀಶ ಭವದೀಯಶರಾಸನಸ್ಯ
ಜ್ಯಾಸ್ಭಾಲನೇನ ಜನಿತಂ ನಿಗಮಂ ಪ್ರತೀಮಃ .
ಯೇನೈವ ರಾಘವ ಭವಾನವಗಮ್ಯ ಮಾಸ-
ತ್ರಾಸಂ ನಿರಸ್ಯ ಸುಖಮಾತನುತೇ ಬುಧಾನಾಂ ..

ಠಾತ್ಕೃತ್ಯ ಮಂಡಲಮಖಂಡಿ ಯದುಷ್ಣಭಾನೋ-
ರ್ದೇವ ತ್ವದಸ್ತ್ರದಲಿತೈರ್ಯುಧಿ ಯಾತುಧಾನೈಃ .
ಶಂಕೇ ತತಸ್ತವ ಪದಂ ವಿದಲಯ್ಯ ವೇಗಾ-
ತ್ತೈರದ್ಭುತಂ ಪ್ರತಿಕೃತಿರ್ವಿದಧೇ ವಧಸ್ಯ ..

ಡಿಂಭಸ್ತವಾಸ್ಮಿ ರಘುವೀರ ತಥಾ ದಯಸ್ವ
ಲಭ್ಯಂ ಯಥಾ ಕುಶಲವತ್ವಮಪಿ ಕ್ಷಿತೌ ಮೇ .
ಕಿಂಚಿನ್ಮನೋ ಮಯಿ ನಿಧೇಹಿ ತವ ಕ್ಷತಂ ಕಿಂ
ವ್ಯರ್ಥಾ ಭವತ್ವಮನಸಂ ಗೃಣತೀ ಶ್ರುತಿಸ್ತ್ವಾಂ ..

ಢಕ್ಕಾಂ ತ್ವದೀಯಯಶಸಾ ಮಧುನಾಪಿ ಶೃಣ್ಮಃ
ಪ್ರಾಚೇತಸಸ್ಯ ಭಣಿತಿಂ ಭರತಾಗ್ರಜನ್ಮನ್ .
ಸತ್ಯೇ ಯಶಸ್ತವ ಶೃಣೋತಿ ಮೃಕಂಡುಸೂನೋ-
ರ್ಧಾತಾಪ್ಯತೋ ಜಗತಿ ಕೋ ಹಿ ಭವಾದೃಶೋಽನ್ಯಃ ..

ತ್ರಾಣಂ ಸಮಸ್ತಜಗತಾಂ ತವ ಕಿಂ ನ ಕಾರ್ಯಂ
ಸಾ ಕಿಂ ನ ತತ್ರ ಕರಣಂ ಕರುಣಾ ತವೈವ .
ಆಖ್ಯಾತಿ ಕಾರ್ಯಕರಣೇ ತವ ನೇತಿ ಯಾ ವಾಙ್-
ಮುಖ್ಯಾ ನ ಸಾ ರಘುಪತೇ ಭವತಿ ಶ್ರುತೀನಾಂ ..

ತತ್ತ್ವಂಪದೇ ಪದಮಸೀತಿ ಚ ಯಾನಿ ದೇವ
ತೇಷಾಂ ಯದಸ್ಮ್ಯಭಿಲಷನ್ನುಪಲಬ್ಧುಮರ್ಥಾನ್ .
ಸೇವೇ ಪದದ್ವಯಮತೋ ಮೃದುಲಂ ನ ವಾದೌ
ಯದ್ದಾರುಣೈರಪಿ ತತೋ ಭವದರ್ಥಲಾಭಃ ..

ಪ್ರೋಥಂ ಯದುದ್ವಹಸಿ ಭೂಮಿವಹೈಕದಂಷ್ಟ್ರಂ
ವಿಶ್ವಪ್ರಭೋ ವಿಘಟಿತಾಭ್ರಘಟಾಃ ಸಟಾ ವಾ .
ರೂಪಂ ತದುದ್ಭಟಮಪಾಸ್ಯ ರುಚಾಸಿ ದಿಷ್ಟ್ಯಾ
ತ್ವಂ ಶಂಬರಾರಿರಪಿ ಕೈತವಶಂಬರಾರಿಃ ..

ದಗ್ಧ್ವಾ ನಿಶಾಚರಪುರೀ ಪ್ರಥಿತಸ್ತವೈಕೋ
ಭಕ್ತೇಷು ದಾನವಪುರತ್ರಿತಯಂ ತಥಾನ್ಯಃ .
ತ್ವಂಚಾಶರಾವ್ಯುರಸಮಸ್ಯಗುಣೈಃ ಪ್ರಭೋ ಮೇ
ಪುರ್ಯಷ್ಟಕಪ್ರಶಮನೇನ ಲಭಸ್ವ ಕೀರ್ತಿಂ ..

