ಕರವಾಣಿ ವಾಣಿ ಕಿಂ ವಾ ಜಗತಿ ಪ್ರಚಯಾಯ ಧರ್ಮಮಾರ್ಗಸ್ಯ.
ಕಥಯಾಶು ತತ್ಕರೋಮ್ಯಹಮಹರ್ನಿಶಂ ತತ್ರ ಮಾ ಕೃಥಾ ವಿಶಯಂ.
ಗಣನಾಂ ವಿಧಾಯ ಮತ್ಕೃತಪಾಪಾನಾಂ ಕಿಂ ಧೃತಾಕ್ಷಮಾಲಿಕಯಾ.
ತಾಂತಾದ್ಯಾಪ್ಯಸಮಾಪ್ತೇರ್ನಿಶ್ಚಲತಾಂ ಪಾಣಿಪಂಕಜೇ ಧತ್ಸೇ.
ವಿವಿಧಾಶಯಾ ಮದೀಯಂ ನಿಕಟಂ ದೂರಾಜ್ಜನಾಃ ಸಮಾಯಾಂತಿ.
ತೇಷಾಂ ತಸ್ಯಾಃ ಕಥಮಿವ ಪೂರಣಮಹಮಂಬ ಸತ್ವರಂ ಕುರ್ಯಾಂ.
ಗತಿಜಿತಮರಾಲಗರ್ವಾಂ ಮತಿದಾನಧುರಂಧರಾಂ ಪ್ರಣಮ್ರೇಭ್ಯಃ.
ಯತಿನಾಥಸೇವಿತಪದಾಮತಿಭಕ್ತ್ಯಾ ನೌಮಿ ಶಾರದಾಂ ಸದಯಾಂ.
ಜಗದಂಬಾಂ ನಗತನುಜಾಧವಸಹಜಾಂ ಜಾತರೂಪತನುವಲ್ಲೀಂ.
ನೀಲೇಂದೀವರನಯನಾಂ ಬಾಲೇಂದುಕಚಾಂ ನಮಾಮಿ ವಿಧಿಜಾಯಾಂ.
ಭಾರೋ ಭಾರತಿ ನ ಸ್ಯಾದ್ವಸುಧಾಯಾಸ್ತದ್ವದಂಬ ಕುರು ಶೀಘ್ರಂ.
ನಾಸ್ತಿಕತಾನಾಸ್ತಿಕತಾಕರಣಾತ್ಕಾರುಣ್ಯದುಗ್ಧವಾರಾಶೇ.
ನಿಕಟೇವಸಂತಮನಿಶಂ ಪಕ್ಷಿಣಮಪಿ ಪಾಲಯಾಮಿ ಕರತೋಽಹಂ.
ಕಿಮು ಭಕ್ತಿಯುಕ್ತಲೋಕಾನಿತಿ ಬೋಧಾರ್ಥಂ ಕರೇ ಶುಕಂ ಧತ್ಸೇ.
ಶೃಂಗಾದ್ರಿಸ್ಥಿತಜನತಾಮನೇಕರೋಗೈರುಪದ್ರುತಾಂ ವಾಣಿ.
ವಿನಿವಾರ್ಯ ಸಕಲರೋಗಾನ್ಪಾಲಯ ಕರುಣಾರ್ದ್ರದೃಷ್ಟಿಪಾತೇನ.
ಮದ್ವಿರಹಾದತಿಭೀತಾನ್ಮದೇಕಶರಣಾನತೀವ ದುಃಖಾರ್ತಾನ್.
ಮಯಿ ಯದಿ ಕರುಣಾ ತವ ಭೋ ಪಾಲಯ ಶೃಂಗಾದ್ರಿವಾಸಿನೋ ಲೋಕಾನ್.
ಸದನಮಹೇತುಕೃಪಾಯಾ ರದನವಿನಿರ್ಧೂತಕುಂದಗರ್ವಾಲಿಂ.
ಮದನಾಂತಕಸಹಜಾತಾಂ ಸರಸಿಜಭವಭಾಮಿನೀಂ ಹೃದಾ ಕಲಯೇ.

Ramaswamy Sastry and Vighnesh Ghanapaathi