ಲಲಿತಾ ಹೃದಯ ಸ್ತೋತ್ರ
ಬಾಲವ್ಯಕ್ತವಿಭಾಕರಾಮಿತನಿಭಾಂ ಭವ್ಯಪ್ರದಾಂ ಭಾರತೀ-
ಮೀಷತ್ಫುಲ್ಲಮುಖಾಂಬುಜಸ್ಮಿತಕರೈರಾಶಾಭವಾಂಧಾಪಹಾಂ .
ಪಾಶಂ ಸಾಭಯಮಂಕುಶಂ ಚ ವರದಂ ಸಂಬಿಭ್ರತೀಂ ಭೂತಿದಾಂ
ಭ್ರಾಜಂತೀಂ ಚತುರಂಬುಜಾಕೃತಕರೈರ್ಭಕ್ತ್ಯಾ ಭಜೇ ಷೋಡಶೀಂ ..
ಸುಂದರೀ ಸಕಲಕಲ್ಮಷಾಪಹಾ ಕೋಟಿಕಂಜಕಮನೀಯಕಾಂತಿಕಾ .
ಕೋಟಿಕಲ್ಪಕೃತಪುಣ್ಯಕರ್ಮಣಾ ಪೂಜನೀಯಪದಪುಣ್ಯಪುಷ್ಕರಾ ..
ಶರ್ವರೀಶಸಮಸುಂದರಾನನಾ ಶ್ರೀಶಶಕ್ತಿಸುಕೃತಾಶ್ರಯಾಶ್ರಿತಾ .
ಸಜ್ಜನಾನುಶರಣೀಯಸತ್ಪದಾ ಸಂಕಟೇ ಸುರಗಣೈಃ ಸುವಂದಿತಾ ..
ಯಾ ಸುರಾಸುರರಣೇ ಜವಾನ್ವಿತಾ ಹ್ಯಾಜಘಾನ ಜಗದಂಬಿಕಾಽಜಿತಾ .
ತಾಂ ಭಜಾಮಿ ಜನನೀಂ ಜಗಜ್ಜನಿಂ ಯುದ್ಧಯುಕ್ತದಿತಿಜಾನ್ ಸುದುರ್ಜಯಾನ್ ..
ಯೋಗಿನಾಂ ಹೃದಯಸಂಗತಾಂ ಶಿವಾಂ ಯೋಗಯುಕ್ತಮನಸಾಂ ಯತಾತ್ಮನಾಂ .
ಜಾಗ್ರತೀಂ ಜಗತಿ ಯತ್ನತೋ ದ್ವಿಜಾ ಯಾಂ ಜಪಂತಿ ಹೃದಿ ತಾಂ ಭಜಾಮ್ಯಹಂ ..
ಕಲ್ಪಕಾಸ್ತು ಕಲಯಂತಿ ಕಾಲಿಕಾಂ ಯತ್ಕಲಾ ಕಲಿಜನೋಪಕಾರಿಕಾ .
ಕೌಲಿಕಾಲಿಕಲಿತಾಂಘ್ರಿಪಂಕಜಾಂ ತಾಂ ಭಜಾಮಿ ಕಲಿಕಲ್ಮಷಾಪಹಾಂ ..
ಬಾಲಾರ್ಕಾನಂತಶೋಚಿರ್ನ್ನಿಜತನುಕಿರಣೈರ್ದ್ದೀಪಯಂತೀಂ ದಿಗಂತಾನ್
ದೀಪ್ತೈರ್ದ್ದೇದೀಪ್ತಮಾನಾಂ ದನುಜದಲವನಾನಲ್ಪದಾವಾನಲಾಭಾಂ .
ದಾಂತೋದಂತೋಗ್ರಚಿತಾಂ ದಲಿತದಿತಿಸುತಾಂ ದರ್ಶನೀಯಾಂ ದುರಂತಾಂ
ದೇವೀಂ ದೀನಾರ್ದ್ರಚಿತ್ತಾಂ ಹೃದಿ ಮುದಿತಮನಾಃ ಷೋಡಶೀಂ ಸಂಸ್ಮರಾಮಿ ..
