ಸೂತ ಉವಾಚ.
ವಕ್ಷ್ಯೇಽಹಮಚ್ಯುತಸ್ತೋತ್ರಂ ಶೃಣು ಶೌನಕ ಸರ್ವದಂ .
ಬ್ರಹ್ಮಾ ಪೃಷ್ಟೋ ನಾರದಾಯ ಯಥೋವಾಚ ತಥಾಪರಂ.
ನಾರದ ಉವಾಚ.
ಯಥಾಕ್ಷಯೋಽವ್ಯಯೋ ವಿಷ್ಣುಃ ಸ್ತೋತವ್ಯೋ ವರದೋ ಮಯಾ.
ಪ್ರತ್ಯಹಂ ಚಾರ್ಚನಾಕಾಲೇ ತಥಾ ತ್ವಂ ವಕ್ತುಮರ್ಹಸಿ.
ತೇ ಧನ್ಯಾಸ್ತೇ ಸುಜನ್ಮಾನಸ್ತೇ ಹಿ ಸರ್ವಸುಖಪ್ರದಾಃ.
ಸಫಲಂ ಜೀವಿತಂ ತೇಷಾಂ ಯೇ ಸ್ತುವಂತಿ ಸದಾಚ್ಯುತಂ.
ಬ್ರಹ್ಮೋವಾಚ.
ಮುನೇ ಸ್ತೋತ್ರಂ ಪ್ರವಕ್ಷ್ಯಾಮಿಃ ವಾಸುದೇವಸ್ಯ ಮುಕ್ತಿದಂ.
ಶೃಣು ಯೇನ ಸ್ತುತಃ ಸಮ್ಯಕ್ಪೂಜಾಕಾಲೇ ಪ್ರಸೀದತಿ.
ಓಂ ನಮೋ ಭಗವತೇ ವಾಸುದೇವಾಯ ನಮಃ ಸರ್ವಪಾಪಹಾರಿಣೇ.
ನಮೋ ವಿಶುದ್ಧದೇಹಾಯ ನಮೋ ಜ್ಞಾನಸ್ವರೂಪಿಣೇ.
ನಮಃ ಸರ್ವಸುರೇಶಾಯ ನಮಃ ಶ್ರೀವತ್ಸಧಾರಿಣೇ.
ನಮಶ್ಚರ್ಮಾಸಿಹಸ್ತಾಯ ನಮಃ ಪಂಕಜಮಾಲಿನೇ.
ನಮೋ ವಿಶ್ವಪ್ರತಿಷ್ಠಾಯ ನಮಃ ಪೀತಾಂಬರಾಯ ಚ.
ನಮೋ ನೃಸಿಂಹರೂಪಾಯ ವೈಕುಂಠಾಯ ನಮೋ ನಮಃ.
ನಮಃ ಪಂಕಜನಾಭಾಯ ನಮಃ ಕ್ಷೀರೋದಶಾಯಿನೇ.
ನಮಃ ಸಹಸ್ರಶೀರ್ಷಾಯ ನಮೋ ನಾಗಾಂಗಶಾಯಿನೇ.
ನಮಃ ಪರಶುಹಸ್ತಾಯ ನಮಃ ಕ್ಷತ್ತ್ರಾಂತಕಾರಿಣೇ.
ನಮಃ ಸತ್ಯಪ್ರತಿಜ್ಞಾಯ ಹ್ಯಜಿತಾಯ ನಮೋ ನಮಃ.
ನಮಸ್ತ್ರೈ ಲೋಕ್ಯನಾಥಾಯ ನಮಶ್ಚಕ್ರಧಾರಯ ಚ.
ನಮಃ ಶಿವಾಯ ಸೂಕ್ಷ್ಮಾಯ ಪುರಾಣಾಯ ನಮೋ ನಮಃ.
ನಮೋ ವಾಮನರೂಪಾಯ ಬಲಿರಾಜ್ಯಾಪಹಾರಿಣೇ.
ನಮೋ ಯಜ್ಞವರಾಹಾಯ ಗೋವಿಂದಾಯ ನಮೋ ನಮಃ.
ನಮಸ್ತೇ ಪರಮಾನಂದ ನಮಸ್ತೇ ಪರಮಾಕ್ಷರ.
ನಮಸ್ತೇ ಜ್ಞಾನಸದ್ಭಾವ ನಮಸ್ತೇ ಜ್ಞಾನದಾಯಕ.
