ಪದ್ಮಾಧಿರಾಜೇ ಗರುಡಾಧಿರಾಜೇ
ವಿರಿಂಚರಾಜೇ ಸುರರಾಜರಾಜೇ .
ತ್ರೈಲೋಕ್ಯರಾಜೇಽಖಿಲರಾಜರಾಜೇ
ಶ್ರೀರಂಗರಾಜೇ ರಮತಾಂ ಮನೋ ಮೇ ..

ನೀಲಾಬ್ಜವರ್ಣೇ ಭುಜಪೂರ್ಣಕರ್ಣೇ
ಕರ್ಣಾಂತನೇತ್ರೇ ಕಮಲಾಕಲತ್ರೇ .
ಶ್ರೀಮಲ್ಲರಂಗೇ ಜಿತಮಲ್ಲರಂಗೇ
ಶ್ರೀರಂಗರಂಗೇ ರಮತಾಂ ಮನೋ ಮೇ ..

ಲಕ್ಷ್ಮೀನಿವಾಸೇ ಜಗತಾಂ ನಿವಾಸೇ
ಹೃತ್ಪದ್ಮವಾಸೇ ರವಿಬಿಂಬವಾಸೇ .
ಕ್ಷೀರಾಬ್ಧಿವಾಸೇ ಫಣಿಭೋಗವಾಸೇ
ಶ್ರೀರಂಗವಾಸೇ ರಮತಾಂ ಮನೋ ಮೇ ..

ಕುಬೇರಲೀಲೇ ಜಗದೇಕಲೀಲೇ
ಮಂದಾರಮಾಲಾಂಕಿತಚಾರುಫಾಲೇ .
ದೈತ್ಯಾಂತಕಾಲೇಽಖಿಲಲೋಕಮೌಲೇ
ಶ್ರೀರಂಗಲೀಲೇ ರಮತಾಂ ಮನೋ ಮೇ ..

ಅಮೋಘನಿದ್ರೇ ಜಗದೇಕನಿದ್ರೇ
ವಿದೇಹನಿದ್ರೇ ಚ ಸಮುದ್ರನಿದ್ರೇ .
ಶ್ರೀಯೋಗನಿದ್ರೇ ಸುಖಯೋಗನಿದ್ರೇ
ಶ್ರೀರಂಗನಿದ್ರೇ ರಮತಾಂ ಮನೋ ಮೇ ..

ಆನಂದರೂಪೇ ನಿಜಬೋಧರೂಪೇ
ಬ್ರಹ್ಮಸ್ವರೂಪೇ ಕ್ಷಿತಿಮೂರ್ತಿರೂಪೇ .
ವಿಚಿತ್ರರೂಪೇ ರಮಣೀಯರೂಪೇ
ಶ್ರೀರಂಗರೂಪೇ ರಮತಾಂ ಮನೋ ಮೇ ..

ಭಕ್ತಾಕೃತಾರ್ಥೇ ಮುರರಾವಣಾರ್ಥೇ
ಭಕ್ತಸಮರ್ಥೇ ಜಗದೇಕಕೀರ್ತೇ .
ಅನೇಕಮೂರ್ತೇ ರಮಣೀಯಮೂರ್ತೇ
ಶ್ರೀರಂಗಮೂರ್ತೇ ರಮತಾಂ ಮನೋ ಮೇ ..

ಕಂಸಪ್ರಮಾಥೇ ನರಕಪ್ರಮಾಥೇ
ದುಷ್ಟಪ್ರಮಾಥೇ ಜಗತಾಂ ನಿದಾನೇ .
ಅನಾಥನಾಥೇ ಜಗದೇಕನಾಥೇ
ಶ್ರೀರಂಗನಾಥೇ ರಮತಾಂ ಮನೋ ಮೇ ..

ಸುಚಿತ್ರಶಾಯೀ ಜಗದೇಕಶಾಯೀ
ನಂದಾಂಕಶಾಯೀ ಕಮಲಾಂಕಶಾಯೀ .
ಅಂಭೋಧಿಶಾಯೀ ವಟಪತ್ರಶಾಯೀ
ಶ್ರೀರಂಗಶಾಯೀ ರಮತಾಂ ಮನೋ ಮೇ ..

ಸಕಲದುರಿತಹಾರೀ ಭೂಮಿಭಾರಾಪಹಾರೀ
ದಶಮುಖಕುಲಹಾರೀ ದೈತ್ಯದರ್ಪಾಪಹಾರೀ .
ಸುಲಲಿತಕೃತಚಾರೀ ಪಾರಿಜಾತಾಪಹಾರೀ
ತ್ರಿಭುವನಭಯಹಾರೀ ಪ್ರೀಯತಾಂ ಶ್ರೀಮುರಾರಿಃ ..

ರಂಗಸ್ತೋತ್ರಮಿದಂ ಪುಣ್ಯಂ ಪ್ರಾತಃಕಾಲೇ ಪಠೇನ್ನರಃ .
ಕೋಟಿಜನ್ಮಾರ್ಜಿತಂ ಪಾಪಂ ಸ್ಮರಣೇನ ವಿನಶ್ಯತಿ ..

Ramaswamy Sastry and Vighnesh Ghanapaathi