బ్రహ్మోవాచ . అథ వృత్తే వివాహే తు భవస్యామితతేజసః .

ప్రహర్షమతులం గత్వా దేవాః శక్రపురోగమాః .

తుష్టువుర్వాగ్భిరాద్యాభిః ప్రణేముస్తే మహేశ్వరం ..

దేవా ఊచుః . నమః పర్వతలింగాయ పర్వతేశాయ వై నమః .

నమః పవనవేగాయ విరూపాయాజితాయ చ .

నమః క్లేశవినాశాయ దాత్రే చ శుభసంపదాం ..

నమో నీలశిఖండాయ అంబికాపతయే నమః .

నమః పవనరూపాయ శతరూపాయ వై నమః ..

నమో భైరవరూపాయ విరూపనయనాయ చ .

నమః సహస్రనేత్రాయ సహస్రచరణాయ చ ..

నమో దేవవయస్యాయ వేదాంగాయ నమో నమః .

విష్టంభనాయ శక్రస్య బాహ్వోర్వేదాంకురాయ చ ..

చరాచరాధిపతయే శమనాయ నమో నమః .

సలిలాశయలింగాయ యుగాంతాయ నమో నమః ..

నమః కపాలమాలాయ కపాలసూత్రధారిణే .

నమః కపాలహస్తాయ దండినే గదినే నమః ..

నమస్త్రైలోక్యనాథాయ పశులోకరతాయ చ .

నమః ఖట్వాంగహస్తాయ ప్రమథార్తిహరాయ చ ..

నమో యజ్ఞశిరోహంత్రే కృష్ణకేశాపహారిణే .

భగనేత్రనిపాతాయ పూష్ణో దంతహరాయ చ ..

నమః పినాకశూలాసిఖడ్గముద్గరధారిణే .

నమోఽస్తు కాలకాలాయ తృతీయనయనాయ చ ..

అంతకాంతకృతే చైవ నమః పర్వతవాసినే .

సువర్ణరేతసే చైవ నమః కుండలధారిణే ..

దైత్యానాం యోగనాశాయ యోగినాం గురవే నమః .

శశాంకాదిత్యనేత్రాయ లలాటనయనాయ చ ..

నమః శ్మశానరతయే శ్మశానవరదాయ చ .

నమో దైవతనాథాయ త్ర్యంబకాయ నమో నమః ..

గృహస్థసాధవే నిత్యం జటిలే బ్రహ్మచారిణే .

నమో ముండార్ధముండాయ పశూనాం పతయే నమః ..

సలిలే తప్యమానాయ యోగైశ్వర్యప్రదాయ చ .

నమః శాంతాయ దాంతాయ ప్రలయోత్పత్తికారిణే ..

నమోఽనుగ్రహకర్త్రే చ స్థితికర్త్రే నమో నమః .

నమో రుద్రాయ వసవ ఆదిత్యాయాశ్వినే నమః ..

నమః పిత్రేఽథ సాంఖ్యాయ విశ్వేదేవాయ వై నమః .

నమః శర్వాయ ఉగ్రాయ శివాయ వరదాయ చ ..

నమో భీమాయ సేనాన్యే పశూనాం పతయే నమః .

శుచయే వైరిహానాయ సద్యోజాతాయ వై నమః ..

మహాదేవాయ చిత్రాయ విచిత్రాయ చ వై నమః .

ప్రధానాయాప్రమేయాయ కార్యాయ కారణాయ చ ..

పురుషాయ నమస్తేఽస్తు పురుషేచ్ఛాకరాయ చ .

నమః పురుషసంయోగప్రధానగుణకారిణే ..

ప్రవర్తకాయ ప్రకృతేః పురుషస్య చ సర్వశః .

కృతాకృతస్య సత్కర్త్రే ఫలసంయోగదాయ చ ..

కాలజ్ఞాయ చ సర్వేషాం నమో నియమకారిణే .

నమో వైషమ్యకర్త్రే చ గుణానాం వృత్తిదాయ చ ..

నమస్తే దేవదేవేశ నమస్తే భూతభావన .

శివ సౌమ్యముఖో ద్రష్టుం భవ సౌమ్యో హి నః ప్రభో ..

బ్రహ్మోవాచ . ఏవం స భగవాన్ దేవో జగత్పతిరుమాపతిః .

స్తూయమానః సురైః సర్వైరమరానిదమబ్రవీత్ ..

శ్రీశంకర ఉవాచ .

ద్రష్టుం సుఖశ్చ సౌమ్యశ్చ దేవానామస్మి భోః సురాః .

వరం వరయత క్షిప్రం దాతాస్మి తమసంశయం ..

బ్రహ్మోవాచ .

తతస్తే ప్రణతాః సర్వే సురా ఊచుస్త్రిలోచనం ..

దేవా ఊచుః .

తవైవ భగవన్ హస్తే వర ఏషోఽవతిష్ఠతాం .

యదా కార్యం తదా నస్త్వం దాస్యసే వరమీప్సితం ..

బ్రహ్మోవాచ .

ఏవమస్త్వితి తాన్ ఉక్త్వా విసృజ్య చ సురాన్ హరః .

లోకాంశ్చ ప్రమథైః సార్ధం వివేశ భవనం స్వకం ..

యస్తు హరోత్సవమద్భుతమేనం .

గాయతి దైవతవిప్రసమక్షం .

సోఽప్రతిరూపగణేశసమానో .

దేహవిపర్యయమేత్య సుఖీ స్యాత్ .

Ramaswamy Sastry and Vighnesh Ghanapaathi