ನಮಸ್ತೇ ಪರಮಾದ್ವೈತ ನಮಸ್ತೇ ಪುರುಷೋತ್ತಮ.
ನಮಸ್ತೇ ವಿಶ್ವಕೃದ್ದೇವ ನಮಸ್ತೇ ವಿಶ್ವಭಾವನ.
ನಮಸ್ತೇಽಸ್ತು ವಿಶ್ವನಾಥ ನಮಸ್ತೇ ವಿಶ್ವಕಾರಣ.
ನಮಸ್ತೇ ಮಧುದೈತ್ಯಘ್ನ ನಮಸ್ತೇ ರಾವಣಾಂತಕ.
ನಮಸ್ತೇ ಕಂಸಕೇಶಿಘ್ನ ನಮಸ್ತೇ ಕೈಟಭಾರ್ದನ.
ನಮಸ್ತೇ ಶತಪತ್ರಾಕ್ಷ ನಮಸ್ತೇ ಗರುಡಧ್ವಜ.
ನಮಸ್ತೇ ಕಾಲನೇಮಿಘ್ನ ನಮಸ್ತೇ ಗರುಡಾಸನ.
ನಮಸ್ತೇ ದೇವಕೀಪುತ್ರ ನಮಸ್ತೇ ವೃಷ್ಣಿನಂದನ.
ನಮಸ್ತೇ ರುಕ್ಮಿಣೀಕಾಂತ ನಮಸ್ತೇ ದಿತಿನಂದನ.
ನಮಸ್ತೇ ಗೋಕುಲಾವಾಸ ನಮಸ್ತೇ ಗೋಕುಲಪ್ರಿಯ.
ಜಯ ಗೋಪವಪುಃ ಕೃಷ್ಣ ಜಯ ಗೋಪೀಜನಪ್ರಿಯ.
ಜಯ ಗೋವರ್ಧನಾಧಾರ ಜಯ ಗೋಕುಲವರ್ಧನ.
ಜಯ ರಾವಣವೀರಘ್ನ ಜಯ ಚಾಣೂರನಾಶನ.
ಜಯ ವೃಷ್ಣಿಕುಲೋದ್ದ್ಯೋತ ಜಯ ಕಾಲೀಯಮರ್ದನ.
ಜಯ ಸತ್ಯ ಜಗತ್ಸಾಕ್ಷಿನ್ಜಯ ಸರ್ವಾರ್ಥಸಾಧಕ.
ಜಯ ವೇದಾಂತವಿದ್ವೇದ್ಯ ಜಯ ಸರ್ವದ ಮಾಧವ.
ಜಯ ಸರ್ವಾಶ್ರಯಾವ್ಯಕ್ತ ಜಯ ಸರ್ವಗ ಮಾಧವ.
ಜಯ ಸೂಕ್ಷ್ಮಚಿದಾಂದನ ಜಯ ಚಿತ್ತನಿರಂಜನ.
ಜಯಸ್ತೇಽಸ್ತು ನಿರಾಲಂಬ ಜಯ ಶಾಂತ ಸನಾತನ.
ಜಯ ನಾಥ ಜಗತ್ಪುಷ್ಟ ಜಯ ವಿಷ್ಣೋ ನಮೋಽಸ್ತೂತೇ.
ತ್ವಂ ಗುರುಸ್ತ್ವಂ ಹರೇ ಶಿಷ್ಯಸ್ತ್ವಂ ದೀಕ್ಷಾಮಂತ್ರಮಂಡಲಂ.
ತ್ವಂ ನ್ಯಾಸಮುದ್ರಾಸಮಯಾಸ್ತ್ವಂ ಚ ಪುಷ್ಪಾದಿಸಾಧನಂ.
ತ್ವಮಾಧಾರಸ್ತ್ವ ಹ್ಯನಂತಸ್ತ್ವಂ ಕೂರ್ಮಸ್ತ್ವಂ ಧರಾಂಬುಜಂ.
ಧರ್ಮಜ್ಞಾನಾದಯಸ್ತ್ವಂ ಹಿ ವೇದಿಮಂಡಲಶಕ್ತಯಃ.
ತ್ವಂ ಪ್ರಭೋ ಛಲಭೃದ್ರಾಮಸ್ತ್ವಂ ಪುನಃ ಸ ಖರಾಂತಕಃ.
ತ್ವಂ ಬ್ರಹ್ಮರ್ಷಿಶ್ಚದೇವಸ್ತ್ವಂ ವಿಷ್ಣುಃ ಸತ್ಯಪರಾಕ್ರಮಃ.
