ఓం గణానాం త్వా గణపతిం హవామహే కవిం కవీనాముపమశ్రవస్తమం .
జ్యేష్ఠరాజం బ్రహ్మణాం బ్రహ్మణస్పత ఆ నః శృణ్వన్నూతిభిః సీద సాదనం ..
ప్రణో దేవీ సరస్వతీ వాజేభిర్వాజినీవతీ .
ధీనామవిత్ర్యవతు ..
శ్రీగణేశాయ నమః . శ్రీసరస్వత్యై నమః . శ్రీగురుభ్యో నమః . శ్రీకులదేవతాయై నమః . అవిఘ్నమస్తు .
ఓం నారాయణాయ నమః . ఓం నరాయ నరోత్తమాయ నమః. ఓం సరస్వతీదేవ్యై నమః . ఓం వేదవ్యాసాయ నమః .
అస్య శ్రీచండీకవచస్య . బ్రహ్మా ఋషిః . అనుష్టుప్ ఛందః .
చాముండా దేవతా . అంగన్యాసోక్తమాతరో బీజం .
దిగ్బంధదేవతాస్తత్వం . శ్రీజగదంబాప్రీత్యర్థే సప్తశతీపాఠాంగజపే వినియోగః .
ఓం నమశ్చండికాయై .
మార్కండేయ ఉవాచ .
ఓం యద్గుహ్యం పరమం లోకే సర్వరక్షాకరం నృణాం .
యన్న కస్యచిదాఖ్యాతం తన్మే బ్రూహి పితామహ .
బ్రహ్మోవాచ .
అస్తి గుహ్యతమం విప్ర సర్వభూతోపకారకం .
దేవ్యాస్తు కవచం పుణ్యం తచ్ఛృణుష్వ మహామునే .
ప్రథమం శైలపుత్రీతి ద్వితీయం బ్రహ్మచారిణీ .
తృతీయం చంద్రఘంటేతి కూష్మాండేతి చతుర్థకం .
పంచమం స్కందమాతేతి షష్ఠం కాత్యాయనీతి చ .
సప్తమం కాలరాత్రిశ్చ మహాగౌరీతి చాష్టమం .
నవమం సిద్ధిదాత్రీ చ నవదుర్గాః ప్రకీర్తితాః .
ఉక్తాన్యేతాని నామాని బ్రహ్మణైవ మహాత్మనా .
అగ్నినా దహ్యమానాస్తు శత్రుమధ్యే గతో రణే .
విషమే దుర్గమే చైవ భయార్తాః శరణం గతాః .
న తేషాం జాయతే కించిదశుభం రణసంకటే .
నాపదం తస్య పశ్యామి శోకదుఃఖభయం నహి .
యైస్తు భక్త్యా స్మృతా నూనం తేషాం సిద్ధిః ప్రజాయతే .
ప్రేతసంస్థా తు చాముండా వారాహీ మహిషాసనా .
ఐంద్రీ గజసమారూఢా వైష్ణవీ గరుడాసనా .
మాహేశ్వరీ వృషారూఢా కౌమారీ శిఖివాహనా .
బ్రాహ్మీ హంససమారూఢా సర్వాభరణభూషితా .
నానాభరణశోభాఢ్యా నానారత్నోపశోభితాః .
దృశ్యంతే రథమారూఢా దేవ్యః క్రోధసమాకులాః .
శంఖం చక్రం గదాం శక్తిం హలం చ ముసలాయుధం .
ఖేటకం తోమరం చైవ పరశుం పాశమేవ చ .
కుంతాయుధం త్రిశూలం చ శార్ఙ్గమాయుధముత్తమం .
దైత్యానాం దేహనాశాయ భక్తానామభయాయ చ .
ధారయంత్యాయుధానీత్థం దేవానాం చ హితాయ వై .
మహాబలే మహోత్సాహే మహాభయవినాశిని .
త్రాహి మాం దేవి దుష్ప్రేక్ష్యే శత్రూణాం భయవర్ధిని .
ప్రాచ్యాం రక్షతు మామైంద్రీ ఆగ్నేయ్యామగ్నిదేవతా .
దక్షిణేఽవతు వారాహీ నైర్ఋత్యాం ఖడ్గధారిణీ .
ప్రతీచ్యాం వారుణీ రక్షేద్వాయవ్యాం మృగవాహినీ .
ఉదీచ్యాం రక్ష కౌబేరి ఈశాన్యాం శూలధారిణీ .
ఊర్ధ్వం బ్రహ్మాణీ మే రక్షేదధస్తాద్వైష్ణవీ తథా .
ఏవం దశ దిశో రక్షేచ్చాముండా శవవాహనా .
జయా మే అగ్రతః స్థాతు విజయా స్థాతు పృష్ఠతః .
అజితా వామపార్శ్వే తు దక్షిణే చాపరాజితా .
శిఖాం మే ద్యోతినీ రక్షేదుమా మూర్ధ్ని వ్యవస్థితా .
మాలాధరీ లలాటే చ భ్రువౌ రక్షేద్యశస్వినీ .
త్రినేత్రా చ భ్రువోర్మధ్యే యమఘంటా తు పార్శ్వకే .
శంఖినీ చక్షుషోర్మధ్యే శ్రోత్రయోర్ద్వారవాసినీ .
కపోలౌ కాలికా రక్షేత్ కర్ణమూలే తు శాంకరీ .
నాసికాయాం సుగంధా చ ఉత్తరోష్ఠే చ చర్చికా .
అధరే చామృతకలా జిహ్వాయాం చ సరస్వతీ .
దంతాన్ రక్షతు కౌమారీ కంఠమధ్యే తు చండికా .
