ಶ್ರೀಪಾಂಡ್ಯವಂಶಮಹಿತಂ ಶಿವರಾಜರಾಜಂ
ಭಕ್ತೈಕಚಿತ್ತರಜನಂ ಕರುಣಾಪ್ರಪೂರ್ಣಂ.
ಮೀನೇಂಗಿತಾಕ್ಷಿಸಹಿತಂ ಶಿವಸುಂದರೇಶಂ
ಹಾಲಾಸ್ಯನಾಥಮಮರಂ ಶರಣಂ ಪ್ರಪದ್ಯೇ.
ಆಹ್ಲಾದದಾನವಿಭವಂ ಭವಭೂತಿಯುಕ್ತಂ
ತ್ರೈಲೋಕ್ಯಕರ್ಮವಿಹಿತಂ ವಿಹಿತಾರ್ಥದಾನಂ.
ಮೀನೇಂಗಿತಾಕ್ಷಿಸಹಿತಂ ಶಿವಸುಂದರೇಶಂ
ಹಾಲಾಸ್ಯನಾಥಮಮರಂ ಶರಣಂ ಪ್ರಪದ್ಯೇ.
ಅಂಭೋಜಸಂಭವಗುರುಂ ವಿಭವಂ ಚ ಶಂಭುಂ
ಭೂತೇಶಖಂಡಪರಶುಂ ವರದಂ ಸ್ವಯಂಭುಂ.
ಮೀನೇಂಗಿತಾಕ್ಷಿಸಹಿತಂ ಶಿವಸುಂದರೇಶಂ
ಹಾಲಾಸ್ಯನಾಥಮಮರಂ ಶರಣಂ ಪ್ರಪದ್ಯೇ.
ಕೃತ್ಯಾಜಸರ್ಪಶಮನಂ ನಿಖಿಲಾರ್ಚ್ಯಲಿಂಗಂ
ಧರ್ಮಾವಬೋಧನಪರಂ ಸುರಮವ್ಯಯಾಂಗಂ.
ಮೀನೇಂಗಿತಾಕ್ಷಿಸಹಿತಂ ಶಿವಸುಂದರೇಶಂ
ಹಾಲಾಸ್ಯನಾಥಮಮರಂ ಶರಣಂ ಪ್ರಪದ್ಯೇ.
ಸಾರಂಗಧಾರಣಕರಂ ವಿಷಯಾತಿಗೂಢಂ
ದೇವೇಂದ್ರವಂದ್ಯಮಜರಂ ವೃಷಭಾಧಿರೂಢಂ.
ಮೀನೇಂಗಿತಾಕ್ಷಿಸಹಿತಂ ಶಿವಸುಂದರೇಶಂ
ಹಾಲಾಸ್ಯನಾಥಮಮರಂ ಶರಣಂ ಪ್ರಪದ್ಯೇ.

Ramaswamy Sastry and Vighnesh Ghanapaathi