ತ್ವಂ ನೃಸಿಂಹಃ ಪರಾನಂದೋ ವರಾಹಸ್ತ್ವಂ ಧರಾಧರಃ.
ತ್ವಂ ಸುಪರ್ಣಸ್ತಥಾ ಚಕ್ರಂ ತ್ವಂ ಗದಾ ಶಂಖ ಏವ ಚ.
ತ್ವಂ ಶ್ರೀಃ ಪ್ರಭೋ ತ್ವಂ ಮುಷ್ಟಿಸತ್ವಂ ತ್ವಂ ಮಾಲಾ ದೇವ ಶಾಶ್ವತೀ.
ಶ್ರೀವತ್ಸಃ ಕೌಸ್ತುಭಸ್ತ್ವಂ ಹಿ ಶಾರ್ಙ್ಗೀ ತ್ವಂ ಚ ತಥೇಷುಧಿಃ.
ತ್ವಂ ಖಡ್ಗಚರ್ಮಣಾ ಸಾರ್ಧಂ ತ್ವಂ ದಿಕ್ಪಾಲಾಸ್ತಥಾ ಪ್ರಭೋ.
ತ್ವಂ ವೇಧಾಸ್ತ್ವಂ ವಿಧಾತಾ ಚ ತ್ವಂ ಯಮಸ್ತ್ವಂ ಹುತಾಶನಃ.
ತ್ವಂ ಧನೇಶಸ್ತ್ವಮೀಶಾನಸ್ತ್ವಮಿಂದ್ರಸ್ತ್ವಮಪಾಂ ಪತಿಃ.
ತ್ವಂ ರಕ್ಷೋಽಧಿಪತಿಃ ಸಾಧ್ಯಸ್ತ್ವಂ ವಾಯುಸ್ತ್ವಂ ನಿಶಾಕರಃ.
ಆದಿತ್ಯಾ ವಸವೋ ರುದ್ರಾ ಅಶ್ವಿನೌ ತ್ವಂ ಮರುದ್ಗಣಾಃ.
ತ್ವಂ ದೈತ್ಯಾ ದಾನವಾ ನಾಗಾಸ್ತ್ವಂ ಯಕ್ಷಾ ರಾಕ್ಷಸಾಃ ಖಗಾಃ.
ಗಂಧರ್ವಾಪ್ಸರಸಃ ಸಿದ್ಧಾಃ ಪಿತರಸ್ತ್ವಂ ಮಹಾಮರಾಃ.
ಭೂತಾನಿ ವಿಷಯಸ್ತ್ವಂ ಹಿ ತ್ವಮವ್ಯಕ್ತೇಂದ್ರಿಯಾಣಿ ಚ.
ಮನೋಬುದ್ಧಿರಹಂಕಾರಃ ಕ್ಷೇತ್ರಜ್ಞಸ್ತ್ವಂ ಹೃದೀಶ್ವರಃ.
ತ್ವಂ ಯಜ್ಞಸ್ತ್ವಂ ವಷಟ್ಕಾರಸ್ತ್ವಮೋಂಕಾರಃ ಸಮಿತ್ಕುಶಃ.
ತ್ವಂ ವೇದೀ ತ್ವಂ ಹರೇ ದೀಕ್ಷಾ ತ್ವಂ ಯೂಪಸ್ತ್ವಂ ಹುತಾಶನಃ.
ತ್ವಂ ಪತ್ನೀ ತ್ವಂ ಪುರೋಡಾಶಸ್ತ್ವಂ ಶಾಲಾ ಸ್ತ್ರುಕ್ಚ ತ್ವಂ ಸ್ತುವಃ.
ಗ್ರಾವಾಣಃ ಸಕಲಂ ತ್ವಂ ಹಿ ಸದಸ್ಯಾಸ್ತ್ವಂ ಸದಾಕ್ಷಿಣಃ.
ತ್ವಂ ಸೂರ್ಪಾದಿಸ್ತ್ವಂ ಚ ಬ್ರಹ್ಮಾ ಮುಸಲೋಲೂಖಲೇ ಧ್ರುವಂ.
ತ್ವಂ ಹೋತಾ ಯಜಮಾನಸ್ತ್ವಂ ತ್ವಂ ಧಾನ್ಯಂ ಪಶುಯಾಜಕಃ.
ತ್ವಮಧ್ವರ್ಯುಸ್ತ್ವಮುದ್ಗಾತಾ ತ್ವಂ ಯಜ್ಞಃ ಪುರುಷೋತ್ತಮಃ.