ఘంటికాం చిత్రఘంటా చ మహామాయా చ తాలుకే .
కామాక్షీ చిబుకం రక్షేద్వాచం మే సర్వమంగలా .
గ్రీవాయాం భద్రకాలీ చ పృష్ఠవంశే ధనుర్ధరీ .
నీలగ్రీవా బహిః కంఠే నలికాం నలకూబరీ .
ఖడ్గధారిణ్యుభౌ స్కంధౌ బాహూ మే వజ్రధారిణీ .
హస్తయోర్దండినీ రక్షేదంబికా చాంగులీస్తథా .
నఖాంఛూలేశ్వరీ రక్షేత్ కుక్షౌ రక్షేన్నలేశ్వరీ .
స్తనౌ రక్షేన్మహాలక్ష్మీర్మనః శోకవినాశినీ .
హృదయం లలితా దేవీ ఉదరం శూలధారిణీ .
నాభౌ చ కామినీ రక్షేద్ గుహ్యం గుహ్యేశ్వరీ తథా .
కట్యాం భగవతీ రక్షేజ్జానునీ వింధ్యవాసినీ .
భూతగాథా చ మేఢ్రం మే ఊరూ మహిషవాహినీ .
జంఘే మహాబలా ప్రోక్తా సర్వకామప్రదాయినీ .
గుల్ఫయోర్నారసింహీ చ పాదౌ చామితతేజసీ .
పాదాంగులీః శ్రీర్మే రక్షేత్ పాదాధఃస్థలవాసినీ .
నఖాన్ దంష్ట్రాకరాలీ చ కేశాంశ్చైవోర్ధ్వకేశినీ .
రోమకూపేషు కౌబేరీ త్వచం వాగీశ్వరీ తథా .
రక్తమజ్జావసామాంసాన్యస్థిమేదాంసి పార్వతీ .
అంత్రాణి కాలరాత్రిశ్చ పిత్తం చ ముకుటేశ్వరీ .
పద్మావతీ పద్మకోశే కఫే చూడామణిస్తథా .
జ్వాలాముఖీ నఖజ్వాలా అభేద్యా సర్వసంధిషు .
శుక్రం బ్రహ్మాణీ మే రక్షేచ్ఛాయాం ఛత్రేశ్వరీ తథా .
అహంకారం మనో బుద్ధిం రక్ష మే ధర్మచారిణీ .
ప్రాణాపానౌ తథా వ్యానం సమానోదానమేవ చ .
యశః కీర్తిం చ లక్ష్మీం చ సదా రక్షతు వైష్ణవీ .
గోత్రమింద్రాణీ మే రక్షేత్ పశూన్ మే రక్ష చండికా .
పుత్రాన్ రక్షేన్మహాలక్ష్మీర్భార్యాం రక్షతు భైరవీ .
మార్గం క్షేమకరీ రక్షేద్విజయా సర్వతః స్థితా .
రక్షాహీనం తు యత్ స్థానం వర్జితం కవచేన తు .
తత్సర్వం రక్ష మే దేవి జయంతీ పాపనాశినీ .
పాదమేకం న గచ్ఛేత్ తు యదీచ్ఛేచ్ఛుభమాత్మనః .
కవచేనావృతో నిత్యం యత్ర యత్రాపి గచ్ఛతి .
తత్ర తత్రార్థలాభశ్వ విజయః సార్వకాలికః .
యం యం కామయతే కామం తం తం ప్రాప్నోతి నిశ్చితం .
పరమైశ్వర్యమతులం ప్రాప్స్యతే భూతలే పుమాన్ .
నిర్భయో జాయతే మర్త్యః సంగ్రామేష్వపరాజితః .
త్రైలోక్యే తు భవేత్పూజ్యః కవచేనావృతః పుమాన్ .
ఇదం తు దేవ్యాః కవచం దేవానామపి దుర్లభం .
యః పఠేత్ప్రయతో నిత్యం త్రిసంధ్యం శ్రద్ధయాన్వితః .
దైవీకలా భవేత్తస్య త్రైలోక్యే హ్యపరాజితః .
జీవేద్వర్షశతం సాగ్రమపమృత్యువివర్జితః .
నశ్యంతి వ్యాధయః సర్వే లూతావిస్ఫోటకాదయః .
స్థావరం జంగమం వాఽపి కృత్రిమం చైవ యద్విషం .
అభిచారాణి సర్వాణి మంత్రయంత్రాణి భూతలే .
భూచరాః ఖేచరాశ్చైవ జలజాశ్చోపదేశికాః .
సహజా కులజా మాలా డాకినీ శాకినీ తథా .
అంతరిక్షచరా ఘోరా డాకిన్యశ్చ మహాబలాః .
గ్రహభూతపిశాచాశ్చ యక్షగంధర్వరాక్షసాః .
బ్రహ్మరాక్షసవేతాలాః కూష్మాండా భైరవాదయః .
నశ్యంతి దర్శనాత్తస్య కవచే హృది సంస్థితే .
మానోన్నతిర్భవేద్రాజ్ఞస్తేజోవృద్ధికరం పరం .
యశసా వర్ధతే సోఽపి కీర్తిమన్నిహ భూతలే .
జపేత్ సప్తశతీం చండీం కృత్వా తు కవచం పురా .
యావద్భూమండలం ధత్తే సశైలవనకాననం .
తావత్తిష్ఠతి మేదిన్యాం సంతతిః పుత్రపౌత్రికీ .
దేహాంతే పరమం స్థానం యత్ సురైరపి దుర్లభం .
ప్రాప్నోతి పురుషో నిత్యం మహామాయాప్రసాదతః .
వారాహపురాణే హరిహరబ్రహ్మవిరచితం దేవ్యాః కవచం .