ಧೀರಾಂಧನ್ಯಾಂಧರಿತ್ರೀಧವವಿಧೃತಶಿರೋ ಧೂತಧೂಲ್ಯಬ್ಜಪಾದಾಂ
ಘೃಷ್ಟಾಂಧಾರಾಧರಾಧೋ ವಿನಿಧೃತಚಪಲಾಚಾರುಚಂದ್ರಪ್ರಭಾಭಾಂ .
ಧರ್ಮ್ಯಾಂಧೂತೋಪಹಾರಾನ್ ಧರಣಿಸುರಧವೋದ್ಧಾರಿಣೀಂ ಧ್ಯೇಯರೂಪಾಂ
ಧೀಮದ್ಧನ್ಯಾತಿಧನ್ಯಾಂಧನದಧನವೃತಾಂ ಸುಂದರೀಂ ಚಿಂತಯಾಮಿ ..
ಜಯತು ಜಯತು ಜಲ್ಪಾ ಯೋಗಿನೀ ಯೋಗಯುಕ್ತಾ
ಜಯತು ಜಯತು ಸೌಮ್ಯಾ ಸುಂದರೀ ಸುಂದರಾಸ್ಯಾ .
ಜಯತು ಜಯತು ಪದ್ಮಾ ಪದ್ಮಿನೀ ಕೇಶವಸ್ಯ
ಜಯತು ಜಯತು ಕಾಲೀ ಕಾಲಿನೀ ಕಾಲಕಾಂತಾ ..
ಜಯತು ಜಯತು ಖರ್ವಾ ಷೋಡಶೀ ವೇದಹಸ್ತಾ
ಜಯತು ಜಯತು ಧಾತ್ರೀ ಧರ್ಮಿಣೀ ಧಾತೃಶಾಂತಿಃ .
ಜಯತು ಜಯತು ವಾಣೀ ಬ್ರಹ್ಮಣೋ ಬ್ರಹ್ಮವಂದ್ಯಾ
ಜಯತು ಜಯತು ದುರ್ಗಾ ದಾರಿಣೀ ದೇವಶತ್ರೋಃ ..
ದೇವಿ ತ್ವಂ ಸೃಷ್ಟಿಕಾಲೇ ಕಮಲಭವಭೃತಾ ರಾಜಸೀ ರಕ್ತರೂಪಾ
ರಕ್ಷಾಕಾಲೇ ತ್ವಮಂಬಾ ಹರಿಹೃದಯಧೃತಾ ಸಾತ್ವಿಕೀ ಶ್ವೇತರೂಪಾ .
ಭೂರಿಕ್ರೋಧಾ ಭವಾಂತೇ ಭವಭವನಗತಾ ತಾಮಸೀ ಕೃಷ್ಣರೂಪಾ
ಏತಾಶ್ಚಾನ್ಯಾಸ್ತ್ವಮೇವ ಕ್ಷಿತಮನುಜಮಲಾ ಸುಂದರೀ ಕೇವಲಾದ್ಯಾ ..
ಸುಮಲಶಮನಮೇತದ್ದೇವಿ ಗೋಪ್ಯಂ ಗುಣಜ್ಞೇ
ಗ್ರಹಣಮನನಯೋಗ್ಯಂ ಷೋಡಶೀಯಂ ಖಲಘ್ನಂ .
ಸುರತರುಸಮಶೀಲಂ ಸಂಪ್ರದಂ ಪಾಠಕಾನಾಂ
ಪ್ರಭವತಿ ಹೃದಯಾಖ್ಯಂ ಸ್ತೋತ್ರಮತ್ಯಂತಮಾನ್ಯಂ ..
ಇದಂ ತ್ರಿಪುರಸುಂದರ್ಯಾಃ ಷೋಡಶ್ಯಾಃ ಪರಮಾದ್ಭುತಂ .
ಯಃ ಶೃಣೋತಿ ನರಃ ಸ್ತೋತ್ರಂ ಸ ಸದಾ ಸುಖಮಶ್ನುತೇ ..
Other stotras