ದಿಕ್ಪಾತಾಲಮಹಿ ವ್ಯೋಮ ದ್ಯೌಸ್ತ್ವಂ ನಕ್ಷತ್ರಕಾರಕಃ.
ದೇವತಿರ್ಯಙ್ಮನುಷ್ಯೇಷು ಜಗದೇತಚ್ಚರಾಚರಂ.
ಯತ್ಕಿಂಚಿದ್ದೃಶ್ಯತೇ ದೇವ ಬ್ರಹ್ಮಾಂಡಮಖಿಲಂ ಜಗತ್.
ತವ ರೂಪಮಿದಂ ಸರ್ವಂ ದೃಷ್ಟ್ಯರ್ಥಂ ಸಂಪ್ರಕಾಶಿತಂ.
ನಾಥಯಂತೇ ಪರಂ ಬ್ರಹ್ಮ ದೈವೇರಪಿ ದುರಾಸದಂ.
ಕಸ್ತಜ್ಜಾನಾತಿ ವಿಮಲಂ ಯೋಗಗಮ್ಯಮತೀಂದ್ರಿಯಂ.
ಅಕ್ಷಯಂ ಪುರುಷಂ ನಿತ್ಯಮವ್ಯಕ್ತಮಜಮವ್ಯಯಂ.
ಪ್ರಲಯೋತ್ಪತ್ತಿರಹಿತಂ ಸರ್ವವ್ಯಾಪಿನಮೀಶ್ವರಂ.
ಸರ್ವಜ್ಞಂ ನಿರ್ಗುಣಂ ಶುದ್ಧಮಾನಂದಮಜರಂ ಪರಂ.
ಬೋಧರೂಪಂ ಧ್ರುವಂ ಶಾಂತಂ ಪೂರ್ಣಮದ್ವೈತಮಕ್ಷಯಂ.
ಅವತಾರೇಷು ಯಾ ಮೂರ್ತಿರ್ವಿದೂರೇ ದೇವ ದೃಶ್ಯತೇ.
ಪರಂ ಭಾವಮಜಾನಂತಸ್ತ್ವಾಂ ಭಜಂತಿ ದಿವೌಕಸಃ.
ಕಥಂ ತ್ವಾಮೀದೃಶಂ ಸೂಕ್ಷ್ಮಂ ಶಕ್ನೋಮಿ ಪುರುಷೋತ್ತಮ.
ಅರಾಧಯಿತುಮೀಶಾನ ಮನೋಗಮ್ಯಮಗೋಚರಂ.
ಇಹ ಯನ್ಮಂಡಲೇ ನಾಥ ಪೂಜ್ಯತೇ ವಿಧಿವತ್ಕ್ರಮೈಃ.
ಪುಷ್ಪಧೂಪಾದಿಭಿರ್ಯತ್ರ ತತ್ರ ಸರ್ವಾ ವಿಭೂತಯಃ.
ಸಂಕರ್ಷಣಾದಿಭೇದೇನ ತವ ಯತ್ಪೂಜಿತಾ ಮಯಾ.
ಕ್ಷಂತುಮರ್ಹಸಿ ತತ್ಸರ್ವಂ ಯತ್ಕೃತಂ ನ ಕೃತಂ ಮಯಾ.
ನ ಶಕ್ನೋಮಿ ವಿಭೋ ಸಮ್ಯಕ್ಕರ್ತುಂ ಪೂಜಾಂ ಯಥೋದಿತಾಂ.
ಯತ್ಕೃತಂ ಜಪಹೋಮಾದಿ ಅಸಾಧ್ಯಂ ಪುರುಷೋತ್ತಮ.
ವಿನಿಷ್ಪಾದಯಿತುಂ ಭಕ್ತ್ಯಾ ಅತ ಸ್ತ್ವಾಂ ಕ್ಷಮಯಾಮ್ಯಹಂ.
ದಿವಾ ರಾತ್ರೌ ಚ ಸಂಧ್ಯಾಯಾಂ ಸರ್ವಾವಸ್ಥಾಸು ಚೇಷ್ಟತಃ.
ಅಚಲಾ ತು ಹರೇ ಭಕ್ತಿಸ್ತವಾಂಘ್ರಿಯುಗಲೇ ಮಮ.
ಶರೀರೇಣ ತಥಾ ಪ್ರೀತಿರ್ನ ಚ ಧರ್ಮಾದಿಕೇಷು ಚ.
