అక్షరం వాక్పథాతీతం ఋక్షరాజనిభాననం.
రక్షతాద్వామ నః కించిదుక్షవాహనమోహనం.
ఆకాశకేశమహిషీం ఆకారవిజితోర్వశీం.
ఆశాహినజనధ్యేయాం ఆశాపాలార్చితాం నుమః.
ఇంద్రప్రభృతిగీర్వాణవందితాంఘ్రికుశేశయా.
చంద్రస్తనంధయాపీడజాయా విజయతేతరాం.
ఈశ్వరీం సర్వభూతానాం కః శివాం స్తోతుమీశ్వరః.
చతుర్భిరసమేతో నా వదనైరుతబాహుభిః.
ఉమా నామాదిమా భామా వామా శ్యామా విమానమా.
విమానమాన్యమాయా మా భిమా రామానుమాతు మా.
ఊరుం తం దక్షిణం మాతుః స్మరామి నిజమాసనం.
యస్మాదహం పరిభ్రష్టః కల్కీ భూభువనం గతః.
ఋషీణాం చక్షుషో జ్యోతిః బాలా శైలస్య చక్షుషః.
హరస్య చక్షుషః కాంతా మాతోమా మమ చక్షుషః.
ౠకారం వేష్టితం ద్వాభ్యాం నాభ్యాముభయతో దిశం.
ఆకారో వా క్షమః పాతుం స చంద్రేణ వతంసితః.
లృకారః శీతలాపాంగి కకారేణేవ సర్వదా.
శ్లిష్ట ఏవ త్వయా గౌరి మేరుధన్వా ప్రయుజ్యయే.
లౄకారోఽమ్బ త్వయా బాల్యే కలభాషిణి భాషితః.
నచేదయమసన్వర్ణో గృహ్యతే కథమాగమే.
ఏణస్తనంధయాలోకం ఏకాంతాలోచనామృతం.
ఏకామ్రనాయకదృశోర్భాగ్యం విజయతేతరాం.
ఐశ్వర్యం కః పుమానీష్టే గిరిజాయాః ప్రభాషితుం.
చామరగ్రాహిణీ యస్యాః స్వయమంభోజవాసినీ.
ఓంకార ఇవ శర్వస్య హ్రీంకారస్తవ వాచకః.
అనయోరంబికే భేదం యో న వేద స వేద నా.
ఔదార్యే దేవతా ధేనుః సౌందర్యే మణిపుత్రికా .
స్వయం శక్తిర్నగసుతా త్రిలోకీ రాజ్యమర్హతి.
అంసయోర్వినతం సమ్యగున్నతం కుచకుంభయోః.
అమృతం శంకరదృశోః పరం జయతి దైవతం.
అః కుంఠిత్తోఽభవద్యేషు తేషు దర్శితవిక్రమా.
యాతుధానేషు భీమేషు పాతు వో భీమభామినీ.
కమలాసుతేన యత్రాత్ కృతాని శృంగారతంత్రసూత్రాణి.
స్తోకాన్యపి బహులార్థాన్యగజాహసితాని పాంతు త్వాం.
ఖం భవతీ భూర్భవతీ పవనో భవతీ హుతాశనో భవతీ.
సలిలం చ దేవి భవతీ భవతీం హిత్వా న కించిదపి.
గణపతయే స్తనఘటయోః పదకమలే సప్తలోకభక్తేభ్యః.
అధరమణౌ త్రిపురజితే దధాసి పీయూషమంబ త్వం.
ఘనమతిదాయకవేణీ వాణీపతిముఖ్యదేవతావినుతా.
పురరిపుపాణిగృహీతీ పూర్ణం విదధాతు మే కామం.
ఙత్వం వాదస్య లిపౌ మాతః కేనాపి లింగభేదేన.
త్వద్రూపతా పురారేస్తదభావే తు ద్వయోరైక్యం.
చంచలవిశాలనయనా తుంగకుచా చంచరీకనీలకచా.
పంచముఖస్య పురంధ్రీ జగతోంఽహఃసంచయం హరతు.
ఛత్రగ్రహణనియోజ్యా దశశతనేత్రస్య భామినీ యస్యాః.
తస్యాశ్చరణముమాయా భవాతపే క్లిశ్యతాం ఛత్రం.
జంబుకనాయకనయనజ్యోత్స్నేయం రంగశాయినో భగినీ.
అఖిలానామండానామధిరాజ్ఞీ విజయతే చండీ.
ఝంకృతిం కరోతి చేన్నమత్తషట్పదావలీ
యన్ముఖాంబుజన్మనా సుగంధినా నిమంత్రితా.
కర్ణకుంతలభ్రమాద్భవేన నైవ వార్యతే
శైలశక్రపుత్రికా ధునోతు సా మమ భ్రమం.
ఞమఙణనాః సంప్రోక్త్తా చపకటతాఖ్యేషు గౌరి వర్గేషు.
