ಅಕ್ಷರಂ ವಾಕ್ಪಥಾತೀತಂ ಋಕ್ಷರಾಜನಿಭಾನನಂ.
ರಕ್ಷತಾದ್ವಾಮ ನಃ ಕಿಂಚಿದುಕ್ಷವಾಹನಮೋಹನಂ.
ಆಕಾಶಕೇಶಮಹಿಷೀಂ ಆಕಾರವಿಜಿತೋರ್ವಶೀಂ.
ಆಶಾಹಿನಜನಧ್ಯೇಯಾಂ ಆಶಾಪಾಲಾರ್ಚಿತಾಂ ನುಮಃ.
ಇಂದ್ರಪ್ರಭೃತಿಗೀರ್ವಾಣವಂದಿತಾಂಘ್ರಿಕುಶೇಶಯಾ.
ಚಂದ್ರಸ್ತನಂಧಯಾಪೀಡಜಾಯಾ ವಿಜಯತೇತರಾಂ.
ಈಶ್ವರೀಂ ಸರ್ವಭೂತಾನಾಂ ಕಃ ಶಿವಾಂ ಸ್ತೋತುಮೀಶ್ವರಃ.
ಚತುರ್ಭಿರಸಮೇತೋ ನಾ ವದನೈರುತಬಾಹುಭಿಃ.
ಉಮಾ ನಾಮಾದಿಮಾ ಭಾಮಾ ವಾಮಾ ಶ್ಯಾಮಾ ವಿಮಾನಮಾ.
ವಿಮಾನಮಾನ್ಯಮಾಯಾ ಮಾ ಭಿಮಾ ರಾಮಾನುಮಾತು ಮಾ.
ಊರುಂ ತಂ ದಕ್ಷಿಣಂ ಮಾತುಃ ಸ್ಮರಾಮಿ ನಿಜಮಾಸನಂ.
ಯಸ್ಮಾದಹಂ ಪರಿಭ್ರಷ್ಟಃ ಕಲ್ಕೀ ಭೂಭುವನಂ ಗತಃ.
ಋಷೀಣಾಂ ಚಕ್ಷುಷೋ ಜ್ಯೋತಿಃ ಬಾಲಾ ಶೈಲಸ್ಯ ಚಕ್ಷುಷಃ.
ಹರಸ್ಯ ಚಕ್ಷುಷಃ ಕಾಂತಾ ಮಾತೋಮಾ ಮಮ ಚಕ್ಷುಷಃ.
ೠಕಾರಂ ವೇಷ್ಟಿತಂ ದ್ವಾಭ್ಯಾಂ ನಾಭ್ಯಾಮುಭಯತೋ ದಿಶಂ.
ಆಕಾರೋ ವಾ ಕ್ಷಮಃ ಪಾತುಂ ಸ ಚಂದ್ರೇಣ ವತಂಸಿತಃ.
ಲೃಕಾರಃ ಶೀತಲಾಪಾಂಗಿ ಕಕಾರೇಣೇವ ಸರ್ವದಾ.
ಶ್ಲಿಷ್ಟ ಏವ ತ್ವಯಾ ಗೌರಿ ಮೇರುಧನ್ವಾ ಪ್ರಯುಜ್ಯಯೇ.
ಲೄಕಾರೋಽಮ್ಬ ತ್ವಯಾ ಬಾಲ್ಯೇ ಕಲಭಾಷಿಣಿ ಭಾಷಿತಃ.
ನಚೇದಯಮಸನ್ವರ್ಣೋ ಗೃಹ್ಯತೇ ಕಥಮಾಗಮೇ.
ಏಣಸ್ತನಂಧಯಾಲೋಕಂ ಏಕಾಂತಾಲೋಚನಾಮೃತಂ.
ಏಕಾಮ್ರನಾಯಕದೃಶೋರ್ಭಾಗ್ಯಂ ವಿಜಯತೇತರಾಂ.
