సర్వోత్తుంగాం సర్వవిప్రప్రవంద్యాం
శైవాం మేనాకన్యకాంగీం శివాంగీం.
కైలాసస్థాం ధ్యానసాధ్యాం పరాంబాం
శుభ్రాం దేవీం శైలపుత్రీం నమామి.
కౌమారీం తాం కోటిసూర్యప్రకాశాం
తాపావృత్తాం దేవదేవీమపర్ణాం.
వేదజ్ఞేయాం వాద్యగీతప్రియాం తాం
బ్రహ్మోద్గీథాం బ్రహ్మరూపాం నమామి.
వృత్తాక్షీం తాం వాసరారంభఖర్వ-
సూర్యాతాపాం శౌర్యశక్త్యైకదాత్రీం.
దేవీం నమ్యాం నందినీం నాదరూపాం
వ్యాఘ్రాసీనాం చంద్రఘంటాం నమామి.
హృద్యాం స్నిగ్ధాం శుద్ధసత్త్వాంతరాలాం
సర్వాం దేవీం సిద్ధిబుద్ధిప్రదాత్రీం.
ఆర్యామంబాం సర్వమాంగల్యయుక్తాం
కూష్మాండాం తాం కామబీజాం నమామి.
దివ్యేశానీం సర్వదేవైరతుల్యాం
సుబ్రహ్మణ్యాం సర్వసిద్ధిప్రదాత్రీం.
సింహాసీనాం మాతరం స్కందసంజ్ఞాం
ధన్యాం పుణ్యాం సర్వదా తాం నమామి.
కాలీం దోర్భ్యాం ఖడ్గచక్రే దధానాం
శుద్ధామంబాం భక్తకష్టాదినాశాం.
సత్త్వాం సర్వాలంకృతాశేషభూషాం
దేవీం దుర్గాం కాతవంశాం నమామి.
రుద్రాం తీక్ష్ణాం రాజరాజైర్వివంద్యాం
కాలాకాలాం సర్వదుష్టప్రనాశాం.
క్రూరాం తుండాం ముండమాల్యాంబరాం తాం
చండాం ఘోరాం కాలరాత్రిం నమామి.
శూలీకాంతాం పారమార్థప్రదాం తాం
పుణ్యాపుణ్యాం పాపనాశాం పరేశాం.
కామేశానీం కామదానప్రవీణాం
గౌరీమంబాం గౌరవర్ణాం నమామి.
నిశ్చాంచల్యాం రక్తనాలీకసంస్థాం
హేమాభూషాం దీనదైన్యాదినాశాం.
సాధుస్తుత్యాం సర్వవేదైర్వివంద్యాం
సిద్ధైర్వంద్యాం సిద్ధిదాత్రీం నమామి.
దుర్గాస్తోత్రం సంతతం యః పఠేత్ సః
ప్రాప్నోతి స్వం ప్రాతరుత్థాయ నిత్యం.
ధైర్యం పుణ్యం స్వర్గసంవాసభాగ్యం
దివ్యాం బుద్ధిం సౌఖ్యమర్థం దయాం చ.