ఉత్తమసంజ్ఞాః ప్రాజ్ఞైః నరవర్గే తు త్వదంఘ్రిరతాః.
టంకృతిముఖరితదిక్కం సజ్యం బాణాసనం కరే దధతీ.
ధ్యేయా మాయా శబరీ శత్రుభయం తర్తుకామేన.
ఠంకమపూర్వం లక్ష్మ్యా ప్రహసన్ప్రవదస్యలం తు వదనస్య.
పరితో మునిభిర్గీతః పరిగ్రహో ధూర్జటేర్జయతి.
డమరుధరో భగవానపి గాయతి యస్యాః శుభం గుణవ్రాతం.
తస్యాః శిఖరిసుతాయా నాకృతపుణ్యో భవేద్వందీ.
ఢక్కాదివాద్యహస్తప్రమథసమారాధితశ్రవణయుగ్మా.
శుభ్రకిరణార్ధమౌలేః శుద్ధాంతవిలాసినీ జయతీ.
ణటధాత్వర్థే చతురో నాథో యస్యాస్తరంగిణీధారీ.
అగపురుహూతసుతా సా కరోతు మే మానసే నటనం.
తనుకాంతివిజితకనకా తరణిః సంసారధోరజలరాశేః.
తరుణారుణాభచరణా తనోతు మే గిరిసుతా క్షేమం.
థస్యేవ యస్య నాస్తి ప్రారంభో యేన న ద్వితీయత్వం.
తస్య గృణంత్యక్షరతా యస్మిన్నపి తన్మహో జయతి.
దరహసితద్విగుణీకృతముఖకాంతిర్జయతి పురజితః కాంతా.
నయనోన్మేషవిలాసో యస్యాః సకలాని భువనాని.
ధరణీధరస్య దుహితా ధరణీధరవాసినో వధూర్దయితా.
ధరణీవిటస్య భగినీ ధరణీమేతాముమా పాతు.
నగజే పాయం పాయం లావణ్యసుధాం త్వదీయగాత్రస్య.
నయనాంజలినా శూలీ బభూవ మృత్యుంజయో మన్యే.
పతిరుగ్రదృష్టిరుగ్రో యువరాజోఽయం సదా మదోపేతః.
తవ రాజ్ఞి న కరుణా చేద్ భువనస్య కథం శుభం భవతు.
ఫలితం మమాంబ సుకృతం కాలేనైతావతా న సందేహః.
యద్ భవదీయం స్తోత్రం పవిత్రమీశాని రచయామి.
బలిభిర్నిపీడ్యమానానబలాన్ పాతుం గృహీతజననాయ.
బలమంబ దేహి మహ్యం బలిమేతత్కల్పయామి మనః.
భవదీయస్య మహేశ్వరి కటాక్షనామ్నో నవస్య మేధస్య.
ప్రావృషమహమాశంకే కరుణాం కల్యాణతోయముచః.
మతిరహితః స్తువసి త్వం యం కంచన ధనపిశాచికావిష్టం.
ఇష్టం చ నైవ లభసే పశ్య జగన్మాతరం స్తుత్వా.
యమినాం స్మర్తుం యోగ్యం నిగమాగమవాక్యసంచయైర్మృగ్యం.
మూర్తం లోచనభాగ్యం పురామరేర్జయతి నీపవనే.
రథచరణపాణిభగినీ దానవదమనీ నమద్విపచ్ఛమనీ.
భువనత్రయస్య జననీ వింధ్యే ధరణీధరే జయతి.
లలనాజనప్రకాండం కలనాదపరాస్తబాలకలకంఠం.
పురవైరిణః కలత్రం మురవైరి సమర్చితం భజ రే.
వంద్యముమాపదకమలం నింద్యమిదం సంగకారణసదనం.
వయసి సకలేఽప్యతీతే నయసి ముధా ముగ్ధ కిం కాలం.
శంబరశాత్రవశాత్రవకలత్రపదమిత్రమహమహో ధన్యః.
భూమండలే విశాలే సదృశః పురుషో మయా కోఽన్యః.
షడ్వదనస్య సవిత్రీ షణ్ణాం హంత్రీ మనః సపత్రానాం.
షడ్భిర్గమ్యం మార్గైర్భర్గస్య పురంధ్రికాస్థానం.
సర్వత్ర సంగముక్తో గర్వవియుక్తః స్వతంత్రసంచారః.
నిర్వర్ణయన్ కదా వా శర్వవధూధామ విహరామి.
హరిముఖవందితచరణా హరిణాంకమదాపహాస్యరజీవా.
హరిణస్తనంధయాక్షి హరినాయకవాహనా జయతి.
క్షత్రియాంతకారిణః ప్రసూత్వమేవ కేవలం
నాప కాఽపి యత్కలా మమాపి మాతృతామగాత్.
దుష్టలోకమారిణీ నృసింహశక్తిరూపిణీ
ధూర్జటేర్వధూటికా ధునోతు సా మదాపదం.