పద్మాధిరాజే గరుడాధిరాజే
విరించరాజే సురరాజరాజే .
త్రైలోక్యరాజేఽఖిలరాజరాజే
శ్రీరంగరాజే రమతాం మనో మే ..

నీలాబ్జవర్ణే భుజపూర్ణకర్ణే
కర్ణాంతనేత్రే కమలాకలత్రే .
శ్రీమల్లరంగే జితమల్లరంగే
శ్రీరంగరంగే రమతాం మనో మే ..

లక్ష్మీనివాసే జగతాం నివాసే
హృత్పద్మవాసే రవిబింబవాసే .
క్షీరాబ్ధివాసే ఫణిభోగవాసే
శ్రీరంగవాసే రమతాం మనో మే ..

కుబేరలీలే జగదేకలీలే
మందారమాలాంకితచారుఫాలే .
దైత్యాంతకాలేఽఖిలలోకమౌలే
శ్రీరంగలీలే రమతాం మనో మే ..

అమోఘనిద్రే జగదేకనిద్రే
విదేహనిద్రే చ సముద్రనిద్రే .
శ్రీయోగనిద్రే సుఖయోగనిద్రే
శ్రీరంగనిద్రే రమతాం మనో మే ..

ఆనందరూపే నిజబోధరూపే
బ్రహ్మస్వరూపే క్షితిమూర్తిరూపే .
విచిత్రరూపే రమణీయరూపే
శ్రీరంగరూపే రమతాం మనో మే ..

భక్తాకృతార్థే మురరావణార్థే
భక్తసమర్థే జగదేకకీర్తే .
అనేకమూర్తే రమణీయమూర్తే
శ్రీరంగమూర్తే రమతాం మనో మే ..

కంసప్రమాథే నరకప్రమాథే
దుష్టప్రమాథే జగతాం నిదానే .
అనాథనాథే జగదేకనాథే
శ్రీరంగనాథే రమతాం మనో మే ..

సుచిత్రశాయీ జగదేకశాయీ
నందాంకశాయీ కమలాంకశాయీ .
అంభోధిశాయీ వటపత్రశాయీ
శ్రీరంగశాయీ రమతాం మనో మే ..

సకలదురితహారీ భూమిభారాపహారీ
దశముఖకులహారీ దైత్యదర్పాపహారీ .
సులలితకృతచారీ పారిజాతాపహారీ
త్రిభువనభయహారీ ప్రీయతాం శ్రీమురారిః ..

రంగస్తోత్రమిదం పుణ్యం ప్రాతఃకాలే పఠేన్నరః .
కోటిజన్మార్జితం పాపం స్మరణేన వినశ్యతి ..

Ramaswamy Sastry and Vighnesh Ghanapaathi