ಯಥಾ ತ್ವಯಿ ಜಗನ್ನಾಥ ಪ್ರೀತಿರಾತ್ಯಂತಿಕೀ ಮಮ.
ಕಿಂ ತೇನ ನ ಕೃತಂ ಕರ್ಮ ಸ್ವರ್ಗಮೋಕ್ಷಾದಿಸಾಧನಂ.
ಯಸ್ಯ ವಿಷ್ಣೌ ದೃಢಾ ಭಕ್ತಿಃ ಸರ್ವಕಾಮಫಲಪ್ರದೇ.
ಪೂಜಾಂ ಕರ್ತುಂ ತಥಾ ಸ್ತೋತ್ರಂ ಕಃ ಶಕ್ನೋತಿ ತವಾಚ್ಯುತ.
ಸ್ತುತಂ ತು ಪೂಜಿತಂ ಮೇಽದ್ಯ ತತ್ಕ್ಷಮಸ್ವ ನಮೋಽಸ್ತು ತೇ.
ಇತಿ ಚಕ್ರಧರಸ್ತೋತ್ರಂ ಮಯಾ ಸಮ್ಯಗುದಾಹೃತಂ.
ಸ್ತೌಹಿ ವಿಷ್ಣುಂ ಮುನೇ ಭಕ್ತ್ಯಾ ಯದೀಚ್ಛಸಿ ಪರಂ ಪದಂ.
ಸ್ತೋತ್ರೇಣಾನೇನ ಯಃ ಸ್ತೌತಿ ಪೂಜಾಕಾಲೇ ಜಗದ್ಗುರುಂ.
ಅಚಿರಾಲ್ಲಭತೇ ಮೋಕ್ಷಂ ಛಿತ್ವಾ ಸಂಸಾರಬಂಧನಂ.
ಅನ್ಯೋಽಪಿ ಯೋ ಜಪೇದ್ಭಕ್ತ್ಯಾ ತ್ರಿಸಂಧ್ಯಂ ನಿಯತಃ ಶುಚಿಃ.
ಇದಂ ಸ್ತೋತ್ರಂ ಮುನೇ ಸೋಽಪಿ ಸರ್ವಕಾಮಮವಾಪ್ನುಯಾತ್.
ಪುತ್ರಾರ್ಥೀ ಲಭತೇ ಪುತ್ರಾನ್ಬದ್ಧೋ ಮುಚ್ಯೇತ ಬಂಧನಾತ್.
ರೋಗಾದ್ವಿಮುಚ್ಯತೇ ರಾಗೀ ಲಭತೇ ನಿರ್ಧನೋ ಧನಂ.
ವಿದ್ಯಾರ್ಥೋ ಲಭತೇ ವಿದ್ಯಾಂ ಭಾಗ್ಯಂ ಕೀರ್ತಿಂ ಚ ವಿಂದತಿ.
ಜಾತಿ ಸ್ಮರತ್ವಂ ಮೇಧಾವೀ ಯದ್ಯದಿಚ್ಛತಿ ಚೇತಸಾ.
ಸ ಧನ್ಯಃ ಸರ್ವವಿತ್ಪ್ರಾಜ್ಞಃ ಸ ಸಾಧುಃ ಸರ್ವಕರ್ಮಕೃತ್.
ಸ ಸತ್ಯವಾಕ್ಯಶ್ಛುಚಿರ್ದಾತಾ ಯಃ ಸ್ತೌತಿ ಪುರುಷೋತ್ತಮಂ.
ಅಸಂಭಾಷ್ಯಾ ಹಿ ತೇ ಸರ್ವೇ ಸರ್ವಧರ್ಮಬಹಿಷ್ಕೃತಾಃ.
ಯೇಷಾಂ ಪ್ರವರ್ತನೇ ನಾಸ್ತಿ ಹರಿಮುದ್ದಿಶ್ಯ ಸತ್ಕ್ರಿಯಾ.
ನ ಶುದ್ಧಂ ವಿದ್ಯತೇ ತಸ್ಯ ಮನೋ ವಾಕ್ಚ ದುರಾತ್ಮನಃ.
ಯಸ್ಯ ಸರ್ವಾರ್ಥದೇ ವಿಷ್ಣೌ ಭಕ್ತಿರ್ನಾವ್ಯಭಿಚಾರಿಣೀ.
ಆರಾಧ್ಯ ವಿಧಿವದ್ದೇವಂ ಹರಿಂ ಸರ್ವಸುಖಪ್ರದಂ.