ಧತ್ತೇ ಶಿರಾಂಸಿ ದಶ ಯಸ್ಸುಕರೋ ವಧೋಽಸ್ಯ
ಕಿಂ ನ ತ್ವಯಾ ನಿಗಮಗೀತಸಹಸ್ತ್ರಮೂರ್ಧ್ನಾ .
ಮೋಹಂ ಮಮಾಮಿತಪದಂ ಯದಿ ದೇವ ಹನ್ಯಾಃ
ಕೀರ್ತಿಸ್ತದಾ ತವ ಸಹಸ್ರಪದೋ ಬಹುಃ ಸ್ಯಾತ್ ..

ನಮ್ರಸ್ಯ ಮೇ ಭವ ವಿಭೋ ಸ್ವಯಮೇವ ನಾಥೋ
ನಾಥೋ ಭವ ತ್ವಮಿತಿ ಚೋದಯಿತುಂ ಬಿಭೇಮಿ .
ಯೇನ ಸ್ವಸಾ ದಶಮುಖಸ್ಯ ನಿಯೋಜಯಂತೀ
ನಾಥೋ ಭವ ತ್ವಮಿತಿ ನಾಸಿಕಯಾ ವಿಹೀನಾ ..

ಪರ್ಯಾಕುಲೋಽಸ್ಮಿ ಕಿಲ ಪಾತಕಮೇವ ಕುರ್ವನ್
ದೀನಂ ತತಃ ಕರುಣಯಾ ಕುರು ಮಾಮಪಾಪಂ .
ಕರ್ತುಂ ರಘೂದ್ವಹ ನದೀನಮಪಾಪಮುರ್ವ್ಯಾಂ
ಶಕ್ತಸ್ತ್ವಮಿತ್ಯಯಮಪೈತಿ ನ ಲೋಕವಾದಃ ..

ಫಲ್ಗೂನಿ ಯದ್ಯಪಿ ಫಲಾನಿ ನ ಲಿಪ್ಸತೇ ಮೇ
ಚೇತಃ ಪ್ರಭೋ ತದಪಿ ನೋ ಭಜತಿ ಪ್ರಕೃತ್ಯಾ .
ಮೂರ್ತ್ಯಂತರಂ ವ್ರಜವಧೂಜನಮೋಹನಂ ತೇ
ಜಾನಾತಿ ಫಲ್ಗು ನ ಫಲಂ ಭುವಿ ಯತ್ಪ್ರದಾತುಂ ..

ಬರ್ಹಿಶ್ಛದಗ್ರಥಿತಕೇಶಮನರ್ಹವೇಷ-
ಮಾದಾಯ ಗೋಪವನಿತಾಕುಚಕುಂಕುಮಾಂಕಂ .
ಹ್ರೀಣೋ ನ ರಾಘವ ಭವಾನ್ ಯದತಃ ಪ್ರತೀಮಃ
ಪತ್ನ್ಯಾ ಹ್ರಿಯಾ ವಿರಹಿತೋಽಸಿ ಪುರಾ ಶ್ರಿಯೇವ ..

ಭದ್ರಾಯ ಮೇಽಸ್ತು ತವ ರಾಘವ ಬೋಧಮುದ್ರಾ
ವಿದ್ರಾವಯಂತ್ಯಖಿಲಮಾಂತರಮಂಧಕಾರಂ .
ಮಂತ್ರಸ್ಯ ತೇ ಪರಿಪುನಂತಿ ಜಗದ್ಯಥಾಷ-
ಡಷ್ಟಾಕ್ಷರಾಣ್ಯಾಪಿ ತಥೈವ ವಿವೃಣ್ವತೀ ಸಾ ..

ಮಂದಂ ನಿಧೇಹಿ ಹೃದಿ ಮೇ ಭಗವನ್ನಟವ್ಯಾಂ
ಪಾಷಾಣಕಂಟಕಸಹಿಷ್ಣು ಪದಾಂಬುಜಂ ತೇ .
ಅಂಗುಷ್ಠಮಾತ್ರಮಥವಾತ್ರ ನಿಧಾತುಮರ್ಹ-
ಸ್ಯಾಕ್ರಾಂತದುಂದುಭಿತನೂಕಠಿನಾಸ್ಥಿಕೂಟಂ ..

ಯಜ್ಞೇನ ದೇವ ತಪಸಾ ಯದನಾಶಕೇನ
ದಾನೇನ ಚ ದ್ವಿಜಗಣೈರ್ವಿವಿದಿಷ್ಯಸೇ ತ್ವಂ .
ಭಾಗ್ಯೇನ ಮೇ ಜನಿತೃಷಾ ತದಿದಂ ಯತಸ್ತ್ವಾಂ
ಚಾಪೇಷುಭಾಕ್ ಪರಮಬುಧ್ಯತ ಜಾಮದಗ್ನ್ಯಃ ..

ರಮ್ಯೋಜ್ಜ್ವಲಸ್ತವ ಪುರಾ ರಘುವೀರ ದೇಹಃ
ಕಾಮಪ್ರದೋ ಯದಭವತ್ ಕಮಲಾಲಯಾಯೈ .
ಚಿತ್ರಂ ಕಿಮತ್ರ ಚರಣಾಂಬುಜರೇಣುರೇಖಾ
ಕಾಮಂ ದದೌ ನ ಮುನಯೇ ಕಿಮು ಗೌತಮಾಯ ..