ಐಶ್ವರ್ಯಂ ಕಃ ಪುಮಾನೀಷ್ಟೇ ಗಿರಿಜಾಯಾಃ ಪ್ರಭಾಷಿತುಂ.
ಚಾಮರಗ್ರಾಹಿಣೀ ಯಸ್ಯಾಃ ಸ್ವಯಮಂಭೋಜವಾಸಿನೀ.
ಓಂಕಾರ ಇವ ಶರ್ವಸ್ಯ ಹ್ರೀಂಕಾರಸ್ತವ ವಾಚಕಃ.
ಅನಯೋರಂಬಿಕೇ ಭೇದಂ ಯೋ ನ ವೇದ ಸ ವೇದ ನಾ.
ಔದಾರ್ಯೇ ದೇವತಾ ಧೇನುಃ ಸೌಂದರ್ಯೇ ಮಣಿಪುತ್ರಿಕಾ .
ಸ್ವಯಂ ಶಕ್ತಿರ್ನಗಸುತಾ ತ್ರಿಲೋಕೀ ರಾಜ್ಯಮರ್ಹತಿ.
ಅಂಸಯೋರ್ವಿನತಂ ಸಮ್ಯಗುನ್ನತಂ ಕುಚಕುಂಭಯೋಃ.
ಅಮೃತಂ ಶಂಕರದೃಶೋಃ ಪರಂ ಜಯತಿ ದೈವತಂ.
ಅಃ ಕುಂಠಿತ್ತೋಽಭವದ್ಯೇಷು ತೇಷು ದರ್ಶಿತವಿಕ್ರಮಾ.
ಯಾತುಧಾನೇಷು ಭೀಮೇಷು ಪಾತು ವೋ ಭೀಮಭಾಮಿನೀ.
ಕಮಲಾಸುತೇನ ಯತ್ರಾತ್ ಕೃತಾನಿ ಶೃಂಗಾರತಂತ್ರಸೂತ್ರಾಣಿ.
ಸ್ತೋಕಾನ್ಯಪಿ ಬಹುಲಾರ್ಥಾನ್ಯಗಜಾಹಸಿತಾನಿ ಪಾಂತು ತ್ವಾಂ.
ಖಂ ಭವತೀ ಭೂರ್ಭವತೀ ಪವನೋ ಭವತೀ ಹುತಾಶನೋ ಭವತೀ.
ಸಲಿಲಂ ಚ ದೇವಿ ಭವತೀ ಭವತೀಂ ಹಿತ್ವಾ ನ ಕಿಂಚಿದಪಿ.
ಗಣಪತಯೇ ಸ್ತನಘಟಯೋಃ ಪದಕಮಲೇ ಸಪ್ತಲೋಕಭಕ್ತೇಭ್ಯಃ.
ಅಧರಮಣೌ ತ್ರಿಪುರಜಿತೇ ದಧಾಸಿ ಪೀಯೂಷಮಂಬ ತ್ವಂ.
ಘನಮತಿದಾಯಕವೇಣೀ ವಾಣೀಪತಿಮುಖ್ಯದೇವತಾವಿನುತಾ.
ಪುರರಿಪುಪಾಣಿಗೃಹೀತೀ ಪೂರ್ಣಂ ವಿದಧಾತು ಮೇ ಕಾಮಂ.
ಙತ್ವಂ ವಾದಸ್ಯ ಲಿಪೌ ಮಾತಃ ಕೇನಾಪಿ ಲಿಂಗಭೇದೇನ.
ತ್ವದ್ರೂಪತಾ ಪುರಾರೇಸ್ತದಭಾವೇ ತು ದ್ವಯೋರೈಕ್ಯಂ.
ಚಂಚಲವಿಶಾಲನಯನಾ ತುಂಗಕುಚಾ ಚಂಚರೀಕನೀಲಕಚಾ.
