జగదాదిమనాదిమజం పురుషం శరదంబరతుల్యతనుం వితనుం.
ధృతకంజరథాంగగదం విగదం ప్రణమామి రమాధిపతిం తమహం.
కమలాననకంజరతం విరతం హృది యోగిజనైః కలితం లలితం.
కుజనైః సుజనైరలభం సులభం ప్రణమామి రమాధిపతిం తమహం.
మునివృందహృదిస్థపదం సుపదం నిఖిలాధ్వరభాగభుజం సుభుజం.
హృతవాసవముఖ్యమదం విమదం ప్రణమామి రమాధిపతిం తమహం.
హృతదానవదృప్తబలం సుబలం స్వజనాస్తసమస్తమలం విమలం.
సమపాస్త గజేంద్రదరం సుదరం ప్రణమామి రమాధిపతిం తమహం.
పరికల్పితసర్వకలం వికలం సకలాగమగీతగుణం విగుణం.
భవపాశనిరాకరణం శరణం ప్రణమామి రమాధిపతిం తమహం.
మృతిజన్మజరాశమనం కమనం శరణాగతభీతిహరం దహరం.
పరితుష్టరమాహృదయం సుదయం ప్రణమామి రమాధిపతిం తమహం.
సకలావనిబింబధరం స్వధరం పరిపూరితసర్వదిశం సుదృశం.
గతశోకమశోకకరం సుకరం ప్రణమామి రమాధిపతిం తమహం.
మథితార్ణవరాజరసం సరసం గ్రథితాఖిలలోకహృదం సుహృదం.
ప్రథితాద్భుతశక్తిగణం సుగణం ప్రణమామి రమాధిపతిం తమహం.
సుఖరాశికరం భవబంధహరం పరమాష్టకమేతదనన్యమతిః.
పఠతీహ తు యోఽనిశమేవ నరో లభతే ఖలు విష్ణుపదం స పరం.

Ramaswamy Sastry and Vighnesh Ghanapaathi