ನ್ಯಂಕಾವರಾತಿಭಯಶಂಕಾಕುಲೇ ಧೃತದೃಗಂಕಾಯತಿಃ ಪ್ರಣಮತಾಂ
ಶಂಕಾಕಲಂಕಯುತಪಂಕಾಯತಾಶ್ಮಶಿತಟಂಕಾಯಿತಸ್ವಚರಿತಾ.
ತ್ವಂ ಕಾಲದೇಶಪದಶಂಕಾತಿಪಾತಿಪತಿಸಂಕಾಶ ವೈಭವಯುತಾ
ಶಂ ಕಾಮಮಾತರನಿಶಂ ಕಾಮನೀಯಮಿಹ ಸಂಕಾಶಯಾಶು ಕೃಪಯಾ.
ಆಚಾಂತರಂಗದಲಿಮೋಚಾಂತರಂಗರುಚಿವಾಚಾಂ ತರಂಗಗತಿಭಿಃ
ಕಾಚಾಟನಾಯ ಕಟುವಾಚಾಟಭಾವಯುತನೀಚಾಟನಂ ನ ಕಲಯೇ.
ವಾಚಾಮಗೋಚರಸದಾಚಾರಸೂರಿಜನತಾಚಾತುರೀವಿವೃತಯೇ
ಪ್ರಾಚಾಂ ಗತಿಂ ಕುಶಲವಾಚಾಂ ಜಗಜ್ಜನನಿ ಯಾಚಾಮಿ ದೇವಿ ಭವತೀಂ.
ಚೇಟೀಕೃತಾಮರವಧೂಟೀಕರಾಗ್ರಧೃತಪೇಟೀಪುಟಾರ್ಘ್ಯಸುಮನೋ-
ವೀಟೀದಲಕ್ರಮುಕಪಾಟೀರಪಂಕನವಶಾಟೀಕೃತಾಂಗರಚನಾ.
ಖೇಟೀಕಮಾನಶತಕೋಟೀಕರಾಬ್ಜಜಜಟಾಟೀರವಂದಿತಪದಾ
ಯಾ ಟೀಕತೇಽಬ್ಜವನಮಾಟೀಕತಾಂ ಹೃದಯವಾಟೀಮತೀವ ಕಮಲಾ.
ಸ್ವಾಂತಾಂತರಾಲಕೃತಕಾಂತಾಗಮಾಂತಶತಶಾಂತಾಂತರಾಘನಿಕರಾಃ
ಶಾಂತಾರ್ಥಕಾಂತವಕೃತಾಂತಾ ಭಜಂತಿ ಹೃದಿ ದಾಂತಾ ದುರಂತತಪಸಾ.
ಯಾಂ ತಾನತಾಪಭವತಾಂತಾತಿಭೀತಜಗತಾಂ ತಾಪನೋದನಪಟುಂ
ಮಾಂ ತಾರಯತ್ವಶುಭಕಾಂತಾರತೋಽದ್ಯ ಹರಿಕಾಂತಾಕಟಾಕ್ಷಲಹರೀ.
ಯಾಂ ಭಾವುಕಾ ಮನಸಿ ಸಂಭಾವಯಂತಿ ಭವಸಂಭಾವನಾಪಹೃತಯೇ
ತ್ವಂ ಭಾಸಿ ಲಕ್ಷ್ಮಿ ಸತತಂ ಭಾವ್ಯಯದ್ಭವನಸಂಭಾವನಾದಿವಿಧಯೇ.
ಜಂಭಾರಿಸಂಪದುಪಲಂಭಾದಿಕಾರಣಮಹಂ ಭಾವ್ಯಮಂಘ್ರಿಯುಗಲಂ
ಸಂಭಾವಯೇ ಶ್ರುತಿಷು ಸಂಭಾಷಿತಂ ವಚಸಿ ಸಂಭಾಷ್ಯ ತಸ್ಯ ತವ ಚ.
ದೂರಾವಧೂತಮಧುಧಾರಾಗಿರೋಚ್ಚಕುಚಭಾರಾನತಾಂಗಲತಿಕಾ-
ಸಾರಾಂಗಲಿಪ್ತಘನಸಾರಾರ್ದ್ರಕುಂಕುಮರಸಾ ರಾಜಹಂಸಗಮನಾ.
ವೈರಾಕರಸ್ಮರವಿಕಾರಾಪಸಂಸರಣವಾರಾಶಿಮಗ್ರಮನಸಃ
ಶ್ರೀರಾವಿರಸ್ತು ಧುರಿ ತಾರಾಯ ಮೇ ಗುರುಭಿರಾರಧಿತಾ ಭಗವತೀ.
ಶ್ರೀವಾಸಧೂಪಕನದಾವಾಸದೀಪರುಚಿರಾವಾಸಭೂಪರಿಸರಾ
ಶ್ರೀವಾಸದೇಶಲಸದಾವಾಪಕಾಶರದಭಾವಾಭಕೇಶನಿಕರಾ.
ಶ್ರೀವಾಸುದೇವರಮಣೀ ವಾಮದೇವವಿಧಿದೇವಾಧಿಪಾವನಪರಾ
ಶ್ರೀವಾಸವಸ್ತುನರದೇವಾಹತಸ್ತುತಿಸಭಾವಾ ಮುದೇಽಸ್ತು ಸುತರಾಂ.
ಭಾಷಾದಿದೇವಕುಲಯೋಷಾಮಣಿಸ್ತವನಘೋಷಾಂಚಿತಸ್ವಸವಿಧಾ
ದೋಷಾಕುಲೇ ಜಗತಿ ಪೋಷಾಕುಲಾ ಸಪದಿ ಶೇಷಾಹಿ ಶಾಯಿದಯಿತಾ.
ದೋಷಾಲಯಸ್ಯ ಮಮ ದೋಷಾನಪೋಹ್ಯ ಗತದೋಷಾಭಿನಂದ್ಯಮಹಿಮಾ
ಶೇಷಾಶನಾಹಿರಿಪುಶೇಷಾದಿಸಂಪದ ವಿಶೇಷಾಂ ದದಾತು ವಿಭವಾನ್.