ಪಂಚಮುಖಸ್ಯ ಪುರಂಧ್ರೀ ಜಗತೋಂಽಹಃಸಂಚಯಂ ಹರತು.
ಛತ್ರಗ್ರಹಣನಿಯೋಜ್ಯಾ ದಶಶತನೇತ್ರಸ್ಯ ಭಾಮಿನೀ ಯಸ್ಯಾಃ.
ತಸ್ಯಾಶ್ಚರಣಮುಮಾಯಾ ಭವಾತಪೇ ಕ್ಲಿಶ್ಯತಾಂ ಛತ್ರಂ.
ಜಂಬುಕನಾಯಕನಯನಜ್ಯೋತ್ಸ್ನೇಯಂ ರಂಗಶಾಯಿನೋ ಭಗಿನೀ.
ಅಖಿಲಾನಾಮಂಡಾನಾಮಧಿರಾಜ್ಞೀ ವಿಜಯತೇ ಚಂಡೀ.
ಝಂಕೃತಿಂ ಕರೋತಿ ಚೇನ್ನಮತ್ತಷಟ್ಪದಾವಲೀ
ಯನ್ಮುಖಾಂಬುಜನ್ಮನಾ ಸುಗಂಧಿನಾ ನಿಮಂತ್ರಿತಾ.
ಕರ್ಣಕುಂತಲಭ್ರಮಾದ್ಭವೇನ ನೈವ ವಾರ್ಯತೇ
ಶೈಲಶಕ್ರಪುತ್ರಿಕಾ ಧುನೋತು ಸಾ ಮಮ ಭ್ರಮಂ.
ಞಮಙಣನಾಃ ಸಂಪ್ರೋಕ್ತ್ತಾ ಚಪಕಟತಾಖ್ಯೇಷು ಗೌರಿ ವರ್ಗೇಷು.
ಉತ್ತಮಸಂಜ್ಞಾಃ ಪ್ರಾಜ್ಞೈಃ ನರವರ್ಗೇ ತು ತ್ವದಂಘ್ರಿರತಾಃ.
ಟಂಕೃತಿಮುಖರಿತದಿಕ್ಕಂ ಸಜ್ಯಂ ಬಾಣಾಸನಂ ಕರೇ ದಧತೀ.
ಧ್ಯೇಯಾ ಮಾಯಾ ಶಬರೀ ಶತ್ರುಭಯಂ ತರ್ತುಕಾಮೇನ.
ಠಂಕಮಪೂರ್ವಂ ಲಕ್ಷ್ಮ್ಯಾ ಪ್ರಹಸನ್ಪ್ರವದಸ್ಯಲಂ ತು ವದನಸ್ಯ.
ಪರಿತೋ ಮುನಿಭಿರ್ಗೀತಃ ಪರಿಗ್ರಹೋ ಧೂರ್ಜಟೇರ್ಜಯತಿ.
ಡಮರುಧರೋ ಭಗವಾನಪಿ ಗಾಯತಿ ಯಸ್ಯಾಃ ಶುಭಂ ಗುಣವ್ರಾತಂ.
ತಸ್ಯಾಃ ಶಿಖರಿಸುತಾಯಾ ನಾಕೃತಪುಣ್ಯೋ ಭವೇದ್ವಂದೀ.
ಢಕ್ಕಾದಿವಾದ್ಯಹಸ್ತಪ್ರಮಥಸಮಾರಾಧಿತಶ್ರವಣಯುಗ್ಮಾ.
ಶುಭ್ರಕಿರಣಾರ್ಧಮೌಲೇಃ ಶುದ್ಧಾಂತವಿಲಾಸಿನೀ ಜಯತೀ.
ಣಟಧಾತ್ವರ್ಥೇ ಚತುರೋ ನಾಥೋ ಯಸ್ಯಾಸ್ತರಂಗಿಣೀಧಾರೀ.