ಲಂಕೇಶವಕ್ಷಸಿ ನಿವಿಶ್ಯ ಯಥಾ ಶರಸ್ತೇ
ಮಂದೋದರೀಕುಚತಟೀಮಣಿಹಾರಚೋರಃ .
ಶುದ್ಧೇ ಸತಾಂ ಹೃದಿ ಗತಸ್ತ್ವಮಪಿ ಪ್ರಭೋ ಮೇ
ಚಿತ್ತೇ ತಥಾ ಹರ ಚಿರೋವನತಾಮವಿದ್ಯಾಂ ..

ವಂದೇ ತವಾಂಘ್ರಿಕಮಲಂ ಶ್ವಶುರಂ ಪಯೋಧೇ-
ಸ್ತಾತಂ ಭುವಶ್ಚ ರಘುಪುಂಗವ ರೇಖಯಾ ಯತ್ .
ವಜ್ರಂ ಬಿಭರ್ತಿ ಭಜದಾರ್ತಿಗಿರಿಂ ವಿಭೇತ್ತುಂ
ವಿದ್ಯಾಂ ನತಾಯ ವಿತರೇಯಮಿತಿ ಧ್ವಜಂ ಚ ..

ಶಂಭುಃ ಸ್ವಯಂ ನಿರದಿಶದ್ಗಿರಿಕನ್ಯಕಾಯೈ
ಯನ್ನಾಮ ರಾಮ ತವ ನಾಮಸಹಸ್ರತುಲ್ಯಂ .
ಅರ್ಥಂ ಭವಂತಮಪಿ ತದ್ವಹದೇಕಮೇವ
ಚಿತ್ರಂ ದದಾತಿ ಗೃಣತೇ ಚತುರಃ ಕಿಲಾರ್ಥಾನ್ ..

ಷಟ್ ತೇ ವಿಧಿಪ್ರಭೃತಿಭಿಃ ಸಮವೇಕ್ಷಿತಾನಿ
ಮಂತ್ರಾಕ್ಷರಾಣಿ ಋಷಿಭಿರ್ಮನುವಂಶಕೇತೋ .
ಏಕೇನ ಯಾನಿ ಗುಣಿತಾನ್ಯಪಿ ಮಾನಸೇನ
ಚಿತ್ರಂ ನೃಣಾಂ ತ್ರಿದಶತಾಮುಪಲಂಭಯಂತಿ ..

ಸರ್ಗಸ್ಥಿತಿಪ್ರಲಯಕರ್ಮಸು ಚೋದಯಂತೀ
ಮಾಯಾ ಗುಣತ್ರಯಮಯೀ ಜಗತೋ ಭವಂತಂ .
ಬ್ರಹ್ಮೇತಿ ವಿಷ್ಣುರಿತಿ ರುದ್ರ ಇತಿ ತ್ರಿಧಾ ತೇ
ನಾಮ ಪ್ರಭೋ ದಿಶತಿ ಚಿತ್ರಮಜನ್ಮನೋಽಪಿ ..

ಹಂಸೋಽಸಿ ಮಾನಸಚರೋ ಮಹತಾಂ ಯತಸ್ತ್ವಂ
ಸಂಭಾವ್ಯತೇ ಕೀಲ ತತಸ್ತವ ಪಕ್ಷಪಾತಃ .
ಮಯ್ಯೇನಮರ್ಪಯ ನ ಚೇದ್ರಘುನಂದನ
ಜಿಷ್ಣೋರಪಿ ತ್ರಿಭುವನೇ ಸಮವೇಶ ರಾಮ ..

ಲಕ್ಷ್ಮೀರ್ಯತೋಽಜನಿ ಯಥೈವ ಜಲಾಶಯಾನಾ-
ಮೇಕೋ ರುಷಾ ತವ ತಥಾ ಕೃಪಯಾಪಿ ಕಾರ್ಯಃ .
ಅನ್ಯೋಽಪಿ ಕಶ್ಚಿದಿತಿ ಚೇದಹಮೇವ ವರ್ತೇ
ತಾದೃಗ್ವಿಧಸ್ತಪನವಂಶಮಣೇ ಕಿಮನ್ಯೈಃ ..

ಕ್ಷಂತುಂ ತ್ವಮರ್ಹಸಿ ರಘೂದ್ವಹ ಮೇಽಪರಾಧಾನ್
ಸರ್ವಂಸಹಾ ನನು ವಧೂರಪಿ ತೇ ಪುರಾಣೀ .
ವಾಸಾಲಯಂ ಚ ನನು ಹೃತ್ಕಮಲಂ ಮದೀಯಂ
ಕಾಂತಾಪರಾಪಿ ನ ಹಿ ಕಿಂ ಕಮಲಾಲಯಾ ತೇ ..

Ramaswamy Sastry and Vighnesh Ghanapaathi