ಪ್ರಾಪ್ನೋತಿ ಪುರುಷಃ ಸಮ್ಯಗ್ಯದ್ಯತ್ಪ್ರಾರ್ಥಯತೇ ಫಲಂ.
ಕರ್ಮ ಕಾಮಾದಿಕಂ ಸರ್ವಂ ಶ್ರದ್ಧಧಾನಃ ಸುರೋತ್ತಮಃ.
ಅಸುರಾದಿವಪುಃ ಸಿದ್ಧೈರ್ದೇಯತೇ ಯಸ್ಯ ನಾಂತರಂ.
ಸಕಲಮುನಿಭಿರಾದ್ಯಶ್ಚಿಂತ್ಯತೇ ಯೋ ಹಿ ಶುದ್ಧೋ
ನಿಖಿಲಹೃದಿ ನಿವಿಷ್ಟೋ ವೇತ್ತಿ ಯಃ ಸರ್ವಸಾಕ್ಷೀ.
ತಮಜಮಮೃತಮೀಶಂ ವಾಸುದೇವಂ ನತೋಽಸ್ಮಿ
ಭಯಮರಣವಿಹೀನಂ ನಿತ್ಯಮಾನಂದರೂಪಂ.
ನಿಖಿಲಭುವನನಾಥಂ ಶಾಶ್ವತಂ ಸುಪ್ರಸನ್ನಂ
ತ್ವತಿವಿಮಲವಿಶುದ್ಧಂ ನಿರ್ಗುಣಂ ಭಾವಪುಷ್ಪೈಃ.
ಸುಖಮುದಿತಸಮಸ್ತಂ ಪೂಜಯಾಮ್ಯಾತ್ಮಭಾವಂ
ವಿಶತು ಹೃದಯಪದ್ಮೇ ಸರ್ವಸಾಕ್ಷೀ ಚಿದಾತ್ಮಾ.
ಏವಂ ಮಯೋಕ್ತಂ ಪರಮಪ್ರಭಾವಮಾದ್ಯಂತಹೀನಸ್ಯ ಪರಸ್ಯ ವಿಷ್ಣೋಃ.
ತಸ್ಮಾದ್ವಿಚಿಂತ್ಯಃ ಪರಮೇಶ್ವರೋಽಸೌ ವಿಮುಕ್ತಿಕಾಮೇನ ನರೇಣ ಸಮ್ಯಕ್.
ಬೋಧಸ್ವರೂಪಂ ಪುರುಷಂ ಪುರಾಣಮಾದಿತ್ಯವರ್ಣಂ ವಿಮಲಂ ವಿಶುದ್ಧಂ.
ಸಂಚಿಂತ್ಯ ವಿಷ್ಣುಂ ಪರಮದ್ವಿತೀಯಂ ಕಸ್ತತ್ರ ಯೋಗೀ ನ ಲಂಯ ಪ್ರಯಾತಿ.
ಇಮಂ ಸ್ತವಂ ಯಃ ಸತತಂ ಮನುಷ್ಯಃ ಪಠೇಚ್ಚ ತದ್ವತ್ಪ್ರಯತಃ ಪ್ರಶಾಂತಃ.
ಸ ಧೂತಪಾಪ್ಮಾ ವಿತತಪ್ರಭಾವಃ ಪ್ರಯಾತಿ ಲೋಕಂ ವಿತತಂ ಮುರಾರೇಃ.
ಯಃ ಪ್ರಾರ್ಥಯತ್ಯರ್ಥಮಶೇಷಸೌಖ್ಯಂ ಧರ್ಮಂ ಚ ಕಾಮಂ ಚ ತಥೈವ ಮೋಕ್ಷಂ.
ಸ ಸರ್ವಮುತ್ಸೃಜ್ಯ ಪರಂ ಪುರಾಣಂ ಪ್ರಯಾತಿ ವಿಷ್ಣುಂ ಶರಣಂ ವರೇಣ್ಯಂ.
ವಿಭುಂ ಪ್ರಭುಂ ವಿಶ್ವಧರಂ ವಿಶುದ್ಧಮಶೇಷಸಂಸಾರವಿನಾಶಹೇತುಂ.
ಯೋ ವಾಸುದೇವಂ ವಿಮಲಂ ಪ್ರಪನ್ನಃ ಸ ಮೋಕ್ಷಮಾಪ್ನೋತಿ ವಿಮುಕ್ತಸಂಗಃ.

Ramaswamy Sastry and Vighnesh Ghanapaathi