ಅಗಪುರುಹೂತಸುತಾ ಸಾ ಕರೋತು ಮೇ ಮಾನಸೇ ನಟನಂ.
ತನುಕಾಂತಿವಿಜಿತಕನಕಾ ತರಣಿಃ ಸಂಸಾರಧೋರಜಲರಾಶೇಃ.
ತರುಣಾರುಣಾಭಚರಣಾ ತನೋತು ಮೇ ಗಿರಿಸುತಾ ಕ್ಷೇಮಂ.
ಥಸ್ಯೇವ ಯಸ್ಯ ನಾಸ್ತಿ ಪ್ರಾರಂಭೋ ಯೇನ ನ ದ್ವಿತೀಯತ್ವಂ.
ತಸ್ಯ ಗೃಣಂತ್ಯಕ್ಷರತಾ ಯಸ್ಮಿನ್ನಪಿ ತನ್ಮಹೋ ಜಯತಿ.
ದರಹಸಿತದ್ವಿಗುಣೀಕೃತಮುಖಕಾಂತಿರ್ಜಯತಿ ಪುರಜಿತಃ ಕಾಂತಾ.
ನಯನೋನ್ಮೇಷವಿಲಾಸೋ ಯಸ್ಯಾಃ ಸಕಲಾನಿ ಭುವನಾನಿ.
ಧರಣೀಧರಸ್ಯ ದುಹಿತಾ ಧರಣೀಧರವಾಸಿನೋ ವಧೂರ್ದಯಿತಾ.
ಧರಣೀವಿಟಸ್ಯ ಭಗಿನೀ ಧರಣೀಮೇತಾಮುಮಾ ಪಾತು.
ನಗಜೇ ಪಾಯಂ ಪಾಯಂ ಲಾವಣ್ಯಸುಧಾಂ ತ್ವದೀಯಗಾತ್ರಸ್ಯ.
ನಯನಾಂಜಲಿನಾ ಶೂಲೀ ಬಭೂವ ಮೃತ್ಯುಂಜಯೋ ಮನ್ಯೇ.
ಪತಿರುಗ್ರದೃಷ್ಟಿರುಗ್ರೋ ಯುವರಾಜೋಽಯಂ ಸದಾ ಮದೋಪೇತಃ.
ತವ ರಾಜ್ಞಿ ನ ಕರುಣಾ ಚೇದ್ ಭುವನಸ್ಯ ಕಥಂ ಶುಭಂ ಭವತು.
ಫಲಿತಂ ಮಮಾಂಬ ಸುಕೃತಂ ಕಾಲೇನೈತಾವತಾ ನ ಸಂದೇಹಃ.
ಯದ್ ಭವದೀಯಂ ಸ್ತೋತ್ರಂ ಪವಿತ್ರಮೀಶಾನಿ ರಚಯಾಮಿ.
ಬಲಿಭಿರ್ನಿಪೀಡ್ಯಮಾನಾನಬಲಾನ್ ಪಾತುಂ ಗೃಹೀತಜನನಾಯ.
ಬಲಮಂಬ ದೇಹಿ ಮಹ್ಯಂ ಬಲಿಮೇತತ್ಕಲ್ಪಯಾಮಿ ಮನಃ.
ಭವದೀಯಸ್ಯ ಮಹೇಶ್ವರಿ ಕಟಾಕ್ಷನಾಮ್ನೋ ನವಸ್ಯ ಮೇಧಸ್ಯ.
ಪ್ರಾವೃಷಮಹಮಾಶಂಕೇ ಕರುಣಾಂ ಕಲ್ಯಾಣತೋಯಮುಚಃ.
ಮತಿರಹಿತಃ ಸ್ತುವಸಿ ತ್ವಂ ಯಂ ಕಂಚನ ಧನಪಿಶಾಚಿಕಾವಿಷ್ಟಂ.
ಇಷ್ಟಂ ಚ ನೈವ ಲಭಸೇ ಪಶ್ಯ ಜಗನ್ಮಾತರಂ ಸ್ತುತ್ವಾ.
