भावयामि रघुरामं भव्यसुगुणारामम्
भावुकवितरणपरापाङ्गलीलालसितम्
दिनकरान्वयतिलकं दिव्यगाधिसुत-
सवनावनरचितसुबाहुमुख-
वधमहल्यापावनम्।
अनघमीशचापभङ्गं जनकसुताप्राणेशं
घनकुपितभृगुरामगर्वहरमितसाकेतम्।
विहिताभिषेकमथ विपिनगतम्
आर्यवाचा सहितसीतासौमित्रीं
शान्ततमशीलम्।
गुहनिलयगतं चित्रकूटागत-
भरतदत्तमहितरत्नमयपादुकं
मदनसुन्दराङ्गम्।
विततदण्डकारण्यगतविराधदलनं
सुचरितघटजदत्तानुपमितवैष्णवास्त्रम्।
पतगवरजटायुनुतं पञ्चवटीविहितावासम्
अतिघोरशूर्पनखावचनगतखरादिहरम्।
कनकमृगरूपधरखलमारीचहरमिह
सुजनविमतदशास्यहृतजनकजान्वेषणम्।
अनघं पम्पातीरसङ्गताञ्जनेयनभोमणि-
तनुजसख्यकरं वालीतनुदलनमीशम्।
वानरोत्तमसहितवायुसूनुकरार्पित-
भानुशतभास्वरभव्यरत्नाङ्गुलीयम्।
तेन पुनरानीतान्यूनचूडामणिदर्शनं
श्रीनिधिमुदधितीरेश्रितविभीषणमिलितम्।
कलितवरसेतुबन्धं
खलनिःसीमपिशिताशनदलनं
उरुदशकण्ठविदारणम् अतिधीरम्।
ज्वलनपूतजनकसुतासहितं यातसाकेतं
विलसितपट्टाभिषेकं विश्वपालं पद्मनाभम्।

bhaavayaami raghuraamam bhavyasugunaaraamam
bhaavukavitaranaparaapaangaleelaalasitam
dinakaraanvayatilakam divyagaadhisuta-
savanaavanarachitasubaahumukha-
vadhamahalyaapaavanam.
anaghameeshachaapabhangam janakasutaapraanesham
ghanakupitabhri'guraamagarvaharamitasaaketam.
vihitaabhishekamatha vipinagatam
aaryavaachaa sahitaseetaasaumitreem
shaantatamasheelam.
guhanilayagatam chitrakoot'aagata-
bharatadattamahitaratnamayapaadukam
madanasundaraangam.
vitatadand'akaaranyagataviraadhadalanam
sucharitaghat'ajadattaanupamitavaishnavaastram.
patagavarajat'aayunutam panchavat'eevihitaavaasam
atighorashoorpanakhaavachanagatakharaadiharam.
kanakamri'garoopadharakhalamaareechaharamiha
sujanavimatadashaasyahri'tajanakajaanveshanam.
anagham pampaateerasangataanjaneyanabhomani-
tanujasakhyakaram vaaleetanudalanameesham.
vaanarottamasahitavaayusoonukaraarpita-
bhaanushatabhaasvarabhavyaratnaanguleeyam.
tena punaraaneetaanyoonachood'aamanidarshanam
shreenidhimudadhiteereshritavibheeshanamilitam.
kalitavarasetubandham
khalanih'seemapishitaashanadalanam
urudashakant'havidaaranam atidheeram.
jvalanapootajanakasutaasahitam yaatasaaketam
vilasitapat't'aabhishekam vishvapaalam padmanaabham.