ಯಮಿನಾಂ ಸ್ಮರ್ತುಂ ಯೋಗ್ಯಂ ನಿಗಮಾಗಮವಾಕ್ಯಸಂಚಯೈರ್ಮೃಗ್ಯಂ.
ಮೂರ್ತಂ ಲೋಚನಭಾಗ್ಯಂ ಪುರಾಮರೇರ್ಜಯತಿ ನೀಪವನೇ.
ರಥಚರಣಪಾಣಿಭಗಿನೀ ದಾನವದಮನೀ ನಮದ್ವಿಪಚ್ಛಮನೀ.
ಭುವನತ್ರಯಸ್ಯ ಜನನೀ ವಿಂಧ್ಯೇ ಧರಣೀಧರೇ ಜಯತಿ.
ಲಲನಾಜನಪ್ರಕಾಂಡಂ ಕಲನಾದಪರಾಸ್ತಬಾಲಕಲಕಂಠಂ.
ಪುರವೈರಿಣಃ ಕಲತ್ರಂ ಮುರವೈರಿ ಸಮರ್ಚಿತಂ ಭಜ ರೇ.
ವಂದ್ಯಮುಮಾಪದಕಮಲಂ ನಿಂದ್ಯಮಿದಂ ಸಂಗಕಾರಣಸದನಂ.
ವಯಸಿ ಸಕಲೇಽಪ್ಯತೀತೇ ನಯಸಿ ಮುಧಾ ಮುಗ್ಧ ಕಿಂ ಕಾಲಂ.
ಶಂಬರಶಾತ್ರವಶಾತ್ರವಕಲತ್ರಪದಮಿತ್ರಮಹಮಹೋ ಧನ್ಯಃ.
ಭೂಮಂಡಲೇ ವಿಶಾಲೇ ಸದೃಶಃ ಪುರುಷೋ ಮಯಾ ಕೋಽನ್ಯಃ.
ಷಡ್ವದನಸ್ಯ ಸವಿತ್ರೀ ಷಣ್ಣಾಂ ಹಂತ್ರೀ ಮನಃ ಸಪತ್ರಾನಾಂ.
ಷಡ್ಭಿರ್ಗಮ್ಯಂ ಮಾರ್ಗೈರ್ಭರ್ಗಸ್ಯ ಪುರಂಧ್ರಿಕಾಸ್ಥಾನಂ.
ಸರ್ವತ್ರ ಸಂಗಮುಕ್ತೋ ಗರ್ವವಿಯುಕ್ತಃ ಸ್ವತಂತ್ರಸಂಚಾರಃ.
ನಿರ್ವರ್ಣಯನ್ ಕದಾ ವಾ ಶರ್ವವಧೂಧಾಮ ವಿಹರಾಮಿ.
ಹರಿಮುಖವಂದಿತಚರಣಾ ಹರಿಣಾಂಕಮದಾಪಹಾಸ್ಯರಜೀವಾ.
ಹರಿಣಸ್ತನಂಧಯಾಕ್ಷಿ ಹರಿನಾಯಕವಾಹನಾ ಜಯತಿ.
ಕ್ಷತ್ರಿಯಾಂತಕಾರಿಣಃ ಪ್ರಸೂತ್ವಮೇವ ಕೇವಲಂ
ನಾಪ ಕಾಽಪಿ ಯತ್ಕಲಾ ಮಮಾಪಿ ಮಾತೃತಾಮಗಾತ್.
ದುಷ್ಟಲೋಕಮಾರಿಣೀ ನೃಸಿಂಹಶಕ್ತಿರೂಪಿಣೀ
ಧೂರ್ಜಟೇರ್ವಧೂಟಿಕಾ ಧುನೋತು ಸಾ ಮದಾಪದಂ.

Ramaswamy Sastry and Vighnesh Ghanapaathi